រុស្ស៊ី ថា លោកខាងលិចកំពុងទាញដៃប្រទេសមួយទៀតឲ្យចូលក្នុងជម្លោះ អ៊ុយក្រែន

ប្រធានទីភ្នាក់ងារសន្តិសុខសហព័ន្ធរបស់រុស្ស៊ី ឬហៅកាត់ថា FSB លោក Alexander Bortnikov បាននិយាយថា លោកខាងលិចកំពុងទាញដៃប្រទេសម៉ុលដាវី ឲ្យចូលរួមក្នុងជម្លោះនៅអ៊ុយក្រែន ដើម្បីកម្ទេចតំបន់ Transdniestria ដែលជាតំបន់ផ្តាច់ខ្លួនគាំទ្ររុស្ស៊ី នៅភាគខាងកើតម៉ុលដាវី ។

ប្រធាន FSB ដែលជាជំនួយការជិតស្និទ្ធបំផុតរបស់ប្រធានាធិបតីរុស្ស៊ី លោក Vladimir Putin បានធ្វើការកត់សម្គាល់បែបនេះកាលពីថ្ងៃព្រហស្បតិ៍ ក្នុងអំឡុងពេលកិច្ចប្រជុំជាមួយប្រធានទីភ្នាក់ងារសន្តិសុខនៅក្នុងរដ្ឋធានី Minsk របស់ប្រទេសបេឡារុស ។

ប្រព័ន្ធផ្សព្វផ្សាយរុស្ស៊ីបាននិយាយថា តំបន់ Transdniestria ដែលមានទីតាំងនៅតាមព្រំដែនជាមួយអ៊ុយក្រែន បានប្រកាសឯករាជ្យជាឯកតោភាគីពីប្រទេសម៉ុលដាវីក្នុងឆ្នាំ ១៩៩២ ខណៈរុស្ស៊ី​មាន​ឥទ្ធិពល​ខ្លាំងលើ​តំបន់នេះ ជាពិសេស​មាន​ទាហាន​ឈរជើង​នៅ​ទីនោះប្រមាណ ១,៥០០ នាក់ ។

គួរបញ្ជាក់ថា ចាប់តាំងពីរុស្ស៊ីបានចាប់ផ្តើមប្រតិបត្តិការសឹកលើអ៊ុយក្រែនកាលពីឆ្នាំមុនមក រដ្ឋាភិបាលនិយមលោកខាងលិចរបស់លោកស្រីប្រធានាធិបតីម៉ុលដាវី Maia Sandu ក៏កំពុងស្ថិតក្នុងស្ថានភាពនៃការប្រុងប្រយ័ត្នខ្ពស់ផងដែរ ចំពោះលទ្ធភាពណាមួយដែលរុស្ស៊ីអាចនឹងលុកលុយតំបន់ Transdniestria ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ លោក ថាក់ស៊ីន បញ្ជាក់ច្បាស់ៗពីពេលវេលាវិលត្រឡប់ចូលស្រុកវិញ