Song Joong Ki និងភរិយា ស្វាគមន៍កូនប្រុសដំបូងនៅប្រទេសអ៊ីតាលី

យោងទៅតាមសារព័ត៌មានកូរ៉េជាច្រើនបានរាយការណ៍ថា Song Joong Ki បានស្វាគមន៍កូនប្រុសដំបូងរបស់ពួកគេកាលពីថ្ងៃទី ១៤ ខែមិថុនាដែលភរិយារបស់តារាសម្ដែងរូបនេះបានសម្រាលកូននៅទីក្រុងរ៉ូមប្រទេសអ៊ីតាលីជាស្រុកកំណើតរបស់នាង ។

ភ្លាមៗបន្ទាប់ពីស្វាគមន៍សមាជិកថ្មីក្នុងគ្រួសារ តារាកូរ៉េរូបនេះបានបង្ហោះសារនៅលើគេហទំព័រផ្ទាល់ ខ្លួនអមដោយរូបថតកូនប្រុសតូចកាន់ដៃរបស់លោក ដោយ Song Joong Ki បាននិយាយអំពីប្រពន្ធរបស់លោកដែលសម្រាលបានកូនដំបូងរបស់ពួកគេថា “ថ្ងៃនេះខ្ញុំចង់ចែករំលែកភាពរីករាយនេះជាមួយអ្នកទាំងអស់គ្នា ព្រោះខ្ញុំមានក្តីសុបិនមួយដែលទើបតែក្លាយជាការពិត” ។

Song Joong Ki បានបន្តទៀតថា”បច្ចុប្បន្នខ្ញុំនៅប្រទេសអ៊ីតាលី ហើយខ្ញុំបានស្វាគមន៍កូនប្រុសដំបូងរបស់ខ្ញុំនៅទីក្រុងរ៉ូមដែលជាស្រុកកំណើតរបស់ប្រពន្ធខ្ញុំ ហើយទារកនិងម្តាយមានសុខភាណល្អឥឡូវនេះខ្ញុំកំពុងមើលថែគ្រួសាររបស់ខ្ញុំយ៉ាងសប្បាយរីករាយ”។ តារាសម្តែងរូបនេះបានបន្ថែមទៀតថា ” នេះជាអំណោយដ៏មានតម្លៃបំផុតសម្រាប់ប្ដីប្រពន្ធរបស់យើង ក្តីសុបិនដ៏ធំបំផុតរបស់យើងគឺបង្កើតគ្រួសារដ៏មានសុភមង្គលពេញមួយជីវិត” ។

ក្នុងការចែករំលែកនេះផងដែរ Song Joong Ki បានថ្លែងអំណរគុណដល់អ្នកគាំទ្រដែលតែងតែរង់ចាំ និងគាំទ្រលោកក្នុងរយៈពេលកន្លងមក។ លើសពីនេះ តារាវ័យ៣៧ឆ្នាំរូបនេះ ក៏សន្យាថានឹងវិលត្រឡប់មកវិញក្នុងពេលឆាប់ៗនេះ ជាមួយនឹងគម្រោងភាពយន្តថ្មី និងបន្តជាតារាសម្ដែងនាពេលអនាគត ៕

ប្រែសម្រួល៖នាងតូច

ចុចអាន៖Jennie សុំទោសទស្សនិកជន មិនអាចបញ្ចប់ការប្រគំតន្ត្រីនៅអូស្ត្រាលី