លោក ពូទីន បញ្ជាក់ជំហរ បាញ់នុយក្លេអ៊ែរ

ប្រធានាធិបតីរុស្ស៊ី លោក វ្ល៉ាឌីមៀរ ពូទីន និយាយថា រុស្ស៊ី នឹងប្រើប្រាស់អាវុធនុយក្លេអ៊ែរ បើខ្លួនប្រឈមមុខនឹងការគំរាមកំហែងអត្ថិភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកប្រធានាធិបតី បានកត់សម្គាល់បែបនេះ ក្នុងវេទិកាសេដ្ឋកិច្ចអន្តរជាតិ St. Petersburg (SPIEF) ឆ្លើយតបទៅនឹងសំណួរអំពីគោលជំហររបស់លោកលើការប្រើប្រាស់អាវុធនុយក្លេអ៊ែរ។

លោកនិយាយថា “អាវុធនុយក្លេអ៊ែរ ត្រូវបានបង្កើតឡើងដើម្បីធានាសន្តិសុខរបស់យើងក្នុងន័យទូលំទូលាយបំផុត និងអត្ថិភាពនៃរដ្ឋរុស្ស៊ី។ យើងមិនមានតម្រូវការបែបនេះឡើយ ហើយការពិភាក្សាអំពីប្រធានបទនេះ បានធ្វើឲ្យកម្រិតនៃការប្រើប្រាស់អាវុធនុយក្លេអ៊ែរ ធ្លាក់ចុះលែងខ្លាំងដូចមុន”។

ស្របពេលជាមួយគ្នានោះដែរ លោក ពូទីន បាននិយាយអំពីការដាក់ពង្រាយអាវុធនុយក្លេអ៊ែរយុទ្ធសាស្ត្ររបស់រុស្ស៊ី នៅបេឡារុស ដោយបញ្ជាក់ថា ដំណើរការបានចាប់ផ្តើមរួចហើយ ហើយគ្រោងនឹងបញ្ចប់នៅចុងឆ្នាំនេះ។

លើសពីនេះ លោកពូទីនបានសង្កត់ធ្ងន់ថា ទីក្រុងមូស្គូ នឹងមិនចូលរួមក្នុងកិច្ចពិភាក្សាស្តីពីការរំសាយអាវុធនុយក្លេអ៊ែរជាមួយលោកខាងលិចឡើយ ព្រោះថា បើរុស្ស៊ី កាត់បន្ថយឃ្លាំងអាវុធ នោះខ្លួននឹងមានគុណវិបត្តិ។

គួរបញ្ជាក់ថា សន្ធិសញ្ញា New Start គឺជាកិច្ចព្រមព្រៀងគ្រប់គ្រងអាវុធនៅសល់ចុងក្រោយរវាងទីក្រុងមូស្គូ និងវ៉ាស៊ីនតោន បន្ទាប់ពីសហរដ្ឋអាមេរិក បានដកខ្លួនចេញពីសន្ធិសញ្ញា INF និង Open Skies ក្រោមការដឹកនាំរបស់អតីតប្រធានាធិបតី លោក ដូណាល់ ត្រាំ។

កិច្ចព្រមព្រៀងនេះ កំណត់ការស្តុកអាវុធនុយក្លេអ៊ែររបស់ប្រទេសទាំងពីរ ហើយអាចឲ្យពួកគេត្រួតពិនិត្យទីតាំងយោធារបស់គ្នាទៅវិញទៅមក ដើម្បីបញ្ជាក់ពីការអនុលោមតាមច្បាប់៕

ប្រែសម្រួល៖ Vann Vann

ប្រភព៖ RT 

ចុចអាន៖ រុស្ស៊ី បង្ហាញលក្ខខណ្ឌ វិលត្រលប់ទៅសន្ធិសញ្ញាអាវុធនុយក្លេអ៊ែរ New START វិញ