ព័ត៌មានជាតិ
វិទ្យាល័យព្រះមហាក្សត្រីកុសមៈ នឹងបើកឲ្យសិស្សចូលរៀនឡើងវិញនៅថ្ងៃស្អែក ក្រោយសំអាតគ្រាប់មិនទាន់ផ្ទុះរួចរាល់
វិទ្យាល័យព្រះមហាក្សត្រីកុសមៈ ដែលស្ថិតនៅភូមិត្រពាំងព្រីង សង្កាត់ក្រចេះ ក្រុងក្រចេះ ខេត្តក្រចេះ នឹងបើកឲ្យសិស្សានុសិស្សចូលរៀនធម្មតាឡើងវិញ នៅថ្ងៃទី ២១ សីហា ស្អែកនេះ បន្ទាប់ពីមន្ត្រីជំនាញស៊ីម៉ាក់ បានធ្វើការបោសសំអាតគ្រាប់មិនទាន់ផ្ទុះនៅក្នុងទីធ្លាសាលាចប់ជាស្ថាពរ។
បើតាម លោក ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកស៊ីម៉ាក់ បានឲ្យដឹងថា អង្គភាពស៊ីម៉ាក់ បានបោសសម្អាតគ្រាប់យុទ្ធភណ្ឌមិនទាន់ផ្ទុះសំណល់សង្គ្រាមកប់ក្នុងដី នៃបរិវេណសាលាវិទ្យាល័យព្រះមហាក្សត្រីកុសមៈនៅខេត្តក្រចេះបញ្ចប់ជាស្ថាពរនៅថ្ងៃទី ១៩ ខែសីហា ឆ្នាំ ២០២៣ ហើយនៅថ្ងៃទី២០ សីហា មន្ត្រីជំនាញស៊ីម៉ាក់ នឹងដឹកជញ្ជូនគ្រាប់មិនទាន់ផ្ទុះទាំងអស់ទៅកម្ទេចចោល។
លោកអគ្គនាយក បានបន្តថា «សូមលោកគ្រូ អ្នកគ្រូ និងក្មួយៗ សិស្សានុសិស្ស ព្រមទាំងប្រជាពលរដ្ឋនៅក្រុងក្រចេះ បញ្ជូនកូនចៅចូលរៀនវិញជាធម្មតានៅថ្ងៃច័ន្ទ ទី ២១ ខែសីហា ឆ្នាំ ២០២៣ ស្របតាមការជូនដំណឹងរបស់លោកនាយកសាលា និងមន្ទីរអប់រំខេត្ត»។
លោកអគ្គនាយកស៊ីម៉ាក់ បានបន្ថែមថា កិច្ចប្រតិបត្តិការបោសសំអាតគ្រាប់មិនទាន់ផ្ទុះនៅក្នុងវិទ្យាល័យព្រះមហាក្សត្រីកុសមៈនេះ មន្ត្រីស៊ីម៉ាក់ បានសម្រេចលទ្ធផលប្រមូលគ្រាប់មិនទាន់ផ្ទុះគ្រប់ប្រភេទបានចំនួន ២.២៨៦ គ្រាប់។
លោកអគ្គនាយកស៊ីម៉ាក់ បានពន្យល់ថា មូលហេតុដែលវិទ្យាល័យនេះសម្បូរគ្រាប់មិនទាន់ផ្ទុះ គឺដោយសារវិទ្យាល័យនេះ ត្រូវបានគេយកធ្វើជាបន្ទាយកងទ័ព។
លោកអគ្គនាយក បានបន្ថែម ថាផ្អែកតាមព័ត៌មានពីសាក្សីដែលធ្លាប់បានឃើញ និងរស់នៅក្បែរៗ សាលានេះ បានឲ្យដឹងថា ទីតាំងវិទ្យាល័យព្រះមហាក្សត្រីកុសុមៈនេះ ជាទីតាំងសាលារៀនចាប់តាំងពីសម័យសង្គមរាស្ត្រនិយម ប៉ុន្តែក្នុងសម័យសង្គ្រាម និងខ្មែរក្រហម(១៩៧៥-ដើមឆ្នាំ១៩៧៩) ទីតាំងសាលាក៏បានប្រែក្លាយជាបន្ទាយកងទ័ពខ្មែរក្រហម។ ក្រោយថ្ងៃ ៧ មករា ឆ្នាំ ១៩៧៩ ទីតាំងនេះ បន្តប្រើធ្វើជាបន្ទាយរហូតដល់ឆ្នាំ ១៩៨៧ ទើបប្រគល់អតីតបន្ទាយទាហាននេះមកឲ្យអាជ្ញាធរខេត្តក្រចេះ ដើម្បីប្រើប្រាស់ធ្វើជាសាលារៀនវិញ៕
អត្ថបទ ៖ សំអឿន
-
កីឡា៦ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៥ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ១៧ ម៉ោង ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
សន្តិសុខសង្គម១ សប្តាហ៍ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ព័ត៌មានជាតិ៦ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៥ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៦ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ១ សប្តាហ៍ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង