UEFA នឹងមិនធ្វើតាមគោលការណ៍បន្ថែមនាទីថ្មីរបស់ Premier League

ប្រធានសហព័ន្ធបាល់ទាត់​ទ្វីប​អឺរ៉ុប (UEFA) លោក Zvonimir Boban និយាយថា ច្បាប់បន្ថែមម៉ោងថ្មីនៅក្នុងបាល់ទាត់អង់គ្លេសគឺមិនសមហេតុផលទេ ហើយ​ក៏​នឹង​មិនត្រូវបានប្រើប្រាស់នៅក្នុងការប្រកួតនៅទ្វីបអឺរ៉ុប​ដែរ។

ស្ថាប័នអាជ្ញាកណ្តាលរបស់ប្រទេសអង់គ្លេសហៅកាត់ថា PGMOL បានជ្រើសរើសប្រើប្រាស់ការបន្ថែមពេលវេលាឲ្យច្រើនក្នុងការប្រកួតចាប់ពីរដូវកាលនេះ ដើម្បីកាត់បន្ថយការខ្ជះខ្ជាយពេលវេលា សម្រាប់ការអបអរគ្រាប់បាល់ ការផ្លាស់ប្តូរកីឡាករ និងការរងរបួស ប៉ុន្តែកីឡាករ និងអ្នកចាត់ការមួយចំនួនបានរិះគន់ការផ្លាស់ប្តូរនេះ។

ក្នុងនោះលោក Boban ប្រធានក្រុមដ៏ល្បីរបស់ក្រូអាតកាលពីឆ្នាំ ១៩៩៨ បាននិយាយថា វាពិតជាមិនទំនងទាល់តែសោះ។ វាទាក់ទងនឹងបញ្ហាសុខភាពរបស់កីឡាករ វាជាសោកនាដកម្មដ៏ធំមួយ ពីព្រោះពួកគេបន្ថែមម៉ោងជិត១២, ១៣, និង១៤ នាទីបន្ថែមទៀត។ ការប្រកួតក្នុងប្រទេសអង់គ្លេសជាញឹកញាប់បានដំណើរការលើសពី ១០០នាទីចាប់តាំងពីការចាប់ផ្តើមយុទ្ធនាការថ្មីនេះ។

លោក Boban  បានបន្ត​ថា៖«នៅពេល​អ្នកលេងបាន ៦០, ៦៥ នាទី។ ខ្ញុំអាចនិយាយបានពីបទពិសោធ​របស់ខ្ញុំ ជាពិសេសក្នុងនាមជាខ្សែបម្រើ នៅពេលអ្នកអស់កម្លាំង គឺអ្នកត្រូវប្រឹងលេង ៣០នាទីចុងក្រោយទៀត ដើម្បីដល់ម៉ោងបញ្ចប់ការប្រកួត។ បន្ទាប់ពីចប់ ៩០នាទីហើយមាននរណាម្នាក់មកបន្ថែមម៉ោង ១៥នាទីឲ្យអ្នកលេងទៀតគឺជារឿងមិនល្អទាល់តែសោះ។ ជាញឹកញាប់​ខ្ញុំបាននិយាយរិះគន់អំពីការវិភាគ និងការប្រកួតច្រើនពេក វាក៏មិនមែនជារឿងល្អដែរ»។

ចំពោះប្រធានអាជ្ញាកណ្តាលរបស់ស្ថាប័ន​បាល់ទាត់​អឺរ៉ុប UEFA លោក Roberto Rosetti បានគាំទ្រការលើកឡើងរបស់លោក Boban និងបានបន្ថែមថា ស្ថាប័នគ្រប់គ្រងបាល់ទាត់ទ្វីបអឺរ៉ុបបានធ្វើការអស់រយៈពេល៥ឆ្នាំដើម្បីរកដំណោះស្រាយផ្សេងទៀត ក្នុងការបង្កើនចំនួនពេលវេលាដែលបាល់កំពុងលេង។

លោក Roberto Rosetti ​បាន​និយាយថា៖«យើងប្រាប់អាជ្ញាកណ្តាលរបស់យើងឱ្យបង្កើនល្បឿននៃការចាប់ផ្តើមការលេងឡើងវិញជាជាងផ្តោតលើពេលវេលាបញ្ឈប់»៕

ប្រែសម្រួល៖ ផា រតនា
ប្រភព៖ BBC