ប្រធានកិច្ចប្រជុំរដ្ឋភាគីនៃអនុសញ្ញាអូតាវ៉ា ថា កម្ពុជា ជារដ្ឋគំរូនៃសកម្មភាពបោសសម្អាតមីន

លោក Thomas Gobel ឯកអគ្គរដ្ឋទូតអាល្លឺម៉ង់ប្រចាំអង្គការសហប្រជាជាតិ នៅទីក្រុងហ្សឺណែវ និងជាប្រធានកិច្ចប្រជុំរដ្ឋភាគី លើកទី២១ នៃអនុសញ្ញាអូតាវ៉ា បានថ្លែងថា កម្ពុជា ជារដ្ឋភាគីនៃអនុសញ្ញាអូតាវ៉ា ដែលមានភាពគំរូក្នុងសកម្មភាពបោសសម្អាតមីន និងសង្គ្រោះជនពិការដោយសារមីន។

ក្នុងសន្និសីទកាសែត ក្រោយពិធីបើកជាផ្លូវការនៃសន្និសីទសាកលលើកទី៣ ស្ដីពីកិច្ចសង្គ្រោះជនរងគ្រោះថ្នាក់ដោយសារ មីន និងសំណល់ជាតិផ្ទុះពីសង្គ្រាម នៅព្រឹកថ្ងៃទី១៧ ខែតុលានេះ លោក Thomas Gobel បានសម្ដែងក្ដីរីករាយបានចូលរួមនៅក្នុងសន្និសីទសាកលពេលនេះ ដែលកម្ពុជាធ្វើជាម្ចាស់ផ្ទះ។ លោក Thomas Gobel បានកោតសរសើរនូវការខិតខំរបស់កម្ពុជាក្នុងសកម្មភាពបោសសម្អាតមីន កាកសំណល់មិនទាន់ផ្ទុះ និងការសង្រ្គោះជនរងគ្រោះដោយសារ មីន នាពេលកន្លងមក។

មន្ត្រីទូតអាល្លឺម៉ង់រូបនេះ ដែលជាប្រធានកិច្ចប្រជុំរដ្ឋភាគី នៃអនុសញ្ញាអូតាវ៉ា ផងនោះ បានចាត់ទុកថា កម្ពុជា ជារដ្ឋភាគីគំរូមួយពាក់ព័ន្ធនឹងកិច្ចការដោះស្រាយបញ្ហាមីន។ លោក ថា តាមរយៈសន្និសីទ នៅថ្ងៃនេះ បានធ្វើឱ្យលោករៀនសូត្រ និងទទួលបាននូវបទពិសោធន៍ថ្មីៗបន្ថែមទៀតពីជនរងគ្រោះថ្នាក់ដោយសារមីននៅកម្ពុជា។ ត្រង់ចំណុចនេះ លោកបានសង្កត់ធ្ងន់ថា ​គ្រាប់មីន ងាយស្រួលដាក់ណាស់ តែការដោះមីន ពិតជាពិបាក ហើយត្រូវការពេលវេលាជាច្រើនឆ្នាំ ខណៈ ជនរងគ្រោះថ្នាក់ដោយសារមីន ត្រូវទទួលរងគ្រោះថ្នាក់ពេញជីវិត។

តែយ៉ាងណាក្ដី លោក Thomas Gobel បានស្នើរដ្ឋភាគី និងរដ្ឋមិនមែនភាគី ត្រូវផ្ដោតយកចិត្តទុកដាក់លើសន្និសីទសាកលលើកទី៣នេះ ដោយផ្ដោតលើកិច្ចសង្គ្រោះជនរងគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាម ក្នុងបរិបទនៃសិទ្ធិជនមានពិការភាព នាពេលនេះ សំដៅផ្តល់ធាតុចូលសម្រាប់ផែនការសកម្មភាពក្រោមអនុសញ្ញា ដោយផ្ដល់ជាវេទិកាកម្រិតសាកល ដើម្បីឱ្យសហគមន៍ និងជនដែលទទួលរងគ្រោះ បង្ហាញពីក្តីកង្វល់ និងបញ្ហារបស់ពួកគេ។

គួរជម្រាបថា ចំនួនជនរងគ្រោះថ្នាក់ដោយសារមីន បានធ្លាក់ចុះជាទីកត់សម្គាល់ បន្ទាប់ពីការចាប់ផ្តើមនៃអនុសញ្ញាស្ដីពីការហាមការប្រើប្រាស់ ការរក្សាទុក ការផលិត និងការផ្ទេរគ្រាប់មីនប្រឆាំងមនុស្ស ឬហៅថា អនុសញ្ញាអូតាវ៉ា ឬអនុសញ្ញាហាមប្រាមការប្រើប្រាស់មីនប្រឆាំងមនុស្ស កាលពីប្រមាណ ២៥ឆ្នាំមុន។ ចំពោះសន្និសីទសាកលលើកទី៣នេះ បើទោះបីជារៀបចំឡើងដោយកម្ពុជាក្ដី តែសន្និសីទនេះ នឹងផ្ដោតទៅលើបញ្ហាសាកល ដែលបានប្រឈមនៅក្នុងការអនុវត្តកាតព្វកិច្ចផ្សេងៗនៃអនុសញ្ញាអូតាវ៉ា ជាពិសេសការអនុវត្តជំនួយដល់ជនរងគ្រោះដោយសារមីន៕