ព័ត៌មានជាតិ

លោក ហ្សង់ ហ្វ្រង់ស្វ័រតាន់ សម្គាល់ឃើញថា អាទិភាពធំជាចម្បងរបស់សម្ដេចធិបតី គឺការទូតសេដ្ឋកិច្ច

បានផុស

៣ years មុន

នៅ

ថ្ងៃពុធ ២២ វិច្ឆិកា ២០២៣

ដោយ

លោក ហ្សង់ ហ្វ្រង់ស្វ័រ តាន់ រដ្ឋមន្ត្រីប្រតិភូអមនាយករដ្ឋមន្ត្រី បានគូសបញ្ជាក់ពីការកត់សម្គាល់របស់លោកថា អាទិភាពធំជាចម្បងរបស់សម្ដេចធិបតី នាយករដ្ឋមន្ត្រីកម្ពុជា គឺការទូតសេដ្ឋកិច្ច ឬស្នូលសេដ្ឋកិច្ចសកម្មភាពការទូត។ លោកបានគូសបញ្ជាក់ពីការកត់សម្គាល់ផ្ទាល់ខ្លួនបែបនេះ នៅក្នុងសន្និសីទសារព័ត៌មានស្ដីពីសមិទ្ធិផលការងាររយៈពេល៣ខែរបស់រាជរដ្ឋាភិបាលកម្ពុជា នៅទីស្ដីការគណៈរដ្ឋមន្ត្រី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីប្រតិភូអមនាយករដ្ឋមន្ត្រីរូបនេះ គូសបញ្ជាក់ដូច្នេះ “ក្នុងអំឡុងពេលបីខែចុងក្រោយនេះ, អ្នកណាក៏កត់សម្គាល់ឃើញដែរ, ទាំងខ្ញុំ និងទាំងបណ្តាប្រតិភូដទៃដែលអមដំណើរ សម្តេច ព្រមទាំងអស់លោកដែលជាអ្នកសារព័ត៌មាន, សុទ្ធតែកត់សម្គាល់ឃើញថា អាទិភាពចំបងមួយធំរបស់ សម្តេចមហាបវរធិបតី ហ៊ុន ម៉ាណែត គឺការទូតសេដ្ឋកិច្ច ឬស្នូលសេដ្ឋកិច្ចនៃសកម្មភាពទូត” ។

លោក ហ្សង់ហ្វ្រង់ស្វ័រ តាន់ បន្ថែមថា ពាក្យសំដីរបស់សម្តេចផ្ទាល់ គឺដើរទាក់ម៉ូយនិយាយបែបផ្សេង ក្នុងន័យស្វែងរកប្រយោជន៍សេដ្ឋកិច្ចមកឱ្យប្រជាជាតិកម្ពុជា។ បើតាម លោក ហ្សង់ ហ្វ្រង់ស្វ័រ តាន់ ជារដ្ឋមន្ត្រីប្រតិភូអមនាយករដ្ឋមន្ត្រីដែលតែងតែមានវត្តមានក្បែរសម្ដេចធិបតី ក្នុងពេលចេញទៅក្រៅប្រទេស បានអះអាងថា គ្រប់ជំនួបទ្វេភាគីជាមួយថ្នាក់ដឹកនាំបរទេស សុទ្ធតែជាឱកាសសម្រាប់ សម្តេចធិបតី ដើម្បីពង្រឹងកិច្ចសហប្រតិបត្តិការទ្វេភាគី ហើយថ្នាក់ដឹកនាំបរទេសទាំងអស់ សុទ្ធតែឯកភាពក្នុងការពង្រឹងកិច្ចសហប្រតិបត្តិការជាមួយកម្ពុជា លើច្រើនវិស័យ ដូចជា ពាណិជ្ជកម្ម វិនិយោគកសិកម្ម អប់រំ ទេសចរណ៍ វប្បធម៌ ការតភ្ជាប់ខ្សែច្រវាក់ផលិតកម្ម និងពិសេស ការតភ្ជាប់រវាងប្រជាជននិងប្រជាជន។

លោក ហ្សង់ ហ្វ្រង់ស្វ័រតាន់ បន្ថែមថា គ្រប់ទស្សនកិច្ចនៅបរទេស គ្រប់ព្រឹត្តការណ៍តំបន់និងអន្តរជាតិផ្សេងៗ ក៏ដូចព្រឹត្តការណ៍មួយចំនួនក្នុងនៅក្នុងស្រុកខ្មែរ សុទ្ធតែជាឱកាសសម្រាប់ សម្តេចធិបតី ដើម្បីជួបធុរជននិងវិនិយោគិនបរទេស ក្នុងគោលដៅ ទាក់ទាញពួកគេឱ្យបង្កើនការដាក់ទុនរកស៊ីនៅកម្ពុជា, ក្នុងគោលដៅ បញ្ចុះបញ្ចូលពួកគេ ឱ្យមកសិក្សាពីលទ្ធភាពវិនិយោគនៅកម្ពុជា និងសុទ្ធសឹងជាឱកាសសម្រាប់ សម្តេចធិបតី ដើម្បីចូលរួមក្នុងវេទិកាធុរកិច្ច(រួមមានជាអាទិ៍ កិច្ចប្រជុំធុរកិច្ចនិងវិនិយោគអាស៊ាន នៅហ្សាការតា, កិច្ចប្រជុំកំពូលធុរកិច្ចក្នុងក្របខណ្ឌកិច្ចព្រមព្រៀងអាសិប នៅណាននីង, វេទិកា ធុរកិច្ចសហរដ្ឋអាមេរិក-កម្ពុជា, នៅញូវយ៉ក, ជំនួបនៅភ្នំពេញរវាង សម្តេចធិបតី និងក្រុមប្រឹក្សាធុរកិច្ចអឺរ៉ុប-អាស៊ាន។

រូបថត សម្ដេចនាយករដ្ឋមន្ត្រីឡើងថ្លែងក្នុងកិច្ចប្រជុំកំពូលធុរកិច្ច និងវិនិយោគអាស៊ាន ឆ្នាំ២០២៣ នៅទីក្រុងហ្សាការតា សាធារណរដ្ឋឥណ្ឌូនេស៊ី កាលពីល្ងាចថ្ងៃចន្ទ ទី៤ កញ្ញា ២០២៣។

លោក បញ្ជាក់ថា ជាទូទៅ ធុរជននៃតំបន់អាស៊ាន និងអន្តរជាតិ សុទ្ធតែបង្ហាញនូវបំណងចង់មកបណ្តាក់ទុនវិនិយោគ នៅកម្ពុជា។ ចំពោះ សម្តេចធិបតី ទាំងអស់នេះ គឺសម្រាប់ផលប្រយោជន៍របស់ជាតិខ្មែរ សម្រាប់ផលប្រយោជន៍របស់ប្រជាជនខ្មែរ។ ហើយ ការស្វែងរកប្រយោជន៍សេដ្ឋកិច្ចមកជូនប្រជាជាតិខ្មែរនេះ គឺសុទ្ធតែត្រូវបន្ស៊ីគ្នាទៅនឹង យុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលកម្ពុជា។ ពោលគឺ ក្នុងគោលដៅនាំមកនូវ «កំណើន ការងារ ប្រសិទ្ធភាព និង ចីរភាព» និងក្នុងគោលដៅកំណត់យកអាទិភាពគន្លឹះទាំង៥ «មនុស្ស ផ្លូវ ទឹក ភ្លើង និង បច្ចេកវិទ្យា ពិសេស បច្ចេកវិទ្យាឌីជីថល »៕