ព័ត៌មានអន្ដរជាតិ

ទីក្រុងមួយរបស់ ឡាវ ដាក់គោលដៅទាញទេសចរ ១.៧ លាននាក់ តែក៏បារម្ភឃ្លាតចេញពីបញ្ជីបេតិកភណ្ឌ

បានផុស

២ years មុន

នៅ

ថ្ងៃសុក្រ ១៩ មករា ២០២៤

ដោយ

ទីក្រុងហ្លួងព្រះបាងរបស់ប្រទេសឡាវបានដាក់គោលដៅស្រូបយកអ្នកទេសចរទាំងជាតិ និងអន្តរជាតិប្រមាណ ១.៧ លាននាក់សម្រាប់យុទ្ធនាការឆ្នាំថ្មីរបស់ប្រទេស គឺ “ទស្សនាប្រទេសឡាវ ឆ្នាំ២០២៤” ។ នេះបើយោងតាមការចុះផ្សាយដោយសារព័ត៌មាន Laotian Times កាលពីថ្ងៃទី១៨ ខែមករាកន្លងទៅ ។

ឡាវដាក់ចេញសកម្មភាពទេសចរចំនួន ៤០ កម្មវិធីសម្រាប់ស្វាគមន៍គោលដៅទេសចរចម្រុះជាតិសាសន៍ ១.៧ លាននាក់ ហើយក្នុងនោះមានទិសដៅទេសចរ ដូចជា កន្លែងទីសក្ការៈ Phou Si Stupa, ប្រាសាទ Xieng Thong, ទឹកជ្រោះ Sae, ទឹកជ្រោះ Kuangsi, ផ្សាររាត្រី ដែលសុទ្ធតែជាសកម្មភាពផ្សាយទេសចរណ៍វប្បធម៌ នៅក្នុងទឹកដីបេតិកភណ្ឌមួយនេះ ខណៈខេត្តទេសចរហ្លួងព្រះបាងបានព្យាករថា ទេសចរនឹងចំណាយប្រមាណ ៩០០ លានដុល្លារអាមេរិកក្នុងវិស័យទេសចរមួយនេះ ។

យ៉ាងណាក្តី ទន្ទឹមនឹងការដាក់គោលដៅទាក់ទាញអ្នកទេសចរ ក៏កើតមានបញ្ហាចូលមកផងដែរ ពោលគឺទីក្រុងនេះត្រូវមានការអភិវឌ្ឍសម្រាប់ទេសចរ ក៏ដូចជាកំពុងលុបបំបាត់អត្តសញ្ញាណហេដ្ឋរចនាសម្ព័ន្ធបែបប្រពៃណីមួយចំនួនបន្តិចៗម្តង ពិសេសនោះគឺផលប៉ះពាល់ពីសំណង់ទំនប់វារីអគ្គិសនីថ្មីហ្លួងព្រះបាង ។

តាមរបាយការណ៍ពីប្រភពព័ត៌មាន Nikkei Asia មន្រ្តីអាជ្ញាធរក្នុងតំបន់បានបង្ហាញក្តីបារម្ភ ដោយលើកឡើងពីបញ្ហាការអនុវត្តគោលដៅទាក់ទាញឧស្សាហកម្មទេសចរដើម្បីចំណូល អាចងាកចេញពីការណែនាំរបស់អង្គការ UNESCO ក្នុងការកិច្ចការអភិរក្ស រក្សាក្រុងបេតិកភណ្ឌមួយនេះ។ ហើយការណ៍នេះ ដែលធ្វើឲ្យទីក្រុងហ្លួងព្រះបាង អាចនឹងត្រូវដកចេញពីបញ្ជីបេតិកភណ្ឌ ប្រសិនបើមិនមានវិធានការសមស្របណាមួយ។

កាលពីឆ្នាំ២០២៣ ទីក្រុងហ្លួងព្រះបាង បានទទួលស្វាគមន៍ភ្ញៀវទេសចរយ៉ាងគំហុក ដោយចំនួនអ្នកទេសចរកើនឡើងយ៉ាងរហ័សជាង ១ លាននាក់ ស្មើនឹងកំណើន ៩១.៤៩ ភាគរយ បើធៀបនឹងឆ្នាំ២០២២ ។ កំណើននេះបានរួមចំណែកចំណូលក្នុងប្រទេសទេសចរមួយនេះ ប្រមាណ ៥៦០ លានដុល្លារអាមេរិកដោយមានភ្ញៀវទេសចរអន្តរជាតិចំនួន៧៦ ម៉ឺននាក់មកកាន់ខេត្តហ្លួងព្រះបាង ៕