សម្ដេចធិបតី ត្រូវបានអញ្ជើញឱ្យចូលរួមវេទិកាសេដ្ឋកិច្ចពិភពលោក ឆ្នាំ២០២៥

គ្រាជួបសម្តែងការគួរសម នារដ្ឋធានីវៀងចន្ទន៍ ប្រទេសឡាវ លោកសាស្ត្រាចារ្យ Klaus Schwab បានអញ្ជើញសម្តេចធិបតី នាយករដ្ឋមន្ត្រីនៃកម្ពុជា ចូលរួមវេទិកាសេដ្ឋកិច្ចពិភពលោក (WEF) ប្រចាំឆ្នាំ២០២៥។

កាលពីល្ងាចថ្ងៃទី១០ ខែតុលា ឆ្នាំ២០២៤ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានអនុញ្ញាតឱ្យលោកសាស្ត្រាចារ្យ Klaus Schwab ស្ថាបនិក និងជាប្រធានប្រតិបត្តិវេទិកាសេដ្ឋកិច្ចពិភពលោក (WEF) ចូលជួបសម្តែងការគួរសម ក្នុងឱកាសចូលរួមកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ នៅរដ្ឋធានីវៀងចន្ទន៍។

ក្នុងឱកាសនៃជំនួប លោកប្រធានប្រតិបត្តិ WEF បានថ្លែងអំណរគុណចំពោះសម្ដេចបធិបតី ដែលបានអញ្ជើញញចូលរួមនៅក្នុងកិច្ចប្រជុំ WEF នៅទីក្រុងដាវ៉ូស ប្រទេសស្វីស កាលពីដើមឆ្នាំ២០២៤ កន្លងទៅ ហើយជាថ្មីម្ដងទៀត លោកក៏បានអញ្ជើញសម្ដេចធិបតី ចូលរួមក្នុងវេទិកាប្រចាំឆ្នាំនេះម្ដងទៀត ដែលគ្រោងនឹងរៀបចំឡើងនៅដើមឆ្នាំ២០២៥ ខាងមុខនេះ។ លោកសាស្ត្រាចារ្យ ក៏បានជម្រាបជូនសម្ដេចធិបតីអំពីសក្ដានុពលវេទិកាសេដ្ឋកិច្ចពិភពលោក ដែលជាឱកាសនៅក្នុងការកសាងនូវបណ្ដាញទំនាក់ទំនងរវាងវិស័យសាធារណៈ និងឯកជន។

ជាការកត់សម្គាល់ កាលពីដើមឆ្នាំ២០២៤ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអញ្ជើញចូលរួមកិច្ចប្រជុំប្រចាំឆ្នាំរបស់វេទិកាសេដ្ឋកិច្ចពិភពលោកនេះម្ដងរួចមកហើយ នៅទីក្រុងដាវ៉ូស-ក្លូស្ទ័រ ប្រទេសស្វីស។

សម្ដេចធិបតី ហ៊ុន ម៉ាណែត បានអបអរសារទរចំពោះការភាពជោគជ័យនៃវេទិកាសេដ្ឋកិច្ចពិភពលោក នាពេលកន្លងមក ហើយសម្ដេច ក៏បានថ្លែងអំណរគុណចំពោះលោកសាស្រ្តាចារ្យ ដែលបានអញ្ជើញសម្ដេចផ្ទាល់ ចូលរួមវេទិកានេះ នៅឆ្នាំក្រោយ។

គួរជម្រាបថា វេទិកាសេដ្ឋកិច្ចពិភពលោក (WEF) គឺជាមូលនិធិមិនស្វែងរកប្រាក់ចំណូល ដែលមានមូលដ្ឋានក្នុងទីក្រុង ហ្សឺណែវ ប្រទេសស្វីស។ បេសកកម្មវេទិកាសេដ្ឋកិច្ចពិភពលោក គឺប្តេជ្ញាជម្រុញវិស័យពាណិជ្ជកម្ម នយោបាយ និងរៀបចំរបៀបវារៈ នៃកិច្ចប្រជុំផ្តោតលើវិស័យឧស្សាហកម្មថ្នាក់តំបន់ និងពិភពលោក៕