ព័ត៌មានអន្ដរជាតិ

UN ៖ យោធាមីយ៉ាន់ម៉ាកំពុងប្រព្រឹត្តឧក្រិដ្ឋកម្មប្រឆាំងនឹងមនុស្សជាតិ

បានផុស

៥ years មុន

នៅ

ថ្ងៃសុក្រ ១២ មីនា ២០២១

ដោយ

អង្គការសហប្រជាជាតិបាននិយាយកាលពីថ្ងៃព្រហស្បតិ៍ថា យោធាមីយ៉ាន់ម៉ាទំនងជាបានប្រព្រឹត្តឧក្រិដ្ឋកម្មប្រឆាំងនឹងមនុស្សជាតិ ខណៈបាតុករ ៧ នាក់បន្ថែមទៀតត្រូវបានបាញ់សម្លាប់ ។

អ្នកស៊ើបអង្កេតឯករាជ្យរបស់អង្គការសហប្រជាជាតិនិយាយថា កងកម្លាំងសន្តិសុខមីយ៉ាន់ម៉ាបានសម្លាប់ជនស៊ីវិលយ៉ាងតិច ៧០ នាក់ចាប់តាំងពីរដ្ឋប្រហារថ្ងៃទី ១ ខែកុម្ភៈ ។

លោក Thomas Andrews អ្នករាយការណ៍ពិសេសរបស់ UN ទទួលបន្ទុកសិទ្ធិមនុស្សនៅក្នុងប្រទេសមីយ៉ាន់ម៉ាបាននិយាយតាមរយៈសារជាវីដេអូនៅក្នុងកិច្ចប្រជុំក្រុមប្រឹក្សាសិទ្ធិមនុស្សរបស់អង្គការសហប្រជាជាតិនៅទីក្រុងហ្សឺណែវកាលពីថ្ងៃព្រហស្បតិ៍ថា របាយការណ៍ដែលអាចជឿទុកចិត្តបានបង្ហាញថា យ៉ាងហោចណាស់ជនស៊ីវិល ៧០ នាក់ត្រូវបានសម្លាប់ និងច្រើនជាង ២,០០០ នាក់ផ្សេងទៀតត្រូវបានចាប់ឃុំខ្លួនតាមអំពើចិត្ត ។

លោកបាននិយាយថា មានភ័ស្តុតាងវីដេអូនៃកងកម្លាំងសន្តិសុខបានវាយដំក្រុមអ្នកតវ៉ា ក្រុមគ្រូពេទ្យ និងអ្នកឈរមើល ហើយបានបាញ់ប្រហារទៅលើផ្ទះរបស់ប្រជាជនជាដើម ។ លោកស្នើថា សកម្មភាពបែបនេះអាចជាឧក្រិដ្ឋកម្មប្រឆាំងមនុស្សជាតិ ។

លោក Andrews បានស្វាគមន៍សេចក្តីថ្លែងការណ៍របស់ប្រធានក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃពុធដែលបានបង្ហាញការព្រួយបារម្ភអំពីស្ថានភាព និងបានថ្កោលទោសចំពោះអំពើហិង្សានេះ ។ ប៉ុន្តែលោកបានបន្ថែមថា ការឆ្លើយតបរបស់ UN មិនទាន់គ្រប់គ្រាន់នៅឡើយទេ ហើយបានអំពាវនាវឲ្យមានការដាក់ទណ្ឌកម្មពហុភាគីប្រឆាំងនឹងយោធាមីយ៉ាន់ម៉ា ។

ចំណែកអ្នកតំណាងក្រសួងការបរទេសមីយ៉ាន់ម៉ាលោក Chan Aye បានឆ្លើយតបនៅក្នុងសេចក្តីថ្លែងការណ៍ជាវីដេអូថា អាជ្ញាធររបស់ប្រទេសនេះបានអនុវត្តការអត់ធ្មត់បំផុតដើម្បីដោះស្រាយជាមួយ “ការតវ៉ាដោយហិង្សា” នេះ ។

ជាមួយគ្នានេះដែរអ្នកនាំពាក្យក្រសួងការបរទេសសហរដ្ឋអាមេរិកលោក Ned Price បានស្តីបន្ទោសម្តងទៀតដល់យោធាមីយ៉ាន់ម៉ាកាលពីថ្ងៃព្រហស្បតិ៍ ។

លោកបានប្រាប់អ្នកយកព័ត៌មានថា សហរដ្ឋអាមេរិកមានការតក់ស្លុតចំពោះអំពើហិង្សាដ៏សាហាវដែលបានប្រព្រឹត្ដប្រឆាំងនឹងប្រជាជនមីយ៉ាន់ម៉ាជាការឆ្លើយតបនឹងការអំពាវនាវដោយសន្តិវិធីរបស់យោធាដើម្បីស្តាររដ្ឋាភិបាលស៊ីវិលដែលពួកគេបានជ្រើសរើសដោយខ្លួនឯងដោយការបោះឆ្នោត ។

លោកបានកត់សម្គាល់ថា សហរដ្ឋអាមេរិកបានដាក់ទណ្ឌកម្មបន្ថែមលើបុគ្គល និងអង្គភាពដែលមានទំនាក់ទំនងជាមួយយោធាមួយថ្ងៃមុននេះ ។ លោកបានបន្ថែមថា “យើងនឹងបន្តរកវិធីដើម្បីធ្វើឲ្យរបបយោធាទទួលខុសត្រូវចំពោះសកម្មភាពរបស់ខ្លួន” ។

លោក Price ក៏បាននិយាយដែរថា បញ្ហានេះនឹងស្ថិតនៅលើរបៀបវារៈនៅពេលដែលរដ្ឋមន្រ្តីក្រសួងការបរទេសអាមេរិក Antony Blinken ធ្វើទស្សនកិច្ចនៅប្រទេសជប៉ុន និងកូរ៉េខាងត្បូងនៅសប្តាហ៍ក្រោយ ៕

ប្រែសម្រួលដោយ ៖ ជីវ័ន្ត

ប្រភព ៖ Daily Mail

ចុចអាន ៖ ខ្លោចចិត្ត! អ្នកតវ៉ាម្នាក់ផ្តាំប្រពន្ធមុនទៅតវ៉ាស្ថិតក្នុងចំណោមអ្នកស្លាប់១២នាក់ម្សិលមិញ

ចុចអាន ៖ អាក្រក់ៗទៅ ថ្ងៃនេះ ស្លាប់៨នាក់ទៀត ខណៈយោធាចោទលោកស្រី ស៊ូជី ទទួលប្រាក់សំណូក