អាជ្ញាធររាជធានី ចុះពិនិត្យទីតាំងរៀបចំកន្លែងស្នាក់នៅរបស់កីឡាករអុំទូក

លោក ឃ្លាំង ហួត និងលោក អ៊ីមរ៉ន ហាស្សាសាន់ អភិបាលរងរាជធានីភ្នំពេញ ដោយមានការចូលរួមពីមន្ត្រីគណកម្មាធិការជាតិរៀបចំបុណ្យជាតិ-អន្តរជាតិ និងមានការចូលរួមពីរដ្ឋបាលខេត្តនីមួយៗ បានចុះពិនិត្យទីតាំងស្នាក់នៅរបស់កីឡាករ កីឡាការិនីប្រណាំងទូក ដែលរដ្ឋបាលរាជធានីភ្នំពេញបានរៀបចំជូន។

នារសៀលថ្ងៃទី៧ ខែវិច្ឆិកា ឆ្នាំ២០២៤ ក្រុមការងារក៏បាននាំតំណាងខេត្ត ដើម្បីពិនិត្យ និងកំណត់ទីតាំងចំណតទូក តាមច្រាំងទន្លេ និងផ្លូវដើម្បីក្រុមការងារទូកទាំងអស់ងាយស្រួលក្នុងការឡើងមកដីគោកស្នាក់នៅក្នុងរោង ដែលសាលារាជធានីភ្នំពេញរៀបចំជូន។

អនុគណៈកម្មការ គ្រប់គ្រងទូក ក៏បានសំណូមពរដល់គ្រប់រដ្ឋបាលខេត្ត និងអង្គភាព សូមសហការឱ្យបានល្អ ជាពិសេសត្រូវយកចិត្តទុកដាក់រឿងអនាម័យ វេចខ្ចប់សំរាមឱ្យបានល្អ ដើម្បីងាយស្រួលក្រុមការងារក្នុងការប្រមូល។

សូមបញ្ញាក់ថា ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំនេះ នឹងប្រព្រឹត្តទៅរយៈពេល ៣ថ្ងៃ គឺថ្ងៃព្រហស្បតិ៍ សុក្រ និងសៅរ៍ ទី១៤-១៥-១៦ ខែវិច្ឆិកា ឆ្នាំ២០២៤នេះ ដោយមានទូក ង ចូលរួមប្រកួតប្រជែងចំនួន៣៤៦ទូក លើសពីឆ្នាំកន្លងទៅ ៩ទូក និងមានកីឡាករចំណុះទូកប្រមាណជាង២ម៉ឺននាក់ និងប្រទីបចំនួន៣៥ប្រទីប៕

អត្ថបទ៖ ម៉េង