ព័ត៌មានអន្ដរជាតិ

តម្លៃនាំចេញម្រេចវៀតណាម កើនខ្ពស់លើស ១ ប៊ីលានដុល្លារ ទោះបរិមាណធ្លាក់ចុះ

បានផុស

២ years មុន

នៅ

ថ្ងៃពុធ ២៧ វិច្ឆិកា ២០២៤

ដោយ

កាសែត Viet Nam News បានចុះផ្សាយថា តម្លៃនៃការនាំចេញម្រេចរបស់វៀតណាមក្នុងរយៈពេល ១០ ខែដើមឆ្នាំនេះ បានហក់ឡើងខ្ពស់រហូតដល់ ៤៧ ភាគរយ ដល់ ១,១ ប៊ីលានដុល្លារ បើធៀបនឹងរយៈពេលដូចគ្នាកាលពីឆ្នាំមុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វៀតណាមបានកត់ត្រាពីកំណើនតម្លៃខ្ពស់កប់ពពកនេះ ចំពេលដែលការនាំចេញម្រេចបានធ្លាក់ចុះបើគិតពីបរិមាណ។ក្នុងរយៈពេល ១០ ខែដូចគ្នា វៀតណាមបាននាំចេញម្រេចចំនួន ២១៨ ៧៣២ តោន ដោយធ្លាក់ចុះ ៣ ភាគរយ។

វាគឺលើកដំបូងក្នុងរយៈពេល១ទសវត្សរ៍ ដែលតម្លៃនៃការនាំចេញម្រេចបានហក់ឡើងដល់ ១ ប៊ីលានដុល្លារជាថ្មី ខណៈគេរំពឹងថា ការនាំចេញផលិតផលកសិកម្មមួយមុខនេះ នឹងឈានដល់ ១,៣ ប៊ីលានដុល្លារ នៅឆ្នាំ ២០២៤។ បើតាម Viet Nam News ម្រេចវៀតណាមត្រូវបាននាំចេញក្នុងតម្លៃ ៥ ០៧៧ ដុល្លារ/តោន ជាមធ្យម ក្នុងរយៈពេល ១០ ខែដើមឆ្នាំ កើនឡើង ៥១,៥ ភាគរយ ក្នុងអត្រាប្រចាំឆ្នាំ។

អាមេរិកនៅតែបន្តនាំមុខគេលើការនាំចូលម្រេចវៀតណាម ហើយបន្តមកទៀត រួមមាន អាល្លឺម៉ង់ ហូឡង់ កូរ៉េខាងត្បូង រុស្ស៊ី និងថៃ។ ប្រទេសទាំងនេះ សុទ្ធតែកត់ត្រាពីកំណើននៃការនាំចូលម្រេចវៀតណាម ប៉ុន្តែការនាំចូលរបស់ចិន បានធ្លាក់ចុះជាគំហុក។

គួរគូសបញ្ជាក់ថា វៀតណាមនៅតែជាប្រទេសនាំចេញម្រេចឈានមុខគេរបស់ពិភពលោក។ កសិករវៀតណាមកំពុងប្រកាន់យកនូវការអនុវត្តកសិកម្មសរីរាង្គ ដើម្បីបង្កើនផលិតភាព ជាជាងពង្រីកការដាំដុះ។ កសិកម្មចំរុះ ដែលដាំម្រេចផ្សំជាមួយកាហ្វេ និងដើមឈើហូបផ្លែ កំពុងក្លាយជារឿងធម្មតា៕