រដ្ឋចាប់ដៃជាមួយក្រុមហ៊ុនឯកជន ដើម្បីគ្រប់គ្រង និងកម្ទេចចោលទំនិញបង្រ្កាបបាន ឬ​ខូចគុណភាព

អគ្គ​​នាយកដ្ឋានគយ និងរដ្ឋាករកម្ពុជា (អគរ) និងក្រុមហ៊ុន ជីប ម៉ុង អ៊ិនស៊ី ស៊ីមេន បានចុះអនុស្សរណៈយោគយល់គ្នា​(MoU) លើការគ្រប់គ្រង និងកម្ទេចទំនិញដែល​ត្រូវ​បាន​បង្រ្កាបបាន ឬត្រូវ​បាន​នាំចូលខូចគុណភាពមកក្នុងប្រទេសកម្ពុជា ដើម្បីរួមគ្នាលើការគាំពារបរិស្ថាន។

នៅក្នុងពីចុះហត្ថលេខា​លើ​ MoU ដែលធ្វើឡើងកាលពីថ្ងៃទី២៤ ម្សិលមិញ ​លោក គុណ ញឹម អគ្គនាយកអគរ បាន​លើក​ឡើង​ពីកិច្ចសហការរវាង​ក្រុមការងាររបស់លោក និងអាជ្ញាធរមានសមត្ថកិច្ចពាក់ព័ន្ធ បង្រ្កាប​ទំនិញល្មើស​ច្បាប់​គយនាពេលកន្លងមក​មាន​ដូចជា ទំនិញត្រូវបានម្ចាស់សម្រេចប្រគល់ជូនរដ្ឋ ទំនិញ​មាន​សាលក្រម​សម្រេច​រឹបអូសជា​សម្បត្តិរដ្ឋ ឬត្រូវបានម្ចាស់បោះបង់ចោលពុំបានចូលខ្លួនមកដោះស្រាយ និង​ទំនិញហួស​ពេលកំណត់​ខូចគុណភាព​ផ្សេងទៀតនាំ​​ចូល​មករក្សា​ទុកក្នុង​មណ្ឌល​សន្និធិគយបណ្តោះ​អាសន្ន​បានក្លាយ​ទៅជា​ទំនិញគ្មានការទាមទារ ដែល​ទំនិញទាំងនោះ​សុទ្ធតែជា​ទំនិញ​​ត្រូវបាន​​សម្រេចឱ្យ​កម្ទេចចោល​តាមច្បាប់ជាធរមាន។

លោកបានថ្លែងថា៖«ពិធីចុះហត្ថលេខាលើ​អនុស្សរណៈនៃការយោគយល់គ្នានេះ គឺជាជំហានថ្មីមួយ​ដែលបង្កើត​កិច្ចសហប្រតិបត្តិការរវាង អគរ និងក្រុមហ៊ុន ជីប ម៉ុង អ៊ិនស៊ី ស៊ីមេន ខបភើរេសិន ក្នុងកិច្ចគាំ​ពារបរិស្ថាន លើការគ្រប់គ្រងនិងកម្ទេចទំនិញដែលត្រូវបានបង្រ្កាបបាន ឬត្រូវបាននាំចូលមក​ក្នុង​ក​ម្ពុជា ហើយត្រូវបាន​ចាត់ជាទំនិញគ្មានការទាមទារស្របតាមច្បាប់ស្តីពីគយ និងលិខិតប​​ទដ្ឋាន​គតិយុត្តនៅ​ជាធរមានរួមមាន ទំនិញ​​ចម្រុះខូចគុណភាព សារធាតុគីមីខូចគុណភាព និងគ្រោះថ្នាក់ដែលត្រូវបានដកហូត កម្ទេចដោយបច្ចេកវិទ្យាខូប្រូសេសស៊ីង (Co-Processing) ឬបច្ចេកវិទ្យាប្រព្រឹត្តិកម្មប្រកប ដោយសុវត្ថិភាពប​រិស្ថាន»។ ​

លោក​​សង្ឃឹមថា ពិធីចុះហត្ថលេខាលើអនុស្សរណៈនៃការយោគ​យល់គ្នានេះ នឹងទទួល​បានចំណាប់អារម្មណ៍​ពីក្រសួង-ស្ថាប័នពាក់ព័ន្ធ និងវិស័យឯកជន ក្នុងការបន្តការគាំទ្រដល់ អគរ ក្នុងការបំពេញ​តួនាទី និងបេសកកម្មរបស់ខ្លួន ជាពិសេស ការពារសុខសុវត្ថិភាពសុ​ខុមាល​ភាពប្រជាជន និងវិបុលភាពបន្ថែមទៀត។

គួរជម្រាបថា នៅថ្ងៃទី២៤ ខែកុម្ភះ ម្សិលមិញនេះ ​អគ្គ​​នាយកដ្ឋានគយ និងរដ្ឋាករកម្ពុជា (អគរ) បានចុះហត្ថលេខាលើអនុស្សរណៈរួមគ្នា ជាមួយក្រុមហ៊ុន ជីប ម៉ុង អ៊ិនស៊ី ស៊ីមេន ខបភើរេសិន ស្តីពីកិ​ច្ច​ស​ហ​​ប្រតិបត្តិការប្រើប្រាស់សេវានៃគម្រោង ជីប ម៉ុង អេកូសាយខល ប្រកបដោយចីរភាពនិងសុវត្ថិភាពផងដែរ៕