គណៈប្រតិភូធុរកិច្ចសហភាពអារ៉ាប់រួម នឹងមកទស្សនកិច្ចស្វែងរកឱកាសវិនិយោគនៅកម្ពុជា

នៅក្នុង​ជំនួប​ជា​មួយ​លោក​រដ្ឋមន្ត្រី ហែម វណ្ណឌី នៅ​ថ្ងៃទី២១ ខែឧសភា ឆ្នាំ២០២៥ នេះ​ លោក Obaid Saeed Obaid Bintaresh Aldhaheri ឯកអគ្គរដ្ឋទូតនៃសហភាពអារ៉ាប់រួមប្រចាំកម្ពុជា បាន​គូស​បញ្ជាក់​ពី​គម្រោង​រៀបចំ​ដំណើរ​ទស្សនកិច្ច​របស់​គណៈប្រតិភូធុរកិច្ច សហភាពអារ៉ាប់រួម​មកកម្ពុជានៅខែវិច្ឆិកា ឆ្នាំ២០២៥ ដើម្បី​ស្វែង​រក​ឱកាសវិនិយោគ។

នា​ឱកាស​នៃ​ជំនួប​នេះ ធ្វើ​ឡើង​ដើម្បីពិភាក្សាអំពីកិច្ចសហប្រតិបត្តិការ​ទ្វេភាគី​ក្នុង​វិស័យឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដោយបន្ត​សន្ទុះ​នៃ​ការអនុវត្ត​កិច្ចព្រមព្រៀង​ពាណិជ្ជកម្ម​សេរីរវាងប្រទេសទាំងពីរ។

ឯកអគ្គរដ្ឋទូត​ក៏​បាន​បញ្ជាក់​ថា សហភាព​អារ៉ាប់​រួម នឹង​ធ្វើ​ដំណើរ​ទស្សនកិច្ច​មក​កាន់​ប្រទេស​កម្ពុជា នា​ខែ​វិច្ឆិកា ខាង​មុខ​នេះ ដើម្បី​ស្វែង​រក​ឱកាស​វិនិយោគ​បន្ថែម។

លោក​ឯកអគ្គរដ្ឋទូតក៏​បាន​បញ្ជាក់​ថា​នឹងមានការ​ហោះហើរ​របស់ក្រុមហ៊ុនអាកាសចរណ៍ថ្មីៗរវាង​ប្រទេស​ទាំង​ពីរ​ចាប់​​ពី​ខែ​មិថុនា ​ខាង​មុខ​ទៅ។

លោក Aldhaheri បានលើកឡើងថា «យើងមើលមកប្រទេសកម្ពុជា យើងឃើញសក្តានុពល យើងឃើញ​ការរីក​ចម្រើន។  សហភាព​អារ៉ាប់រួមមានក្រុមហ៊ុន​ជំនាញ AI និងមជ្ឈមណ្ឌលទិន្នន័យទំនើប ហើយយើង​នឹងនាំពួក​គេ​មកកម្ពុជា យ៉ាងហោចណាស់ក៏អាចចែករំលែកបទពិសោធន៍ពាក់ព័ន្ធនឹង AI ការបង្កើត App និង Software ផ្សេងៗ»។

ជា​ការ​ឆ្លើយ​តប លោក ហែម វណ្ណឌី បានស្វាគមន៍ចំពោះវឌ្ឍភាពនៃកិច្ចសហការកន្លងមក និងបានកោតសរសើរ​សហភាពអារ៉ាប់រួម​ដែលសន្យាផ្តល់អាហារូបករណ៍សម្រាប់និស្សិតកម្ពុជាទៅសិក្សាជំនាញវិទ្យាសាស្ត្រ។

លោក​រដ្ឋមន្ត្រី​ បានលើកឡើងថា ការអភិវឌ្ឍធនធានមនុស្សក្នុងផ្នែកវិទ្យាសាស្ត្រ និងបច្ចេកវិទ្យាមានសារៈ​សំខាន់​ណាស់ ព្រោះ​រាជរដ្ឋាភិបាលបានកំណត់យកបច្ចេកវិទ្យាជាមុំទី៥ នៃយុទ្ធសាស្ត្របញ្ចកោណ។

ក្នុង​នោះ​ កម្ពុជាក៏កំពុងធ្វើពិពិធកម្មសេដ្ឋកិច្ច ដោយផ្តោតលើឧស្សាហូបនីយកម្ម និងបរិវត្តកម្មឌីជីថល ហើយ​យើង​បើក​ចំហ​ចំពោះ​កិច្ចសហការ​ជាមួយ​សហភាពអារ៉ាប់រួម លើការវិនិយោគ នវានុវត្តន៍ និងឧស្សាហកម្ម​ដែល​បង្កើត​តម្លៃបន្ថែមខ្ពស់។

ក្នុង​ឱកាស​ដដែល​នោះ លោក​រដ្ឋមន្ត្រី ហែម វណ្ណឌី ក៏បានស្នើឱ្យសហភាពអារ៉ាប់រួម អញ្ជើញ​ក្រុមហ៊ុន​បច្ចេកវិទ្យា​របស់ខ្លួន មក​ចូលរួម និងចែករំលែកបទពិសោធន៍ក្នុងទិវាជាតិវិទ្យាសាស្ត្រ បច្ចេកវិទ្យា និងនវានុវត្តន៍របស់កម្ពុជា ដែលគ្រោងរៀបចំក្នុងខែមីនា ឆ្នាំ២០២៦ ផងដែរ៕