ព័ត៌មានជាតិ

ឯកឧត្តម ហ៊ុន ម៉ានី៖ ពេលដែលប្រទេសកម្ពុជារងការគំរាមកំហែង ប្រជាជនខ្មែរនឹងមិននៅស្ងៀមនោះទេ

បានផុស

១ year មុន

នៅ

ថ្ងៃពុធ ១៨ មិថុនា ២០២៥

ដោយ

ឯកឧត្តម ហ៊ុន ម៉ានី រដ្ឋមន្រ្តីក្រសួងមុខងារសាធារណៈ និងជាប្រធានសហភាពសហព័ន្ធយុវជនកម្ពុជា បានលើកឡើងថា នៅពេលដែលប្រទេសកម្ពុជារងការគំរាមកំហែង ប្រជាជនខ្មែរនឹងមិននៅស្ងៀមនោះទេ យើងនឹងងើបឈរស្មារតីរួមគ្នា គាំទ្ររាជរដ្ឋាភិបាលកម្ពុជា និងកងកម្លាំងជាតិរបស់យើង ក្នុងការការពារបូរណភាពទឹកដី ការពារប្រយោជន៍ជាតិ និងភាពសុខសាន្តរបស់ខ្មែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះជាការថ្លែងឡើងរបស់ឯកឧត្តម ហ៊ុន ម៉ានី នៅចំពោះមុខប្រជាជនកម្ពុជារាប់ម៉ឺននាក់ ដែលបានចូលរួមនៅក្នុងកម្មវិធីការធ្វើដំណើរថ្មើរជើង “ Solidarity March “ ដើម្បីបង្ហាញការគាំទ្រដល់រាជរដ្ឋាភិបាល និងកងកម្លាំងជួរមុខ នៅព្រឹកថ្ងៃទី១៨ ខែមិថុនា ឆ្នាំ ២០២៥។ ព្រឹត្តិការណ៍នេះធ្វើនៅរាជធានីភ្នំពេញ ដែលមានការចូលរួម ពីសំណាក់ជាតិសាសន៍ខ្មែរយ៉ាងផុសផុល និងគ្រប់និន្នាការនយោបាយ។ ឯកឧត្តម ហ៊ុន ម៉ានី បានបញ្ជាក់ថា៖«ប្រជាជនខ្មែរនឹងមិននៅស្ងៀមនោះទេ បើសិនជាមានការគំរាមកំហែងណាមួយ និងការប្រមាថណាមួយទៅលើកិត្តិយស និងដែនបូរណភាពទឹកដីរបស់ប្រជាជនកម្ពុជា»។

ទោះជាយ៉ាងណាក្តី ឯកឧត្តមថា កម្ពុជាជ្រើសរើសស្របទៅតាមការណែនាំ និងគោលជំហររបស់សម្តេចតេជោ ហ៊ុន សែន ប្រធានព្រឹទ្ធសភា និងនាយករដ្ឋមន្រ្តីកម្ពុជា សម្តេចធិបតី ហ៊ុន ម៉ាណែត គឺដោះស្រាយរាល់បញ្ហារបស់កម្ពុជាដោយសន្តិវិធី និងផ្អែកលើកមូលដ្ឋាននិងច្បាប់ ។ ឯកឧត្តម ហ៊ុន ម៉ានី គូសរំលេចថា៖«ក្នុងស្មារតីនេះ សូមបងប្អូនជនរួមជាតិចងចាំថា ការររួបរួមរបស់យើងនៅថ្ងៃនេះ គឺស្របទៅតាមព្រះរាជបណ្តាំរបស់សម្តេចតា ខ្មែររួបរួមគឺខ្មែរខ្លាំង ដែលជាមូលដ្ឋានដ៏រឹងមាំសម្រាប់កម្ពុជាតាំងពីអតីតកាលរហូតដល់ថ្ងៃនេះ និងតទៅអនាគត លើមូលដ្ឋាននៃការរួបរួមគ្នា ដែលយើងត្រូវចេះរៀនរស់ដោយខ្លួនឯង»។

បើតាមឯកឧត្តម ការជួបជុំគ្នានៅក្នុងថ្ងៃនេះ មិនមែនជាការជួបជុំគ្នាដើម្បីបង្ហាញកម្លាំង ឬក៏ការគំរាមកំហែងទៅអ្នកណានោះទេ កម្ពុជាថែរក្សាភាពចាស់ទុំ ដោះស្រាយបញ្ហាដោយសន្តិវិធី ហើយការជួបជុំក្នុងថ្ងៃនេះលក្ខណៈជាមហាគ្រួសារខ្មែរ គឺដើម្បីបង្ហាញនូវមនោសញ្ចេតនាក្នុងការគាំទ្រទៅលើរាជរដ្ឋាភិបាល គាំទ្រលើកងកម្លាំងប្រដាប់អាវុធ និងរាល់វិធានការដោះស្រាយការពារបូរណភាពទឹកដីដោយសន្តិវិធី ។

ឯកឧត្តម ហ៊ុន ម៉ានី សង្កត់ធ្ងន់ថា៖«ការជួបជុំរបស់យើងនៅថ្ងៃនេះមិនមានបំណងការបង្ហាញកម្លាំង និងការគំរាមកំហែងឬក៏មានសារអវិជ្ជមានជូនអ្នកណានោះទេ គោលបំណងរបស់យើងក្នុងនាមជាមហាគ្រួសារខ្មែរ គឺមកជួបជុំគ្នាបង្ហាញនូវការគាំទ្រទឹកចិត្ត និងជឿជាក់លើរដ្ឋាភិបាលកម្ពុជា៕