សម្តេចតេជោ ប្រាប់នាយករដ្ឋមន្ត្រីសិង្ហបុរីឱ្យជំរុញថៃទៅដោះស្រាយបញ្ហាព្រំដែនជាមួយកម្ពុជានៅតុលាការអន្តរជាតិ

សម្ដេចតេជោ ហ៊ុន សែន ប្រាប់នាយករដ្ឋមន្ត្រីសិង្ហបុរីលោក ឡ រ៉េនវ៉ុង ឱ្យជួយជំរុញភាគីថៃទៅដោះស្រាយបញ្ហាព្រំដែនរសើបទាំង៤ជាមួយកម្ពុជានៅតុលាការយុត្តិធម៌អន្តរជាតិនៅទីក្រុងឡាអេ។ នេះបើតាមលោក ជា ធីរិទ្ធ អ្នកនាំពាក្យព្រឹទ្ធសភា ស្រង់ប្រសាសន៍របស់សម្ដេចតេជោ ហ៊ុន សែន នៅក្នុងពេលអនុញ្ញាតឱ្យនាយករដ្ឋមន្ត្រីសិង្ហបុរី ដែលមកបំពេញទស្សនកិច្ចផ្លូវការនៅកម្ពុជា ចូលជួបសម្ដែងការគួរសម និងពិភាក្សាការងារ នៅវិមានព្រឹទ្ធសភា នាព្រឹកថ្ងៃពុធ ទី០២ ខែកក្កដា នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យព្រឹទ្ធសភា លោក ជា ធីរិទ្ធ ឱ្យដឹងដែរថា នៅក្នុងជំនួប សម្ដេចតេជោ ហ៊ុន សែន ប្រាប់លោក ឡ រ៉េនវ៉ុង  ថាមូលហេតុដែលកម្ពុជា-ថៃ មានវិវាទព្រំដែនជាមួយគ្នា គឺព្រោះតែកាលពីថ្ងៃទី២៨ ខែឧសភា ​ទាហាន​ថៃបាន​ចូល​មក​បាញ់​សម្លាប់​ទាហាន​កម្ពុជា​ និងថៃបានបិទព្រំដែនជាឯកតោភាគី និងការ​គំរាម​កំហែង​ផ្សេង​ៗជាច្រើនទៀត។

សម្ដេចតេជោ ហ៊ុន សែន ក៏បន្តប្រាប់នាយករដ្ឋមន្ត្រីសិង្ហបុរីទៀតថា ជាបន្តបន្ទាប់ ថៃ បានប្រមាថលើកម្ពុជា តាមរយៈការគំរាមកាត់ផ្ដាច់ការផ្គត់ផ្គង់អគ្គិសនី និងអ៊ីនធឺណិត ប្រមាថលើពលករខ្មែរ គំរាមឱ្យឈប់ផ្គត់ផ្គង់ប្រេងឥន្ធនៈ និងប្រមាថមកលើថ្នាក់ដឹកនាំកម្ពុជាសម្ដេចធិបតី ហ៊ុន ម៉ាណែត និងសម្ដេចតេជោផ្ទាល់។ នេះបើតាមលោក ជា ធីរិទ្ធ។

សម្ដេចបានបញ្ជាក់ថា ថ្នាក់ដឹកនាំកម្ពុជាទាំងសម្ដេចធិបតី និងសម្ដេចផ្ទាល់សោកស្ដាយ មិនចង់មាន​បញ្ហា​សង្គ្រាម​ជា​មួយ​ប្រទេសជិតខាងនោះទេ និងមិនចង់ឱ្យតំំបន់អាស៊ានកើតមានបញ្ហានេះទេ ពោលគឺចង់ឃើញអាស៊ានរួមសាមគ្គីគ្នា មិនបង្កបញ្ហានាំឱ្យប្រធានអាស៊ានឈឺក្បាលឡើយ។​

ជាការឆ្លើយតប លោកនាយកដ្ឋមន្រ្ដីសិង្ហបុរី អរគុណចំពោះសម្ដេចតេជោ ដែលបានពន្យល់អំពីបញ្ហាព្រំដែន និង​គោល​បំណងនៃការសម្រេចចិត្តដ៏ត្រឹមត្រូវរបស់កម្ពុជា។ លោកសង្ឃឹមថា ភាគីទាំងពីរ​នឹង​ដោះ​ស្រាយ​បញ្ហា​ដោយសន្ដិវិធី ដោយឈរលើគោលការច្បាប់អន្តរជាតិ។

ជាការកត់សម្គាល់នេះ មិនមែនជាលើកទី១ឡើយ ដែលសម្ដេច ហ៊ុន សែន តែងប្រាប់ពីជំហររបស់កម្ពុជាលើការដោះស្រាយបញ្ហាព្រំដែនជាមួយថៃ ជាពិសេសប្រាប់ឱ្យបរទេសជួយជំរុញថៃ ទៅដោះស្រាយបញ្ហាព្រំដែននៅតុលាការយុត្តិធម៌អន្តរជាតិជាមួយកម្ពុជា ទៅកាន់ឥស្សរជននៃបណ្ដាប្រទេសជាមិត្ត។ តួយ៉ាងសម្ដេចតេជោ បានប្រាប់ជប​៉ុន និងម៉ាឡេស៊ីជាដើម៕