ព័ត៌មានអន្ដរជាតិ

ចិនជម្លៀសមនុស្ស ៨២ ០០០នាក់នៅប៉េកាំង ព្រោះទឹកជំនន់ និងភ្លៀងធ្លាក់ខ្លាំង

បានផុស

៩ ខែ មុន

នៅ

ថ្ងៃអង្គារ ៥ សីហា ២០២៥

ដោយ

Chheang

ប្រព័ន្ធផ្សព្វផ្សាយរដ្ឋ បានរាយការណ៍កាលពីថ្ងៃចន្ទទី៤ខែសីហាឆ្នាំ២០២៥ថា មនុស្សជាង ៨២ ០០០នាក់នៅទីក្រុងប៉េកាំងត្រូវបានជម្លៀសខ្លួនចេញទៅរកកន្លែងសុវត្ថិភាព ខណៈដែលភ្លៀងធ្លាក់ខ្លាំង និងទឹកជំនន់នៅតែបន្តគំរាមកំហែងដល់រដ្ឋធានីមួយនេះរបស់ប្រទេសចិន។

យោងតាមសារព័ត៌មាន Xinhua ប្រជាជនមកពីសង្កាត់ជាច្រើនត្រូវបានផ្លាស់ទៅកាន់តំបន់មានសុវត្ថិភាព ចំពេលមានភ្លៀងធ្លាក់ខ្លាំង។ ទីស្នាក់ការកណ្តាលគ្រប់គ្រងទឹកជំនន់របស់ប៉េកាំង បានបញ្ជាក់ពីការជម្លៀស ហើយបាននិយាយថានឹងមានភ្លៀងធ្លាក់បន្ថែមទៀតនៅថ្ងៃអង្គារនេះ។

អាជ្ញាធរបានបិទតំបន់ទេសចរណ៍ចំនួន២០១ ផ្ទះសំណាក់សណ្ឋាគារចំនួន៣ ៤៨០ កន្លែងបោះតង់ចំនួន២៤៥ និងផ្អាកការងារនៅការដ្ឋានសំណង់ជាង៣ ២០០កន្លែងនៅទូទាំងទីក្រុងប៉េកាំង។

ចិនបានដាក់ការប្រកាសអាសន្ននៅកម្រិតពណ៌ក្រហម ដែលជាកម្រិតខ្ពស់បំផុតនៅក្នុងប្រព័ន្ធព្រមានអាកាសធាតុទាំង៤ថ្នាក់របស់ខ្លួន ដោយមានការព្យាករពីភ្លៀងធ្លាក់ខ្លាំងបំផុតចាប់ពីរសៀលថ្ងៃចន្ទដល់ព្រឹកថ្ងៃអង្គារ។ ការឆ្លើយតបទឹកជំនន់បន្ទាន់ក៏ត្រូវបានលើកឡើងដល់កម្រិតខ្ពស់បំផុតផងដែរ ជាពិសេសសម្រាប់សង្កាត់ Miyun , Fangshan, Mentougou និង Huairou។

អាជ្ញាធរបានជំរុញឲ្យប្រជាពលរដ្ឋស្នាក់នៅក្នុងផ្ទះ ចៀសវាងផ្លូវលិចទឹក និងត្រូវចៀសឲ្យឆ្ងាយពីតំបន់ភ្នំ-ទន្លេ ដែលងាយនឹងមានការបាក់ដី និងទឹកជំនន់ភ្លាមៗ។

ខ្យល់ព្យុះកាលពីសប្តាហ៍មុន បានធ្វើឲ្យមនុស្សយ៉ាងតិច ៤៤នាក់បានស្លាប់ ប៉ះពាល់ដល់អ្នកស្រុកជាង៣០០ ០០០នាក់ និងខូចខាតផ្ទះសម្បែងប្រហែល២៤ ០០០ខ្នង៕