នយោបាយ

កម្ពុជា-វៀតណាមបញ្ជាក់ពីការពង្រឹងជំនឿទុកចិត្តផ្នែកនយោបាយ

បានផុស

១១ ខែ មុន

នៅ

ថ្ងៃអង្គារ ២ កញ្ញា ២០២៥

ដោយ

ប្រធានព្រឹទ្ធសភាកម្ពុជា សម្ដេចតេជោ ហ៊ុន សែន និងអគ្គលេខាធិការបក្សកុំមុយនីស្តវៀតណាមលោក តូ ឡឹម បានបញ្ជាក់ពីការប្ដេជ្ញាចិត្តពង្រឹងការទុកចិត្តផ្នែកនយោបាយ បង្កើនទំនាក់ទំនងរវាងប្រជាជន និងប្រជាជន ព្រមទាំងរំលឹកពីការទប់ស្កាត់មិនឱ្យមានកម្លាំងណាមួយប្រើប្រាស់ទឹកដីបំផ្លាញប្រយោជន៍ប្រទេសមួយទៀត។ នេះបើតាមការចុះផ្សាយរបស់សារព័ត៌មានវៀតណាម Nhadan.vn។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយនេះទាំងសម្ដេចតេជោ ហ៊ុន សែន និងលោក តូ ឡឹម បានបង្ហាញនូវការប្ដេជ្ញាពង្រឹងទំនាក់ទំនងរវាងបក្សនៃប្រទេសទាំងពីរពង្រឹងកិច្ចសហប្រតិបត្តិការគ្រប់វិស័យដើម្បីជាប្រយោជន៍ដល់ប្រជាជន សន្ដិភាព និងការរីកចំរើន។

គួរឱ្យដឹងផងដែរថាប្រធានព្រឹទ្ធសភាកម្ពុជាសម្ដេចតេជោ ហ៊ុន សែន បានធ្វើដំណើរទស្សនកិច្ច២ថ្ងៃនៅថ្ងៃទី១ និងទី២ ខែកញ្ញានេះនៅប្រទេសវៀតណាមដើម្បីចូលរួមខួប៨០ឆ្នាំនៃបុណ្យឯករាជ្យវៀតណាម។ ក្នុងដំណើរទស្សនកិច្ចនោះសម្ដេចបានអញ្ជើញជួបប្រធានសភាវៀតណាមលោក ជិន ថាញ់មិន ផងដែរ។

ក្នុងជំនួបជាមួយប្រធានសភាវៀតណាមនោះសម្ដេចតេជោបានចាត់ទុកបដិវត្តន៍ខែសីហា នាឆ្នាំ១៩៤៥ គឺជាផ្នែកមួយដ៏សំខាន់ និងមានអត្ថន័យសម្រាប់ប្រទេសវៀតណាម ហើយក៏កត្តានាំឲ្យមានចលនាតស៊ូប្រឆាំងអាណានិគមក្នុងការទាមទារឯករាជ្យនៅក្របខ័ណ្ឌតំបន់ និងពិភពលោក។

សម្ដេចតេជោ ក៏បានបង្ហាញនូវការពេញចិត្តចំពោះទំនាក់ទំនងកម្ពុជា និងវៀតណាម ដែលមាននាពេលកន្លងមក និងពេលបច្ចុប្បន្ន ដែលប្រទេសទាំងពីរបានបង្ហាញនូវជំហរទំនាក់ទំនងដ៏រឹងមាំ ទាំងក្របខ័ណ្ឌនីតិប្បញ្ញត្តិ ក្របខ័ណ្ឌនីតិប្រតិបត្តិ និងក្របខ័ណ្ឌគណបក្ស និងគណបក្ស ដែលមានការរីកចម្រើនជាបន្តបន្ទាប់។ នេះបើតាមការឱ្យដឹងពីអ្នកនាំពាក្យប្រធានព្រឹទ្ធសភាលោក ជា ធីរិទ្ធ។

ដោយឡែកបើតាមការចុះផ្សាយរបស់ Vietnamnews វិញក្នុងពេលជួបជាមួយលោក ជិន ថាញ់មិន សម្ដេចតេជោបានចាត់ទុកខួប៨០ឆ្នាំនៃឯករាជ្យវៀតណាមជានិមិត្តរូបមួយដែលមិនមែនសម្រាប់វៀតណាមទេ តែសម្រាប់កម្ពុជា ឡាវ និងពិភពលោកផងដែរនូវការតស៊ូដើម្បីសេរីភាព និងការអភិវឌ្ឍន៍។ ក្នុងនោះសម្ដេចក៏បានថ្លែងអំណរគុណដល់វៀតណាមក្នុងការជួយរំដោះកម្ពុជាពីរបបខ្មែរក្រហមផងដែរ។

លោក ជិន ថាញ់មិន បានអបអរសាទរកម្ពុជាចំពោះសមិទ្ធផលនៃការអភិវឌ្ឍ និងថាសភាវៀតណាម និងប្រជាជនវៀតណាមនឹងបន្តគាំទ្រដល់ការរីកចម្រើនរបស់កម្ពុជា ខណៈប្រទេសទាំងពីរសម្រេចបានគោលដៅពាណិជ្ជកម្ម ១០ពាន់លានដុល្លារក្នុងមួយឆ្នាំ ហើយកំពុងជំរុញសម្រេចគោលដៅឲ្យបាន២០ពាន់លានដុល្លារ ក្នុងពេលខាងមុខ៕