ព័ត៌មានអន្ដរជាតិ

បែលហ្ស៊ិក ប្រកាសទទួលស្គាល់រដ្ឋប៉ាឡេស្ទីននិងដាក់ទណ្ឌកម្មលើអ៊ីស្រាអែល

បានផុស

៨ ខែ មុន

នៅ

ថ្ងៃពុធ ៣ កញ្ញា ២០២៥

ដោយ

ប្រទេសបែលហ្ស៊ិកបានប្រកាសថាខ្លួននឹងទទួលស្គាល់រដ្ឋប៉ាឡេស្ទីននៅឯមហាសន្និបាតអង្គការសហប្រជាជាតិនាពេលខាងមុខ និងដាក់ទណ្ឌកម្មចំនួន ១២ លើអ៊ីស្រាអែល ដោយនឹងបញ្ឈប់ការទិញទំនិញដែលផលិតនៅក្នុងការតាំងទីលំនៅរបស់អ៊ីស្រាអែលខុសច្បាប់ ហើយនឹងកំណត់កិច្ចសន្យារបស់រដ្ឋាភិបាលជាមួយក្រុមហ៊ុនអ៊ីស្រាអែល។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី០៣ខែកញ្ញានេះ។

រដ្ឋមន្ត្រីការបរទេសបែលហ្ស៊ិកលោក Maxime Prevot។ (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីការបរទេសបែលហ្ស៊ិកលោក Maxime Prevot បាននិយាយថា ការផ្លាស់ប្តូរនេះត្រូវបានជំរុញដោយវិបត្តិមនុស្សធម៌កាន់តែអាក្រក់នៅក្នុងតំបន់ហ្គាហ្សា និងការពង្រីកការតាំងទីលំនៅខុសច្បាប់របស់អ៊ីស្រាអែល ដោយហៅស្ថានភាពនេះថា «មិនអាចទទួលយកបានតែម្ដង» ។

អាជ្ញាធរប៉ាឡេស្ទីនបានស្វាគមន៍ការសម្រេចចិត្តនេះ ដោយជំរុញឱ្យប្រទេសផ្សេងទៀតធ្វើតាម។ ទោះយ៉ាងណាក្រុមសិទ្ធិមនុស្សបានរិះគន់លក្ខខណ្ឌរបស់ប្រទេសបែលហ្សិកលើការទទួលស្គាល់ថាបានធ្វើឲ្យឥទ្ធិពលរបស់ខ្លួនចុះខ្សោយ។

កងទ័ពអ៊ីស្រាអែលក្នុងតំបន់ហ្គាហ្សា។ (រូបភាព៖ EPA)

គួរបញ្ជាក់ថាការផ្លាស់ប្តូរនេះកើតឡើងចំពេលមានសន្ទុះកើនឡើងរបស់អឺរ៉ុបសម្រាប់ភាពជារដ្ឋរបស់ប៉ាឡេស្ទីន ជាមួយនឹងប្រទេសបារាំង អារ៉ាប៊ីសាអូឌីត និងប្រទេសផ្សេងទៀតរំពឹងថានឹងជំរុញបញ្ហានេះនៅ មហាសន្និបាតអង្គការសហប្រជាជាតិ នៅចុងខែនេះ។

ស្របពេលដែលទុរ្ភិក្សរីករាលដាលនៅក្នុងតំបន់ហ្គាហ្សា និងសង្រ្គាមរបស់អ៊ីស្រាអែលបានធ្វើឱ្យមនុស្សរាប់ម៉ឺននាក់បានស្លាប់ ការសម្រេចចិត្តរបស់បែលហ្ស៊ិកបានបន្ថែមសម្ពាធលើអ៊ីស្រាអែល ខណៈដែលការបែកបាក់កាន់តែស៊ីជម្រៅជាមួយសហរដ្ឋអាមេរិក ដែលបានថ្កោលទោសការទទួលស្គាល់នេះថាមិនប្រុងប្រយ័ត្ន៕