កីឡា

ខំត្រៀមខ្លួនជាងមួយឆ្នាំ ចុងក្រោយ ក្រុមបាល់ទះយុវជនកម្ពុជា មិនបានទៅប្រកួតកីឡាយុវជនអាស៊ី

បានផុស

៩ ខែ មុន

នៅ

ថ្ងៃពុធ ១០ កញ្ញា ២០២៥

ដោយ

វិញ្ញាសាកីឡាបាល់ទាត់ផ្នែកបុរសអាយុ ១៨ ឆ្នាំ ទាំងបុរស និង U18 ត្រូវបានចាប់ឆ្នោតជ្រើសរើសពូលរួចរាល់ហើយសម្រាប់ព្រឹត្តិការណ៍កីឡាយុវជនទ្វីបអាស៊ី (Asian Youth Games) លើកទី៣ ឆ្នាំ ២០២៥ នៅប្រទេសបារ៉ែន ប៉ុន្តែមិនមានក្រុមបាល់ទះជម្រើសជាតិយុវជនកម្ពុជាឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អាំង សិរីពិសិដ្ឋ អនុប្រធាន និងជាអគ្គលេខាធិការសហព័ន្ធកីឡាបាល់ទះកម្ពុជា ធ្លាប់បានឲ្យដឹងក្នុងបទសម្ភាសកន្លងមកថា សហព័ន្ធកីឡាបាល់ទះកម្ពុជាបានប្រមូលផ្តុំក្រុមបាល់ទះកម្ពុជាអាយុក្រោម ១៨ ឆ្នាំ ហ្វឹកហាត់ត្រៀមខ្លួនប្រមាណ ១ ឆ្នាំមកហើយ ដើម្បីទៅចូលរួមប្រកួតកីឡាយុវជនអាស៊ី លើកទី៣ ឆ្នាំ ២០២៥ នៅប្រទេសបារ៉ែន។

ទោះបីជាយ៉ាងណា កាលពីថ្ងៃទី៨ ខែកញ្ញា ការចាប់ឆ្នោតជ្រើសរើសពូល លើវិញ្ញាសាបាល់ទះបុរស មានចំនួន ១២ ប្រទេសប៉ុណ្ណោះគឺពូល A មាន បារ៉ែន (ម្ចាស់ផ្ទះ) ប៉ាគីស្ថាន ម៉ុងហ្គោលី, ពូល B មាន អ៉ីរ៉ង់ ចិន កាតា, ពូល C មាន កាហ្សាស្ថាន អារ៉ាប៊ីសាអ៊ូឌីត និង ពូល D មាន ឆាយនីសតៃប៉ិ ថៃ និង ឥណ្ឌូណេស៊ី។

សារព័ត៌មានកម្ពុជាថ្មី បានសាកសួររឿងនេះទៅលោក អាំង សិរីពិសិដ្ឋ ជុំវិញរឿងនេះដោយលោកបានលើកឡើងថា គណៈកម្មការរៀបចំការប្រកួតកីឡាយុវជនអាស៊ីបានកំណត់ត្រឹមតែ ១២ ក្រុម ហើយលោកក៏យល់មិនច្បាស់ដែរថាតើ ហេតុអ្វីបានជាគណៈកម្មាធិការជាតិអូឡាំពិកកម្ពុជាដែលរៀបចំដាក់ឈ្មោះទៅ ប៉ុន្តែបែរជាមិនអាចជាប់ក្នុងបញ្ជីចុងក្រោយជាមួយគេ។

លោកបញ្ជាក់ថា ៖«យើងពិតជាសោកស្តាយណាស់ ដែលមិនបានចូលរួម ពីព្រោះយើងត្រៀមខ្លួនជាងមួយឆ្នាំហើយ»។

ការចូលរួមលើកនេះពិតជាចាំបាច់ណាស់ ពីព្រោះ កម្ពុជា ត្រូវទទួលធ្វើម្ចាស់ផ្ទះរៀបចំការប្រកួតកីឡាយុវជនអាស៊ី លើកទី៤ នៅឆ្នាំ ២០២៩។ នៅក្នុងព្រឹត្តិការណ៍ ឆ្នាំ ២០២៥នេះ កម្ពុជា ទទួលទង់កីឡាយុវជនអាស៊ី ដើម្បីមករៀបចំការប្រកួតនៅកម្ពុជា។

ការចូលរួមប្រកួតសម្រាប់ប្រភេទកីឡាផ្សេងៗ គឺពិតជាសំខាន់ណាស់ ដើម្បីផ្តល់ឱកាសឲ្យក្រុមយុវជនបាល់យល់ពីសមត្ថភាពរបស់ក្រុមយុវជននៃបណ្តាប្រទេសអាស៊ីផ្សេងៗ និងដើម្បីត្រៀមខ្លួនឲ្យកាន់តែល្អប្រសើរ មុនពេលឆ្នាំ ២០២៩ មកដល់៕

អត្ថបទ៖ វីរបុត្រ