ពលរដ្ឋស្នើឲ្យអាជ្ញាធរចាត់វិធានការលើទី​តាំង​ការដ្ឋានមួយកន្លែងដែលតែងយកសម្ភារៈមកដាក់លើផ្លូវបង្កការកកស្ទះ

ការដ្ឋានសាងសង់អគារមួយកន្លែងតាមបណ្ដោយផ្លូវលេខ៣៨០ ត្រង់ចំណុចជិតផ្សារបឹងកេងកង កំពុងបង្កការរំខានដល់អ្នកធើ្វដំណើរដោយបានយកសម្ភារៈសំណង់ដាក់លើចំណីផ្លូវ និងពេលខ្លះបង្កមានការកកស្ទះជាច្រើនម៉ោងដោយសារមានឡានបាញ់សុីម៉ងត៍ឈប់នៅលើផ្លូវ។

តាមប្រជាពលរដ្ឋរស់នៅក្បែរនោះបានលើកឡើងថា ទីតាំងខាងលើនេះបានយកសម្ភារៈគ្រឿងសំណង់មកដាក់នៅលើចំណីផ្លូវ ហើយបើថ្ងៃណាមានឡានបាញ់សុីម៉ងត៍មកបាញ់ទៀត គឺផ្លូវនេះសល់តែមួយចំហៀងសម្រាប់ធើ្វដំណើរតែប៉ុណ្ណោះ។ ហើយបើត្រូវដើរមកផ្សារ ត្រូវដើរលើផ្លូវដែលមានឡានម៉ូតូធើ្វដំណើរ ដោយសារចិញ្ចើមផ្លូវត្រូវបានខាងការដ្ឋានយកគ្រឿងសំណង់យកមកដាក់អស់ហើយ។

លោក រ៉ុង ជាប្រជាពលរដ្ឋបានលើកឡើងថា ទីតាំងនេះ បាននិងកំពុងរំលោភយកចំណីផ្លូវសាធារណៈធើ្វជាផលប្រយោជន៍របស់ខ្លួន ហើយបង្កការរំខានដល់ប្រជាពលរដ្ឋធើ្វដំណើរ បង្កការកកស្ទះរាងរាល់ថ្ងៃតែម្តង។ ពួកគាត់សំណូមដល់អាជ្ញាធរមូលដ្ឋានមេត្តាជួយចុះពិនិត្យមើល និងមានវិធានការចំពោះការដ្ឋានដែលយកចំណីផ្លូវសាធារណៈធើ្វជាប្រយោជន៍ខ្លួនមិនគិតពីផលប៉ះពាល់របស់អ្នកដទៃ។

លោក ហេង ពិសិដ្ឋ អភិបាលរងនៃគណៈអភិបាលខណ្ឌបឹងកេងកង បានបញ្ជាក់ប្រាប់ កម្ពុជាថ្មី នារសៀលថ្ងៃទី១០កញ្ញាថា លោកនឹងចាត់អោយមន្រ្តីជំនាញសង្កាត់ចុះទៅពិនិត្យជាបន្ទាន់ និងអប់រំណែនាំ៕

អត្ថបទ៖ ម៉េង