ពណ៌ផ្ទះហុងស៊ុយ​ ស្របតាមទិសទាំង ៨ ជួយទាក់ទាញសំណាងទ្វេដង

ការសាងសង់គេហដ្ឋានថ្មី ឬរៀប​ចំ​គេហដ្ឋាន​តាម​ទិសត្រឹមត្រូវជាមួយពណ៌ហុងស៊ុយ នឹងនាំឱ្យអ្នកផ្ទះជួបតែភាពសុខសប្បាយ ព្រមទាំងនាំភាពចម្រុងចម្រើន​ពេញទាំងគ្រួសារ។ ដូច្នេះពណ៌មួយចំនួនខាងក្រោម គឺជាក្បួនហុងស៊ុយដែលគួរពិចារណា!

ប្រសិនផ្ទះបែរទៅទិសខាងជើង

ផ្ទះបែរទៅទិសខាងជើង ​គេជឿថា អាចជួយឱ្យរកចំណូលដោយបានងាយ ហើយដើម្បីបន្ថែមលាភសំណាង ចូរប្រើពណ៌ខៀវ ឬពណ៌ខៀវចាស់ សម្រាប់លាបជញ្ជាំងគេហដ្ឋាន ​ឬតុបតែងលម្អពណ៌នេះឱ្យបានច្រើនបំផុត។

ប្រសិនផ្ទះបែរទៅទិសឦសាន (ខាងកើតឆៀងខាងជើង)

ដើម្បីឱ្យទីលំនៅប្រកបដោយសិរីសួស្ដី និងសុភមង្គលពេញប្រៀប ចូរបន្ថែមចង្កៀងភ្លើងភ្លឺៗលើការតុបតែង និងជ្រើសរើសពណ៌លឿង ឬទឹកក្រូចសម្រាប់ទាក់ទាញហុងស៊ុយ។

ប្រសិនផ្ទះបែរទៅទិសខាងកើត

ទិសខាងកើតជាទិសសិរីមង្គលជាទីបំផុត វាអាចជួយបន្ថែមថាមពលវិជ្ជមានដល់ម្ចាស់ផ្ទះពោរពេញដោយភាពស្វាហាប់ និងការរីកចម្រើន។ ដូច្នេះចូរប្រើពណ៌បៃតងស្រស់ជាត្រីមុខសម្រាប់ផ្ទះទាំងមូល​ ក៏ដូចជារៀបចំដាំដើមឈើ និងរុក្ខជាតិផ្សេងៗឱ្យបាន។

ប្រសិនផ្ទះបែរទៅទិសអាគ្នេយ៍ (ខាងកើតឆៀងខាងត្បូង)

វាជាទិសនាំនូវភាពផ្សះផ្សា និងមន្តស្នេហ៍ដល់សមាជិកគ្រួសារ។ ហេតុនេះការបំពេញដោយពណ៌បៃតងចាស់ និងពណ៌ខៀវ សម្រាប់ទីលំនៅ ជាហុងស៊ុយល្អបំផុត។

ប្រសិនផ្ទះបែរទៅទិសខាងត្បូង

តាមជំនឿ ទិសខាងត្បូង ជួយលើកកម្ពស់កេរ្តិ៍ឈ្មោះ និងអំណាចមុខមាត់។ ការជ្រើសរើសពណ៌​ផ្កាឈូក ក្រហម ឬពណ៌​ស្វាយ​ ​សម្រាប់លាបផ្ទះ ឬលម្អផ្សេងៗ​ អាចជួយបង្កើនហុងស៊ុយទ្វេដងដល់ម្ចាស់លំនៅ។

ប្រសិនផ្ទះបែរទៅទិសនិរតី​ (ខាងត្បូងឆៀងខាងលិច)

ទិសនេះ ត្រូវគេចាត់ទុកថាអាចជួយពង្រឹងទំនាក់ទំនងគ្រួសារឱ្យកាន់តែស្អិតរមួត ព្រមទាំងបន្ថយភាពអពមង្គលបានផងដែរ។ ​ប្រសិនម្ចាស់គេហដ្ឋានប្រើពណ៌លឿង ទឹកក្រូច ត្នោត ឬខ្មៅ នឹងជួយផ្តល់ថាមពលវិជ្ជមានខ្លាំងឡើង។

ប្រសិនផ្ទះបែរទៅទិសខាងលិច

កន្លងមកទិសខាងលិច ត្រូវគេនិយាយតៗគ្នាថា ជាទិសចង្រៃ នាំភាពស៊យដល់ម្ចាស់ផ្ទះ ប៉ុន្តែការពិត វាជាទិសនាំហុងស៊ុយហិរញ្ញវត្ថុយ៉ាងល្អបំផុត។ ហេតុនេះលាប ឬប្រើពណ៌ប្រាក់ ឬមាស ឱ្យរឹតតែលេចធ្លោបន្ថែមទៀត។

ប្រសិនផ្ទះបែរទៅទិសពាយព្យ (ខាងលិចឆៀងខាងជើង)

វាជាទិសនាំសំណាងខាងសុខភាព​​ និងភាពសុខសប្បាយ គ្មានជំងឺតម្កាត់។ ដូច្នោះចូរប្រើពណ៌លឿង ឬពណ៌ទឹកក្រូចភ្លឺ ដើម្បីបង្កើនហុងស៊ុយឱ្យកាន់តែល្អឡើង៕

អត្ថបទ៖ សន្យា

ចុចអាន៖ ហុងស៊ុយតុបតែងគេហដ្ឋាន និងការិយាល័យតាមទិសទាំង៤ ឱ្យលាភសំណាងហូរចូល

ចុចអាន៖ ពណ៌សម្រាប់លាបគេហដ្ឋានឬការិយាល័យ ក៏ជាហុងស៊ុយ​ជួយ​លើករាសី​ដល់ម្ចាស់ដែរ