សេដ្ឋកិច្ច

ទំហំពាណិជ្ជកម្មកម្ពុជា-ថៃ សម្រេចបានជាង ៣,៤ ពាន់លានដុល្លារ ធ្លាក់ចុះជិត ១៣%

បានផុស

៧ ខែ មុន

នៅ

ថ្ងៃពុធ ១០ ធ្នូ ២០២៥

ដោយ

ការដោះដូរទំនិញកម្ពុជា-ថៃ សម្រេចបាននូវទំហំទឹកប្រាក់ជាង ៣,៤ ពាន់លានដុល្លារ នៅក្នុងរយៈពេល ១១ ខែ ឆ្នាំ ២០២៥ ធ្លាក់ចុះ ជិត ១៣% ប្រៀបធៀបនឹងរយៈពេលដូចគ្នានៅឆ្នាំ ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា (GDCE) ចេញផ្សាយនៅថ្ងៃទី ១០ ខែធ្នូ ឆ្នាំ ២០២៥បង្ហាញថា គិតចាប់ពីខែមករា ដល់ខែ វិច្ឆិកា ឆ្នាំ ២០២៥ ការនាំចេញ-នាំចូលទំនិញរបស់កម្ពុជា-ថៃ មានទំហំទឹកប្រាក់ ៣,៤ ពាន់លានដុល្លារ ក្នុងនោះកម្ពុជានាំចេញទៅថៃមានតម្លៃប្រមាណ ៦៨០ លានដុល្លារ ធ្លាក់ចុះ ១៣,៨% ចំណែកថៃនាំចូលមកវិញមានតម្លៃ ២,៧៣ ពាន់លានដុល្លារ ធ្លាក់ចុះ ១២,៧%។

លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្ម ប្រាប់កម្ពុជាថ្មីថា បន្ទាប់ពីបិទព្រំដែនគោក ក្រៅពីទំនិញដែលកម្ពុជាហាមឃាត់ ដែលមានបន្លែ ផ្លែឈើ អគ្គិសនី ប្រេង និងឧស្ម័ន ពាណិជ្ជកម្មរវាងកម្ពុជា និងថៃ នៅដំណើរការធម្មតា ពោលគឺភាគីថៃបានបង្វែរទិសនាំទំនិញចូលមកតាមផ្លូវទឹក (ច្រកសមុទ្រ) និងឆ្លងតាមច្រកព្រំដែនប្រទេសឡាវ។

នៅក្នុងឆ្នាំ ២០២៤ ពាណិជ្ជកម្មទ្វេភាគីកម្ពុជា-ថៃ សម្រេចបានជាង ៤,២៨ ពាន់លានដុល្លារ កើនឡើង ១៥,៥% ក្នុងនោះកម្ពុជានាំចេញទៅថៃបានជិត ៨៤៥ លានដុល្លារ ចំណែកថៃនាំចូលមកវិញ ៣,៤៤ ពាន់លានដុល្លារ កើន ១៨,៩ ភាគរយ៕

អត្ថបទ៖ ឡេង ដេត