ក្រុមហ៊ុនអាកាសចរណ៍ Turkish Airline បើកជើង​ហោះហើរដំបូងមកកម្ពុជា ដឹកមនុស្សជាង ១០០ នាក់

ក្រុមហ៊ុន​អាកាសចរណ៍តួកគី Turkish Airline ចាប់ផ្ដើមបើកដំណើរការចាប់ផ្តើមបើកការហោះហើរត្រង់ពីទីក្រុង Istanbul នៃសាធារណរដ្ឋតួកគី មកកាន់អាកាសយានដ្ឋានអន្តរជាតិតេជោ នៅថ្ងៃទី ១១ ខែធ្នូ ឆ្នាំ២០២៥ ដោយបានចុះចតនៅវេលាម៉ោង ២:៣៥​ ដើម្បីពង្រឹងទំនាក់ទំនងទេសចរណ៍ ធុរកិច្ច និងវិនិយោគ។

ជើងហោះហើរត្រង់ដំបូងពីទីក្រុង Istanbul នៃសាធារណរដ្ឋតួកគីយ៉េ មកកាន់អាកាសយានដ្ឋានអន្តរជាតិ តេជោ​មានអ្នកដំណើរសរុបចំនួន ១០៩ នាក់ (៨៤ Economic និង ២៥ Business class) និងពីអាកាសយានដ្ឋានអន្តរជាតិតេជោ ត្រលប់ទៅទីក្រុង Istanbul វិញមានចំនួនសរុប ៨៥ នាក់ (៧៧ Economic និង ៨ Business class)​។

ជើងហោះហើរនេះនឹងប្រតិបត្តិការហោះដោយយន្តហោះ B777-300ER ជាមួយនឹងកាលវិភាគចំនួន ៣ ជើង ក្នុង​១សប្តាហ៍ ពោលគឺ ថ្ងៃពុធ សុក្រ និងសៅរ៍។

លោក ស៊ីន ចាន់សិរីវុត្ថា រដ្ឋលេខាធិការ និង​ជាអ្នកនាំពាក្យ នៃរដ្ឋលេខាធិការ​ដ្ឋានអាកាសចរណ៍​ស៊ីវិល មានប្រសាស​ន៍​ថា ជើងហោះហើរថ្មីនេះ ជាសម្គាល់នៃការពង្រឹងចំណងមិត្តភាព និងកិច្ចសហការកាន់តែជ្រាលជ្រៅរវាងរាជរដ្ឋា-
ភិបាល នៃប្រទេសទាំងពីរ។

លោក ស៊ីន ចាន់សិរីវុត្ថា បញ្ជាក់ថា៖ «ការតភ្ជាប់ជើងហោះហើរកាន់តែប្រសើរ ជម្រើសទេសចរណ៍កាន់តែច្រើន ការប្រែប្រួលពាណិជ្ជកម្មកើនឡើង និងការពង្រឹងវត្តមានរបស់កម្ពុជា ក្នុងបណ្តាញអាកាសចរណ៍អន្តរជាតិកាន់តែទូលាយ»។

ក្រុមហ៊ុន Turkish Airlines មានគោលដៅហោះហើរដល់ជាង ៣៥០ កន្លែង ដល់ប្រទេសចំនួន ១៣០ប្រទេសជុំវិញពិភពលោក ហើយកម្ពុជាជាគោលដៅប្រទេសទី៧ នៅតំបន់អាស៊ីអាគ្នេយ៍ (អាស៊ាន) និងជាគោលដៅទី១១ នៅក្នុងតំបន់អាស៊ី ដែលក្រុមហ៊ុនបានបើកប្រតិបត្តិការភ្ជាប់ការហោះហើរជាមួយក្រុមហ៊ុន Turkish Airlines នឹងក្លាយជាក្រុមហ៊ុនអាកាសចរណ៍ទី ៣៦, ជាប្រទេសទី ១៧ និងទីក្រុងទី ៤៦ ដែលធ្វើប្រតិបត្តិការចូល-ចេញកម្ពុជា។

យោងតាមអាកាសចរស៊ីវិល កម្ពុជា​ទទួល​បាន​អ្នកដំណើរចេញ-ចូល តាមផ្លូវអាកាសជាង ៥ លាន​នាក់​ នៅក្នុង​រយៈ​ពេល ១០ ខែ ឆ្នាំ ២០២៥ កើនឡើង ១៤% ធៀបនឹងរយៈ​ពេល​ដូចគ្នា​នៅឆ្នាំ ២០២៤៕