សេដ្ឋកិច្ច

ការនាំចូលរថយន្តមានទំហំជាង ១១៧ លានដុល្លារ កើនឡើងខ្ពស់

បានផុស

៥ ខែ មុន

នៅ

ថ្ងៃចន្ទ ២៣ កុម្ភៈ ២០២៦

ដោយ

កម្ពុជានាំចូលរថយន្តមានទំហំទឹកប្រាក់ ១១៧ លានដុល្លារ នៅក្នុងខែមករា ឆ្នាំ ២០២៦ កើនឡើង ៦៨,៨៩% ប្រៀបធៀបនឹងរយៈពេលដូចគ្នាកាលពីឆ្នាំមុន ឆ្លុះបញ្ចាំងពីតម្រូវការប្រើប្រាស់របស់ប្រជាពលក្នុងស្រុក។ នេះបើយោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា(GDCE)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ងន សាំង អគ្គនាយកក្រុមហ៊ុន អ អិម អេ ខេមបូឌា (RMA Cambodia) មានប្រសាសន៍ថា ទីផ្សាររថយន្តនៅកម្ពុជា បន្តមានកំណើនពីមួយឆ្នាំទៅមួយឆ្នាំ ដោយសារប្រជាជនកម្ពុជាសម្បូរដោយមនុស្សវ័យក្មេង ជាពេលដែលពួកគាត់មានតម្រូវការរថយន្ត។

លោកបញ្ជាក់ថា៖ «ស្ថានភាពសេដ្ឋកិច្ចកម្ពុជា មានភាពល្អប្រសើរជាងមុន មនុស្សម្នាក់ៗ មានការងារធ្វើ ដែលនាំឱ្យពួកគាត់មានប្រាក់ចំណូលច្រើនជាងមុន ផ្ដល់លទ្ធភាពឱ្យគាត់ទិញរថយន្ត»។

ការប្រមូលចំណូលពន្ធគយកម្ពុជា កាលពីឆ្នាំ ២០២៥ កើនឡើង ២១% បានមកពីចំណែកនៃកំណើននាំចូលរថយន្ត និងគ្រឿងចក្រ។

លោក គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានប្រាប់ឱ្យដឹងថា ការប្រមូលចំណូលពន្ធពីការនាំចូលយានយន្ត និងគ្រឿងចក្រ មានរហូតដល់ ៤៤% ដែលជាប្រភពចំណូលសំខាន់បំផុត។

លោក គុណ ញឹម បញ្ជាក់ថា៖ «ចំណូលពន្ធគយដែលបានកើនឡើង ដោយសារកំណើននៃការនាំចូលរថយន្ត កើន ៦១% ដែលមានចំនួនប្រមាណ ៨ ម៉ឺន ៣ ពាន់គ្រឿង»។