Connect with us

សេដ្ឋកិច្ច

ខេត្តតាកែវនាំចេញស្រូវទៅវៀតណាមជាង ១ លានតោន កើនជាង ៨០០%

បានផុស

នៅ

ខេត្តតាកែវបាននាំចេញស្រូវទៅកាន់ប្រទេសវៀតណាមបានជាង ១ លានតោន ក្នុងឆ្នាំ ២០២១ ដែលចំនួននេះមានការកើនឡើង ជាង ៨០០ ភាគរយ ខណៈឆ្នាំ២០២០ បាននាំចេញតែជាង ១៦ ម៉ឺនតោន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះបើតាមការបញ្ជាក់របស់លោក លី សាវេត អភិបាលរងខេត្តតាកែវ នៅព្រឹកថ្ងៃទី ២១ ខែមករា ឆ្នាំ២០២២ ក្នុងសន្និសីទសារព័ត៌មានស្តីពី “វឌ្ឍនភាពមូលដ្ឋានឃុំ សង្កាត់ និងទិសដៅការងារបន្តរបស់រដ្ឋបាលខេត្តតាកែវ” ដែលរៀបចំដោយអង្គភាពអ្នកនាំពាក្យរាជរដ្ឋាភិបាល នៅទីស្តីការគណៈរដ្ឋមន្ត្រី។

លោក លី សាវេត បានថ្លែងថា ការនាំចេញស្រូវមានការកើនឡើង ដោយសាររដ្ឋបាលខេត្តមានទំនាក់ទំនងល្អជាមួយភាគីវៀតណាម ខណៈខេត្តតាកែវជាខេត្តមានព្រំដែនជាប់ប្រទេសវៀតណាម ហើយជាច្រកចេញ-ចូលសំខាន់របស់កម្ពុជា។

លោក ញិប ស្រ៊ន ប្រធានមន្ទីរកសិកម្ម រុក្ខាប្រមាញ់ និងនេសាទខេត្តតាកែវ មានប្រសាសន៍ថា ការនាំស្រូវយកទៅលក់នៅប្រទេសវៀតណាមដោយឆ្លងកាត់ច្រកព្រំដែនចំនួន ៣ របស់ខេត្តតាកែវ។ គិតចាប់ពីខែថ្ងៃទី ១ ខែមករា ២០២១ រហូតដល់ដើមខែមករា ​ឆ្នាំ ២០២២ នេះ ស្រូវចំនួន ១,១៧ លានតោនបានដឹកឆ្លងច្រកព្រំដែនចំនួន ៣ របស់ខេត្តតាកែវគឺ ច្រកបាក់ដៃ នៅក្នុងស្រុកអង្គបូរី, ច្រកកំពង់ក្រសាំង នៅស្រុកបូរីជលសារ និងច្រកព្រំដែនអន្តរជាតិភ្នំដិនរបស់ ស្រុកគីរីវង់ ទៅលក់នៅប្រទេសវៀតណាម​ ហើយភាគច្រើនជាប្រភេទស្រូវអ៊ីអ៊ែដោយលក់ក្នុងតម្លៃ ១ តោន​បានជាង ៨០ ម៉ឺនរៀល។

​បើប្រៀបធៀប​ឆ្នាំ ២០២០ កន្លងមក ការនាំស្រូវ​យក​ទៅលក់នៅ​ប្រទេសវៀតណាម​ក្នុងឆ្នាំ ២០២១ នេះ ​មាន​ការកើន​ឡើង​ប្រមាណជាង ៨០០ ភាគរយ ពោលកាលពីឆ្នាំ ២០២០ កន្លងមក ​ការ​នាំស្រូវ​យក​ទៅ​លក់នៅ​ប្រទេស​វៀតណាមដោយឆ្លងកាត់ខេត្តតាកែវ​គឺមានចំនួនជិត ២ សែន​តោន​តែប៉ុណ្ណោះ។ មូលហេតុ ដែលការនាំស្រូវចេញទៅលក់នៅប្រទេសវៀតណាម​ក្នុង​ឆ្នាំ ២០២១ កើនឡើងខ្លាំង ដោយសារច្រកព្រំដែន​បាន​បើកដំណើរការឡើងវិញ​ក្រោយពី​ស្ថានភាពការឆ្លងរីករាលដាលជំងឺកូវីដ-១៩ បានធូរស្រាល។

បើតាមលោកអភិបាលរងខេត្តបានឱ្យដឹងថា ការងារបង្កបង្កើនផលស្រូវរដូវប្រាំងឆ្នាំ ២០២០-២០២១ របស់ខេត្តតាកែវ សម្រាប់គណនាតុល្យភាពស្បៀងឆ្នាំ ២០២២ ផ្ទៃដីអនុវត្តបានមានចំនួន ១០៧ ៣៧៧ ហិកតា ស្មើនឹង ១៣៤,២២% លើផែនការ ៨ ម៉ឺនហិកតា, ផ្ទៃដីប្រមូលផលសរុប ១០៧ ៣៧៧ ហិកតា ស្មើនឹង ១០០% ដោយទិន្នផលមធ្យម ៥,០០៥ តោន/ហត, បរិមាណផលសរុបចំនួន ៥៣៧ ៣៨៥ តោន និងដំណាំរួមផ្សំដាំបាន ៤ ១៣៣ ហិកតា។ ស្រូវរបស់ខេត្តតាកែវក៏បាន​នាំ​យកមកលក់តាមបណ្ដាល​ខេត្តមួយចំនួន​របស់​ប្រទេសកម្ពុជា ​ជាពិសេសខេត្តកំពង់ស្ពឺ ​កណ្ដាល ពោធិ៍សាត់ និងខេត្តកំពង់ឆ្នាំង​ជាដើម៕

អត្ថបទ៖ ណារី

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

ព័ត៌មានជាតិ៧ នាទី មុន

មាន​ប្រជាពលរដ្ឋ​នៅ​ទ្វីបអឺរ៉ុប​ប្រមាណ​១៧០០​នាក់​កំពុង​រង់ចាំ​ទទួល​សម្ដេច​តេ​ជោ ហ៊ុន សែន នៅ​ប្រទេស​ស្វី​ស

វប្បធម៌ ជំនឿ២៦ នាទី មុន

យល់សប្តិឃើញឪពុកស្លាប់ មានន័យយ៉ាងណា?

ព័ត៌មានជាតិ៤៥ នាទី មុន

សម្តេច​តេ​ជោ ហ៊ុន សែន ៖ ការ​ចាក់​វាក់​សាំង​ដូ​ស​ជំរុញ​ទី​៥ នឹង​ចាប់ផ្ដើម​ពីថ្ងៃ​ទី​០៩ ខែមិថុនា តទៅ

ព័ត៌មានជាតិ២ ម៉ោង មុន

ឧ​ត្ត​ម​សេនីយ៍ ឆាយ គឹម​ខឿន​ ៖ កម្លាំង​ត្រៀម​រួចរាល់​ហើយ សម្រាប់​រៀបចំ​សណ្ដាប់ធ្នាប់ និង​ការជួបជុំ​ធ្វើ​មិ​ទ្ទិញ​ផ្សេងៗ នៅពេល​យុទ្ធនា​ការឃោសនា

ព័ត៌មានជាតិ២ ម៉ោង មុន

លោក ឃួង ស្រេង ៖ ពលរដ្ឋ​ក្រីក្រ ជួប​ការ​លំបាក អត់​ស្បៀងអាហារ​ ទាក់ទង​ទៅ​ស្នាក់​ការ​សង្កាត់ ខណ្ឌ គឺ​មិន​ទុក​ឲ្យ​ពលរដ្ឋ​ណា​ម្នាក់​ស្លាប់​ដោយ​ការ​អត់បាយ​នោះទេ

Sokha Hotels

ព័ត៌មានពេញនិយម