សេដ្ឋកិច្ច
លោក ប៉ែន សុវិជាតិ៖ រដ្ឋាភិបាលឧបត្ថម្ភធនបន្ថែមជួយពលរដ្ឋទប់ទល់ការកើនឡើងតម្លៃសាំង
រាជរដ្ឋាភិបាលកម្ពុជា បានឧបត្ថម្ភធនបន្ថែមទៀតទៅលើតម្លៃប្រេងសាំង ដើម្បីរួមចំណែកជួយកាត់បន្ថយការចំណាយរបស់ពលរដ្ឋ ក្នុងកាលៈទេសៈ ដែលតម្លៃប្រេងសាំងឡើងថ្លៃជាបន្តបន្ទាប់នេះ។ នេះបើតាមការបញ្ជាក់របស់លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្ម។
លោក ប៉ែន សុវិជាតិ បានប្រាប់កម្ពុជាថ្មីថា « បច្ចុប្បន្ននេះរាជរដ្ឋាភិបាលបានឧបត្ថម្ភធនបន្ថែមទៀត ពីមុនយើងឧបត្ថម្ភធនតែ ០៤សេនដុល្លារក្នុងមួយលីត្រទេ តែឥឡូវនេះយើងឧបត្ថម្ភធន ០៦.៥ដុល្លារ ក្នុងមួយលីត្រហើយ»។
អ្នកនាំពាក្យក្រសួងពាណិជ្ជកម្មបន្តថា រាជរដ្ឋាភិបាល បានកាត់បន្ថយ និងកែសម្រួលនូវអត្រាពន្ធអាករពិសេសមួយចំនួន ដើម្បីចូលរួមចំណែកធ្វើឱ្យតម្លៃសាំងមានការធ្លាក់ចុះបន្តិច។
លោកបន្ថែមថា នៅកម្ពុជា មិនទាន់មានវិបត្តិខ្វះប្រេងក្នុងការប្រើប្រាស់ដូចប្រទេសដទៃ ដោយសារការប្រឹងប្រែងរបស់រាជរដ្ឋាភិបាល ក្នុងការរក្សាឱ្យមានប្រេងនៅក្នុងស្តុក គ្រប់គ្រាន់សម្រាប់ការប្រើប្រាស់។ លោក ប៉ែន សុវិជាតិ សង្កត់ធ្ងន់ថា« ប្រទេសកម្ពុជាយើង ខិតខំរក្សានូវសន្និធិស្តុកប្រេងឥន្ធនៈសម្រាប់ឱ្យប្រជាពលរដ្ឋប្រើប្រាស់ ដោយសហការជាមួយវិស័យឯកជន ធ្វើយ៉ាងណាមិនឱ្យខ្វះខាតប្រេង ដែលធ្វើឱ្យមានការតម្រង់ជួរទិញដូចនៅប្រទេសឡាវទេ ព្រោះវិស័យឯកជនក៏បានប្តេជ្ញាចិត្ត សហការជាមួយក្រសួងពាណិជ្ជកម្ម ត្រួតពិនិត្យយ៉ាងម៉ត់ចត់លើបញ្ហានេះ ដូច្នេះយើងនៅតែមានប្រេងលក់ទោះជាតម្លៃថ្លៃបន្តិចក៏ដោយ»។
ចំពោះការឡើងថ្លៃប្រេង អ្នកនាំពាក្យរូបនេះ បានគូសបញ្ជាក់ថា កម្ពុជា មិនអាចគ្រប់គ្រងតម្លៃបានទេ ដោយសារយោងតាមតម្លៃទីផ្សារអន្តរជាតិ។ ប៉ុន្តែរាជរដ្ឋាភិបាលកម្ពុជា កំពុងប្រឹងប្រែងទប់ទល់ ធ្វើយ៉ាងណាកុំឱ្យឡើងដល់ ៦,០០០រៀល ក្នុងមួយលីត្រ។ តែក៏មិនធានាដែរ ដោយសារកម្ពុជា មិនមែនជាប្រទេសផលិតប្រេង គឺយើងនាំចូលប្រេងពីបរទេស។
បើតាមលោក ប៉ែន សុវិជាតិ មិនថាតែកម្ពុជាទេ ដែលរងផលប៉ះពាល់កើនឡើងតម្លៃសាំងដោយសារឥទ្ធិពលសង្រ្គាមរុស្ស៊ី-អ៊ុយក្រែន ពោលគឺប្រទេសផ្សេងទៀត ក៏រងផលប៉ះពាល់ដូចគ្នា។
ទោះយ៉ាងណាលោក បានណែនាំដល់ពលរដ្ឋឱ្យប្រើប្រាស់ប្រេងដោយសន្សំសំចៃ ដូចជាត្រូវដឹងថា ពេលវេលាណាដែលត្រូវធ្វើដំណើរ មិនកកស្ទះចរាចរណ៍ នាំឱ្យប្រើប្រាស់ប្រេងអស់ច្រើន និងចម្ងាយណាដែលមិនចាំបាច់ប្រើប្រាស់យានយន្ត ដើម្បីជាការរួមចំណែកកាត់បន្ថយការចំណាយ និងសន្សំប្រេងទុកប្រើក្នុងសង្វាក់ផលិតកម្មដែលចាំបាច់នានា។
សូមបញ្ជាក់ថា ក្រសួងពាណិជ្ជកម្ម បានប្រកាសកាលពីម្សិលមិញថា តម្លៃប្រេងសាំងធម្មតា ក្នុង១លីត្រ ថ្លៃ ៥,៦៥០រៀល និងប្រេងម៉ាស៊ូតតម្លៃ ៥,៥៥០រៀល ដោយតម្លៃនេះ ចាប់ផ្តើមអនុវត្តពីថ្ងៃទី ០១-១០ ខែមិថុនា ឆ្នាំ ២០២២។
យោងតាមការប្រកាសថ្មីនេះ មានន័យថា ប្រេងសាំងធម្មតាកើនឡើងតម្លៃ ៥០រៀល និងម៉ាស៊ូត ឡើងថ្លៃ ១៥០រៀល បន្ថែមពីលើតម្លៃចាស់។
ក្រសួងពាណិជ្ជកម្ម បានសម្រេចអនុវត្តគោលការណ៍ប្រកាសតម្លៃប្រេងសាំង រាល់១០ ថ្ងៃម្តង ដើម្បីសម្រួលដល់ភាគីពាក់ព័ន្ធ អំពីការឡើងចុះរហ័សនៃតម្លៃប្រេងឥន្ធនៈនេះ៕ ទួន សុផល
-
ព័ត៌មានជាតិ៥ ថ្ងៃ ago
អ្នកឧកញ៉ា គួច ម៉េងលី÷ បើមិននាំខ្លួនមេខ្លោងក្រុមហ៊ុន CIC Plc មកផ្ដន្ទាទោសទេ ពលរដ្ឋនឹងលែងជឿប្រព័ន្ធយុត្តិធម៌កម្ពុជា
-
ព័ត៌មានជាតិ៣ ថ្ងៃ ago
ទ្រព្យសកម្មរបស់ក្រុមហ៊ុន CIC Plc ប្រមាណ ៩០% នៃចំនួនទឹកប្រាក់សរុប ត្រូវបានប្រមូលមកវិញ
-
ព័ត៌មានជាតិ៣ ថ្ងៃ ago
បណ្ឌិត គិន ភា៖ «ហេតុអីមិនបន្ទោសអ្នកបោកគេ បែរជាបន្ទោសអ្នកត្រូវគេបោកទៅវិញ?»
-
ព័ត៌មានជាតិ៤ ថ្ងៃ ago
កម្ពុជានឹងមានភ្លៀងធ្លាក់ ១៥% ដល់ថ្ងៃទី ២៧ ដំណាច់ខែមីនា
-
ជីវិតកម្សាន្ដ១ សប្តាហ៍ ago
ខេមរៈ សិរីមន្ត ៖ «ទោះខ្ញុំមិនមែនជាអ្នកធំ តែសុំធ្វើកិច្ចការធំខ្លះជូនជាតិតាមវិជ្ជាជីវៈសិល្បៈ បង្ហាញទៅពិភពលោក»
-
សេដ្ឋកិច្ច៥ ថ្ងៃ ago
មន្ត្រីជាន់ខ្ពស់ធនាគារជាតិ៖ ក្រដាសប្រាក់ ៥ម៉ឺន រៀល មានគូសឆ្នូតកណ្តាលអាចប្តូរយកប្រាក់ថ្មីបានដោយឥតគិតថ្លៃ
-
ព័ត៌មានជាតិ៤ ថ្ងៃ ago
ដីជាង ៤៣ ហិកតា នៅភូមិសាស្ត្រភ្នំ ១៥០០ ត្រៀមដាំស្ដារព្រៃឈើឡើងវិញ
-
សន្តិសុខសង្គម៤ ថ្ងៃ ago
បឋម៖ អគ្គិភ័យកំពុងឆេះផ្ទះពលរដ្ឋក្នុងបុរីពិភពថ្មីកំបូល