Connect with us

សេដ្ឋកិច្ច

លោក ង៉ែត ជូ៖ ប្រាក់ខែ ៥០០ដុល្លារ មិនគួរបង់រំលស់ផ្ទះឬដី គួរសន្សំសិន​ដើម្បីវិនិយោគ

បានផុស

នៅ

បច្ចុប្បន្ន គេសង្កេតឃើញថា យុវជនខ្មែរដែលកំពុងបម្រើការងារនៅតាមអង្គភាពនានា ភាគច្រើន មានចំណូល ឬប្រាក់ខែជាមធ្យមចន្លោះពី ៤០០-៥០០ដុល្លារ ក្នុងមួយខែ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកជំនាញហិរញ្ញវត្ថុ បានណែនាំថា បើមានប្រាក់ខែ ៥០០ដុល្លារ មិនគួរសម្រេចចិត្តបង់រំលស់ផ្ទះ ឬដីនោះទេ ព្រោះពុំសូវទទួលបានផលល្អប្រសើរឡើយ។

លោក ង៉ែត ជូ អ្នកវិភាគសេដ្ឋកិច្ច និងជាអ្នកជំនាញហិរញ្ញវត្ថុ បានលើកឡើងថា ជាគោលការណ៍ដីនៅមានតម្រូវ​ការច្រើន ចំណែកផ្ទះតម្រូវការធ្លាក់ចុះខ្លាំង បើចង់វិនិយោគផ្ទះ ដើម្បីប្រាក់ចំណេញ គឺមិនចំណេញទេ ឬអាចខាតក៏មាន។

លោក ង៉ែត ជូន បានបន្តថា ចំពោះអ្នកមានប្រាក់ខែ ៥០០ ដុល្លារ រស់នៅទីក្រុង មានការចំណាយច្រើន ដូចជា ការជួលផ្ទះស្នាក់នៅ ការហូបចុក ការធ្វើដំណើរ ដូច្នេះមិនគួរបង់រំលស់ផ្ទះ ឬដីទេ គួរតែខំធ្វើការសន្សំលុយឱ្យសល់​បានច្រើនបន្តិចសិន ឬរៀនខ្ចីធនាគារយកមកវិនិយោគលើដីធ្លីប្រសើរជាង។ វិនិយោគ គឺមិនសំដៅដល់ការទិញ​ដីឡូតិ៍បង់រំ​លស់ទេ គឺគួរទិញដីស្រែ ដីភូមិ ដែលមិនឆ្ងាយពីទីក្រុងពេកដើម្បីធ្វើការវិនិយោគ។

អ្នកជំនាញរូបនេះ បានបន្ថែមដូច្នេះថា «ការទិញដីពុះឡូតិ៍តូចៗ និងទិញផ្ទះ មិនសូវចំណេញទេ អាចខាតទៀតផង ទៅថ្ងៃអនាគត អាចនឹងមិនមានទីផ្សារ ដោយសារការផ្គត់ផ្គង់បុរីមានច្រើនពេក ខណៈដែលបច្ចុប្បន្ន​ដីឡូតិ៍តូចៗ​គាំងហើយ»។

លោក ង៉ែត ជូ បានផ្តល់ជាយោបល់ថា ជម្រើសនៃការវិនិយោគសម្រាប់អ្នកមានចំណូល ៥០០ដុល្លារ គួរតែសន្សំប្រាក់​ឱ្យបាន ១០០០-ទៅ ២០០០ដុល្លារ យកទៅវិនិយោគជាមួយក្រុមហ៊ុន មានវិជ្ជាជីវៈ និងចុះបញ្ជីត្រឹមត្រូវ ដែលគេកៀរគរ​ទុនតិចតួច សម្រាប់គម្រោងវិនិយោគ តែក៏ត្រូវមើលទៅលើសមាសភាពថ្នាក់ដឹកនាំ ថាតើមានសមត្ថភាព ឬអត់ ដើម្បីជៀសវាងការខាតបង់ដោយប្រការណាមួយ។

បើតាមលោក ង៉ែត ជូន ពុំមានការវិនិយោគណា ដែលល្អឥតខ្ចោះនោះទេ អាស្រ័យលើសមត្ថភាពរបស់បុគ្គលម្នាក់ៗ និងចំណង់ចំណូលចិត្ត។ លោកបានលើកពីទិដ្ឋភាពជាក់ស្តែងថា អ្នកខ្លះក៏ចូលហ៊ុនរកស៊ីជាមួយមិត្តភ័ក្តិបង្កើត​អាជីវកម្មថ្មីៗ ជាដើម។ តែអ្នកជំនាញរូបនេះ បានក្រើនរំលឹកថា អ្នកដែលមិនសូវមានបទពិសោធន៍ មិនគួរបង្កើតអាជីវ​កម្មថ្មីនោះទេ ព្រោះអាចមានហានិភ័យខ្ពស់ និងក្ស័យធន ជាដើម។

ដើម្បីសុវត្ថិភាពគួរតែវិនិយោគជាមួយក្រុមហ៊ុន ដែលគ្រប់គ្រងមូលនិធិវិនិយោគ ជាថ្នាលវិនិយោគមានវិជ្ជាជីវៈ មានអ្នកដឹកនាំ ក្រុមប្រឹក្សាភិបាល អាចជួយកាត់បន្ថយហានិភ័យ នៃការក្ស័យធន។ កាលណាយើងមានទុនតិច គឺត្រូវផ្តោតទៅលើការវិនិយោគ ដើម្បីរៀនសូត្រ មិនអាចវិនិយោគ ដើម្បីចំណេញក្លាយជាអ្នកមានបាននោះទេ។ នេះជាការបន្ថែមរបស់លោក ង៉ែត ជូ៕

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម