ចិន បន្ថែមលុយ ១០០ ពាន់លានដុល្លារចូលទៅក្នុងគម្រោងខ្សែក្រវាត់ និងផ្លូវ

ប្រធានាធិបតីចិនលោក ស៊ី ជីនពីង បានប្រកាសកាលពីថ្ងៃពុធថា នឹងបន្ថែមលុយជាង ១០០ ពាន់លានដុល្លារទៀតសម្រាប់គំនិតផ្តួចផ្តើមខ្សែក្រវាត់ និងផ្លូវ (BRI) ដើម្បីជំរុញសន្ទុះនៃកំណើនសេដ្ឋកិច្ចពិភពលោក ។

លោក ស៊ី បាននិយាយថា ធនាគារអភិវឌ្ឍន៍ចិន និងធនាគារនាំចេញ-នាំចូល នឹងបង្កើតឱកាសហិរញ្ញប្បទានចំនួន ៤៨ ពាន់លានដុល្លារ សម្រាប់គម្រោង BRI ខណៈទឹកប្រាក់ចំនួន ១០ ពាន់លានដុល្លារ នឹងត្រូវបន្ថែមចូលទៅក្នុងមូលនិធិផ្លូវសូត្រ ។

ស្របពេលជាមួយគ្នានេះ គំនិតផ្ដួចផ្ដើមខ្សែក្រវាត់ និងផ្លូវ (BRI) ដែលជាយុទ្ធសាស្ត្រដ៏សំខាន់សម្រាប់ពិភពលោករបស់ប្រទេសចិន បានធានាកិច្ចសន្យាដែលមានតម្លៃជាង ២ ពាន់ពាន់លានដុល្លារនៅទូទាំងពិភពលោករួចហើយ ។

ទន្ទឹមនោះ គំនិតផ្តួចផ្តើមនេះបានដើរតួយ៉ាងសំខាន់ក្នុងការជំរុញកំណើនសេដ្ឋកិច្ចសកលលោក ទោះបីជាវាបានបណ្ដាលឲ្យប្រទេសក្រីក្រមួយចំនួនប្រឈមនឹងបំណុលដ៏ច្រើនសន្ធឹកសន្ធាប់ក៏ដោយ ។

គួរបញ្ជាក់ថា ចិនបាននិងកំពុងរៀបចំវេទិកាខ្សែក្រវាត់ និងផ្លូវលើកទី ៣ ស្ដីពីកិច្ចសហប្រតិបត្តិការអន្តរជាតិ ដោយមានការចូលរួមពីតំណាងប្រទេសប្រមាណ ១៣០ ហើយក្នុងនោះក៏រួមមានទាំងលោកប្រធានាធិបតីរុស្ស៊ី វ្ល៉ាឌីមៀរ ពូទីន ផងដែរ ៕

ប្រែសម្រួល៖ នាង រតនៈ

ប្រភព៖ CNA