លោក ស៊ុន ចាន់ថុល បង្ហាញចក្ខុវិស័យ​របស់រដ្ឋាភិបាល​ប្រែក្លាយកម្ពុជាពីឧស្សាហកម្ម​ប្រើកម្លាំងទៅជាឧស្សាហកម្មជំនាញ

លោក ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ក្រុមប្រឹក្សាអភិវឌ្ឍន៍កម្ពុជា បានបង្ហាញអំពីចក្ខុវិស័យ​របស់រាជរដ្ឋាភិបាល ដែលចង់ប្រែក្លាយកម្ពុជាពីឧស្សាហកម្មប្រើកម្លាំងពលកម្មទៅជាឧស្សាហកម្ម​ជំនាញតាមរយៈ​ការបង្កើនធនធានមនុស្ស ការរៀបចំឱ្យមានតំបន់ឧស្សាហកម្មបច្ចេកវិទ្យាកម្រិតខ្ពស់ ការកសាងហេដ្ឋារចនាសម្ព័ន្ធ​តភ្ជាប់ពាសពេញផ្ទៃប្រទេសសម្រាប់បម្រើឱ្យការដឹកជញ្ជូន និងពិសេសសម្រាប់នីតិកាលថ្មីនេះ​បានបន្តយកចិត្តទុកដាក់​លើការបង្កើតច្រករបៀងត្រី និងស្រូវ និងការរៀបចំគម្រូថ្មីៗជំរុញវិស័យទេសចរណ៍កម្ពុជា។ លោកឧបនាយក​រដ្ឋមន្រ្តី​លើកឡើងបែបនេះ នៅក្នុងជំនួបជាមួយលោក Keith Magnus ប្រធានក្រុមហ៊ុន Evercore នៅថ្ងៃទី ០៨ វិច្ឆិកា ឆ្នាំ ២០២៣។

លោក ស៊ុន ចាន់ថុល ក៏បានបង្ហាញជំហររបស់រាជរដ្ឋាភិបាលកម្ពុជា ក្រោមការដឹកនាំរបស់សម្ដេច ហ៊ុន ម៉ាណែត ក្នុងការទទួលស្វាគមន៍រាល់កិច្ចការងារវិនិយោគ និងកិច្ចសហប្រតិបត្តិការលើគ្រប់វិស័យ និងពិសេសចំពោះ​កិច្ចការងាររៀបចំឱ្យមានតំបន់ឧស្សាហកម្មនៅកម្ពុជា ក្រុមប្រឹក្សាអភិវឌ្ឍន៍កម្ពុជាបានត្រៀម​ខ្លួនរួចរាល់ក្នុងការ​សម្របសម្រួល ឱ្យកិច្ចការងាររៀបចំនេះអាចអនុវត្តទៅបានដោយរលូន ដើម្បីជាប្រយោជន៍​សម្រាប់ប្រជា​ពលរដ្ឋកម្ពុជាទាំងមូល។

ជាមួយគ្នានេះ លោកឧបនាយករដ្ឋមន្ត្រី បានផ្ដល់ការស្វាគមន៍យ៉ាងកក់ក្ដៅជូនចំពោះក្រុមហ៊ុន Evercore និងបានថ្លែងអរគុណលើការផ្ដល់ទំនុកចិត្តខ្ពស់មកកាន់រាជរដ្ឋាភិបាលកម្ពុជាក្នុងនីតិកាលថ្មីនេះ។

នៅក្នុងជំនួបនេះ លោក Keith Magnus ប្រធានក្រុមហ៊ុន Evercore បានជម្រាបជូន ឧបនាយករដ្ឋមន្ត្រី អំពីសេវាកម្មនានា និងសកម្មភាពការងាររបស់ក្រុមហ៊ុន ដែលធ្លាប់បានអនុវត្តជោគជ័យនាពេលកន្លងមក ពិសេស​នៅក្នុងប្រទេសសិង្ហបុរី។ ដោយមានការគាំទ្រពីរាជរដ្ឋាភិបាលកម្ពុជា ក្រុមហ៊ុននឹងពិនិត្យលទ្ធភាព​លើការរៀបចំ​ឱ្យមានកិច្ចសហប្រតិបត្តិការរួមគ្នាដើម្បីពង្រីកវិស័យឧស្សាហកម្ម ទេសចរណ៍ និងវិស័យពាក់ព័ន្ធផ្សេងៗ ឱ្យកាន់តែរីកចម្រើនឡើងបន្ថែមទៀត៕