អ្នកជំនាញ វៀតណាម រំពឹងវត្តមានរបស់លោក ស៊ី ជីនពីង នឹងជួយជំរុញភ្ញៀវ ចិន កើនដល់ ៩០ ភាគរយ

អ្នកជំនាញឧស្សាហកម្មទេសចរណ៍វៀតណាមរំពឹងថា ដំណើរទស្សនកិច្ចនៅថ្ងៃទី១២ និងថ្ងៃទី១៣ របស់លោកប្រធានាធិបតីចិន ស៊ី ជីនពីង មកកាន់ប្រទេសវៀតណាមនឹងជំរុញអត្រាស្ទុះងើបឡើងវិញនៃទីផ្សារទេសចរចិនឲ្យកើនដល់ ៩០ ភាគរយនៅឆ្នាំ ២០២៤​ ។

នាយកលេខាធិការដ្ឋានក្រុមប្រឹក្សាទេសចរណ៍វៀតណាម លោក Hoang Nhan Chinh បានលើកឡើងថា ដំណើរទស្សនកិច្ចរបស់លោក ស៊ី ជីនពីង ពិតជាមានសារៈសំខាន់ខ្លាំងណាស់ ហើយបន្ទាប់ពីដំណើរទស្សនកិច្ចរបស់ប្រធានាធិបតីរូបនេះហើយ អាចនឹងជួយជំរុញទីផ្សារ​ទេសចរចិនមកកាន់វៀតណាមឲ្យស្ទុះងើបឡើងវិញ​​ពី ៨០ ភាគរយទៅ ៩០ ភាគរយនៅ​ឆ្នាំក្រោយ ។

លោក Hoang Nhan Chinh បានបញ្ជាក់ទៀតថា ទីផ្សារទេសចរចិននៅក្នុងឆ្នាំនេះ ពិតជាងើបឡើងយឺតខ្លាំងណាស់ បើប្រៀបធៀបទៅនឹងទីផ្សារធំៗប្រទេសផ្សេងទៀត ។ ​

មិនខុសគ្នាឡើយ លោក Pham Hai Quynh នាយកវិទ្យាស្ថានអភិវឌ្ឍន៍ទេសចរណ៍អាស៊ីយល់ឃើញថា វត្តមានលោក ស៊ី នឹងជះឥទ្ធិពលវិជ្ជមានដល់ឧស្សាហកម្មទេសចរណ៍វៀតណាម ។ សក្តានុពលនៃទីផ្សារទេសចរចិននៅវៀតណាមអាចកើនឡើងម្តងទៀតនៅឆ្នាំក្រោយ ប្រសិនបើមានគោលនយោបាយជំរុញកិច្ចសហប្រតិបត្តិការទេសចរណ៍ប្រកបដោយប្រសិទ្ធភាព ។

ទន្ទឹមនឹងនេះ ភ្ញៀវចិនក៏​ចង់បានកន្លែងកម្សាន្តដែរមានសុវត្ថិភាពជាពិសេសផងដែរ ដូច្នេះវៀតណាមចាំបាច់ត្រូវផ្សព្វផ្សាយអំពីខ្លួនឯងជាគោលដៅសុវត្ថិភាព មិត្តភាព និងស្វាគមន៍សម្រាប់ភ្ញៀវទេសចរចិន ។

ពាក់ព័ន្ធនឹងការផ្សព្វផ្សាយឲ្យកាន់តែមានប្រសិទ្ធភាពវិញ មានតែបណ្តាញសង្គម​ WeChat និង Weibo ប៉ុណ្ណោះ ជាប្រព័ន្ធផ្សព្វផ្សាយសង្គមដ៏ធំបំផុតរបស់ចិន ។ មិនតែប៉ុណ្ណោះ វៀតណាមគួរពិចារណាបើកការិយាល័យផ្សព្វផ្សាយទេសចរណ៍នៅក្នុងមជ្ឈមណ្ឌលសំខាន់ៗ និងរៀបចំពិធីបុណ្យវប្បធម៌វៀតណាមនៅតាមទីតាំងសំខាន់ៗក្នុងប្រទេសចិន ។

គួរបញ្ជាក់ថា ក្នុងឆ្នាំ ២០១៩ ចិនគឺជាប្រភពទេសចរណ៍ដ៏ធំបំផុតរបស់វៀតណាមដែលមានចំនួន ៥.៨ លាននាក់ ខណៈក្នុងរយៈពេល ១១ ខែដំបូងនៃឆ្នាំនេះ ភ្ញៀវចិនមានតែ ១.៥ លាននាក់ប៉ុណ្ណោះ ហើយចំណាយជាមធ្យម​ ១,៨៥០ ដុល្លារ​ សម្រាប់ដំណើរកម្សាន្ត ៕

ប្រែសម្រួល៖ នាង រតនៈ

ប្រភព៖ VN Express