គណៈកម្មការភូមិមួយផលិតផលមួយ រៀបចំពិព័រណ៌ ជាង ១ សប្ដាហ៍ នៅសួនស្ទឹងសែន

គណៈកម្មការភូមិមួយផលិតមួយ រៀបចំព្រឹត្តិការណ៍តាំងពិព័រណ៌ផលិតផល ភូមិមួយ ផលិតផលមួយ នៅសួនស្ទឹងសែន ចាប់ពីថ្ងៃទី១៧ ដល់ថ្ងៃទី២៤ ខែមករា ស្ថិតនៅក្រុងស្ទឹងសែន ខេត្តកំពង់ធំ។

លោក ជា វ៉ាន់ចាន់ អភិបាលរងខេត្តកំពង់ធំ លើកឡើងថា គោលនយោបាយជាតិសម្រាប់ជំរុញចលនាភូមិមួយផលិតផលមួយ បានយកចិត្តទុកដាក់យ៉ាងខ្លាំងលើអ្នកផលិតខ្នាតតូច និងមធ្យម ដែលជាគោលដៅអាទិភាពដំបូង។ អ្នកផលិតខ្នាតតូចផ្នែកកែច្នៃ ស្បៀងអាហារ និងភេសជ្ជៈ ត្រូវមានការយកចិត្តទុកដាក់លើបញ្ហាអនាម័យ ដូចជាការស្តុកទុកវត្ថុធាតុដើម ផលិតផលសម្រេច និងការវេចខ្ចប់ឱ្យបានស្របតាមស្តង់ដាអនាម័យឧបករណ៍កែច្នៃ ជាពិសេសការគ្រប់គ្រងកាកសំណល់មិនអាចទទួលយកបាន។

លោក ជា វ៉ាន់ចាន់ មានប្រសាសន៍បន្តថា កន្លងមក គណៈកម្មការមួយផលិតមួយថ្នាក់ខេត្ត បានពិនិត្យ និងវាយតម្លៃ ជំវិញទំនិញ និងសេវាកម្ម សរុបចំនួន ២៦ ប្រភេទ ដែលទំនិញមានចំនួន ២២ ប្រភេទ និងសេវា ចំនួន ៤ ប្រភេទ ក្នុងចំណោមសំណើទាំងអស់នេះ គណៈកម្មការជាតិភូមិមួយផលិតផលិតផលមួយ បានទទួលស្គាល់ទំនិញ ចំនួន ១៨ ប្រភេទ និងសេវាកម្មចំនួន ៣ ប្រភេទ។

អភិបាលរងខេត្តកំពង់ធំ ខាងលើ បន្តថា ម្ចាស់សិប្បកម្ម សហគ្រាស ភោជនីយដ្ឋាន សហគមន៍ មានសិទ្ធិបំពេញពាក្យស្នើសុំ ចូលជាសមាជិកផលិតផលភូមិមួយផលិតផលមួយបានផងដែរ។

លោក សួន រ៉ាស៊ី អគ្គលេខាធិការរង នៃគណៈកម្មាធិការជាតិជំរុញចលនាភូមិមួយផលិតផលមួយ មានប្រសាសន៍ថា ក្រោមគម្រោងលើកកម្ពស់ការអនុវត្តអនាម័យរបស់អ្នកផលិតអាហារ បានរៀបចំគោលការណ៍ ណែនាំ ស្តីពី សុវត្ថិភាព និងអនាម័យចំណីអាហារ មាន គោលបំណងដើម្បីផ្តល់ជូននូវចំណេះដឹងដល់ប្រតិបត្តិករគ្រប់ទីកន្លែង ក្នុងការផលិតចំណីអាហារដែលបានទទួល ឬមិនទាន់បានទទួលអាជ្ញាប័ណ្ណ ត្រូវតែមានផែនការអនុវត្តនូវគោលការណ៍ណែនាំ ស្តីពី សុវត្ថិភាព មានអនាម័យចំណីអាហារ ព្រមទាំងផ្តល់ការណែនាំ ដល់ប្រតិបត្តិករ សេវាករចំណីអាហារ ពាក់ព័ន្ធនឹងធាតុចាំបាច់ នៃការការពារចំពោះសុវត្ថិភាព និងអនាម័យ ចំណីអាហារសម្រាប់កន្លែងផលិតឱ្យបានជាអតិប្បរមា។

ក្នុងនាម គណៈកម្មការភូមិមួយផលិតផលមួយ នៅតែបន្តលើកទឹកចិត្តដល់អ្នកផលិត ឬផលិតករ សេវាករម្ហូបអាហារទាំងអស់ ព្យាយាមពង្រីក ស្វែងយល់ចំណេះដឹងបន្ថែមទៀត ក្នុងចូលរួមជាមួយគ្នាក្នុងកាផលិត ទាំងបរិមាណ និងអនាម័យឱ្យកាន់តែប្រសើរឡើង ដើម្បីធានាបានថា ផលិតផលទាំងអស់រក្សាបានទាំងសុខភាព និងសុវត្ថិភាពម្ហូបអាហារ ទាំងអ្នកផលិត និងអ្នកបរិភោព។

អត្ថបទ៖​ ឈាង​ មករា​