ព័ត៌មានអន្ដរជាតិ

វៀតណាមរំពឹងការនាំចេញម្រេច ឈានដល់ ១ ប៊ីលានដុល្លារ ជាថ្មីនៅឆ្នាំនេះ

បានផុស

២ years មុន

នៅ

ថ្ងៃព្រហស្បតិ៍ ៥ កញ្ញា ២០២៤

ដោយ

សមាគមម្រេច និងគ្រឿងទេសវៀតណាម (VPSA) បានឱ្យដឹងថា ការនាំចេញម្រេចរបស់វៀតណាមរំពឹងថានឹងកើនដល់ជាង ១ ប៊ីលានដុល្លារ ឆ្នាំនេះ ដោយសារតែតម្រូវការលើទីផ្សារសកលខ្ពស់ ខណៈការផ្គត់ផ្គង់មានកម្រិត។ នេះបើតាមការចុះផ្សាយរបស់កាសែត Viet Nam News កាលពីថ្ងៃពុធ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមាគមបាននិយាយថា ឧស្សាហកម្មម្រេចកំពុងស្ថិតនៅលើផ្លូវត្រឡប់ទៅក្រុមទំនិញដែលមានតម្លៃនៃការនាំចេញលើសពី ១ ប៊ីលានដុល្លារ ខណៈគិតត្រឹមថ្ងៃទី ៣០ ខែកក្កដា ការនាំចេញម្រេចបានឈានដល់ ៧៦៤,២ លានដុល្លារ។

ក្នុងរយៈពេល៧ដើមឆ្នាំដដែល ម្រេចជាង ១៦៤ ៣០០ តោន ត្រូវបានលក់ចេញទៅទីផ្សារបរទេស ក្នុងតម្លៃនាំចេញជាមធ្យម ៤ ៥៦៨ ដុល្លារ/តោន សម្រាប់ម្រេចខ្មៅ (កើនឡើង ៣២,៧ ភាគរយ ក្នុងអត្រាប្រចាំឆ្នាំ) និង ៦ ១៩៥ ដុល្លារ/តោន សម្រាប់ម្រេចស (កើនឡើង ២៥ ភាគរយ)។

សហរដ្ឋអាមេរិក គឺជាប្រទេសទិញម្រេចវៀតណាមធំ ហើយបន្ទាប់មកគឺអាល្លឺម៉ង់ អេមីរ៉ាតអារ៉ាប់រួម (UAE) និងឥណ្ឌា។

VPSA និយាយថា ប្រេស៊ីល ដែលជាប្រទេសផលិត និងនាំចេញម្រេចខ្មៅធំជាងគេទី២របស់ពិភពលោកបានទទួលរងការខូតខាតដំណាំម្រេច ដែលជំរុញឱ្យតម្លៃសកលលោកកើនឡើងខ្ពស់ក្នុងរយៈពេលប៉ុន្មានខែចុងក្រោយនៃឆ្នាំ ២០២៤។ ការឡើងថ្លៃ ក៏ជំរុញផងដែរ នៅពេលផលិតកម្មនៅវៀតណាម ម៉ាឡេស៊ី និងឥណ្ឌូណេស៊ី រំពឹងថានឹងធ្លាក់ចុះខ្លាំង ដោយសារតែផលប៉ះពាល់នៃបាតុភូតអាកាសធាតុ អែល នីណូ ដែលបង្កការអូសបន្លាយនៃគ្រោះរាំងស្ងួត។ សមាគមព្យាករថា ក្នុងរយៈពេលពី ៣ ទៅ ៥ ឆ្នាំខាងមុខ ការផ្គត់ផ្គង់ម្រេចនឹងយឺតជាងតម្រូវការ។