កំណើនប្រើប្រាស់យានយន្តអគ្គិសនី នឹងកាត់បន្ថយ​ហានិភ័យនៃការប្រែប្រួលតម្លៃប្រេងឥន្ធនៈ

លោក ផន រឹម​ អ្នកនាំពាក្យក្រសួងសាធារណការ និងដឹកជញ្ជូន បានឱ្យដឹងនៅថ្ងៃទី ២៤ ខែកញ្ញា ឆ្នាំ ២០២៤នេះថា ការប្រើប្រាស់យានយន្តអគ្គិសនី​នឹងចូលរួមចំណែកក្នុងការកាត់បន្ថយការប្រើប្រាស់ប្រេងឥន្ធនៈ ស្របពេលដែលកម្ពុជាបានប្តេជ្ញាសម្រេចឱ្យបានអព្យាក្រឹតកាបូន​នៅឆ្នាំ២០២៥០។

គិតត្រឹមខែសីហា ឆ្នាំ ២០២៤ ការប្រើប្រាស់​យានយន្តអគ្គិសនីនៅកម្ពុជា មានចំនួន ៣ ៦៧៦ គ្រឿង ខណៈ​ដែល​ទី​កន្លែង​បញ្ចូល​ថាមពល​អគ្គិសនីនៅ​ទូទាំង​ប្រទេស​មាន​ចំនួន ២១ ​កន្លែង​ ដែល​មាន​ទូ​បញ្ចូល​អគ្គិសនី​បាន​លឿន​បំផុត​ចំនួន ២៧​​។

លោក ផន រឹម បានអះអាងថា៖« កម្ពុជា ពឹងផ្អែកទាំងស្រុងលើការនាំចូលប្រេងឥន្ធនៈពីទីផ្សារអន្តរជាតិ និងបណ្តាប្រទេស​​ក្នុងតំបន់ ដែលការកាត់បន្ថយការប្រើប្រាស់ប្រេងឥន្ធនៈ នឹងជួយ​ពង្រឹង​សន្តិសុខថា​មពល​របស់កម្ពុជា​តាមរយៈការ​កាត់​បន្ថយ​ការ​ពឹង​ផ្អែកលើការនាំចូលប្រេងឥន្ធនៈ ព្រមទាំងការកាត់បន្ថយហានិភ័យ​នៃការប្រែប្រួលថ្លៃប្រេងឥន្ធនៈដែលមាន​ភាពមិនប្រាក​ដប្រជា។ បន្ថែមលើនេះ អស្ថិរភាពនៃតម្លៃប្រេងឥន្ធនៈ​បានដាក់សម្ពាធយ៉ាងខ្លាំងទៅលើការគ្រប់គ្រងទុន​បម្រុងរូបិយប័ណ្ណ​អន្តរជាតិ»។

មន្ត្រីនាំពាក្យរូបនេះ បញ្ជាក់ថា ការប្រើប្រាស់យានយន្តអគ្គិសនី បានផ្តល់អត្ថប្រយោជន៍ជាច្រើន​ដូចជាបរិស្ថាន សេដ្ឋកិច្ច សន្តិសុខថាមពល និងជាពិសេសការឈោងចាប់នូវបច្ចេកវិទ្យាថ្មីៗ​ស្របនឹងនិន្នាការតំបន់ និងពិភពលោក ដែលកំពុងតម្រង់ទិសទៅរកឧស្សាហកម្មបៃតង។

គោលនយោបាយជាតិស្តីពីការអភិវឌ្ឍវិស័យយានយន្តអគ្គិសនី២០២៤-២០៣០ គឺជាត្រីវិស័យ និងជាឧបករណ៍គោលនយោបាយរបស់រាជរដ្ឋាភិបាលក្នុងការតម្រង់ទិស និងជំរុញការអភិវឌ្ឍវិស័យយានយន្តអគ្គិសនីនៅកម្ពុជា។

រាជរដ្ឋាភិបាលផ្តល់សេរីភាព និងជម្រើសកាន់តែសំបូរបែប សម្រាប់ការប្រើប្រាស់យានយន្ត ដើម្បីសម្រួលការធ្វើដំណើរ ដឹកជញ្ជូនទំនិញ និងសេវាកម្មផ្សេងៗ។ ជាក់ស្តែង អត្រានៃការប្រើប្រាស់យានយន្តកើនយ៉ាងខ្លាំង ជាពិសេសទោចក្រ​យានយន្ត និងរថយន្ត។

លោក ផន រឹម បានបញ្ជាក់បន្ថែមថា អត្ថប្រយោជន៍នៃការប្រើប្រាស់យានយន្តអគ្គិសនី ដូចជា ការកាត់បន្ថយការបំភាយឧស្ម័នកាបូនិក និងរួមចំណែកកាត់បន្ថយការប្រែប្រួលអាកាសធាតុតាមរយៈ​ការកាត់បន្ថយការពឹងផ្អែកលើការប្រើប្រាស់ប្រេងឥន្ធនៈដែលជាប្រភពនៃការបំភាយ​ឧស្ម័នផ្ទះកញ្ចក់ដ៏ចម្បង។

យានយន្តអគ្គិសនីគ្មានការបញ្ចេញឧស្ម័នពុលតាមបំពង់ស៊ីម៉ាំងដូចយានយន្តប្រើប្រាស់ប្រេងឥន្ធនៈដែលបញ្ចេញឧស្ម័នកាបូនម៉ូណូអុកស៊ីដ នីត្រូសែអុកស៊ីដ និងភាគល្អិតនានា ដែលកត្តាទាំងនេះរួមចំណែកក្នុងការពង្រឹងគុណភាពខ្យល់ក្នុង បរិយាកាស។

លោក ផន រឹម មានប្រសាសន៍ថា​ ការបង្កើនការប្រើប្រាស់យានយន្តអគ្គិសនីនឹងកាត់បន្ថយ​ការ​បញ្ចេញ​ឧស្ម័នពុលក្នុង សកលលោកប្រមាណពាក់កណ្តាលនៅឆ្នាំ២០៥០ ធៀបនឹងបច្ចុប្បន្ន និងកាត់បន្ថយការស្លាប់មុនអាយុពីប្រមាណ​៥,៤​លាននាក់ នៅឆ្នាំ២០២០ មកត្រឹមប្រមាណ២,៨លាននាក់ នៅឆ្នាំ២០៥០។

តាមការវិភាគនៃការបញ្ចេញឧស្ម័នពុលនៅក្នុងវដ្ដជីវិតនៃយានយន្ត ការប្រើប្រាស់រថយន្តអគ្គិសនីសុទ្ធមានការបញ្ចេញឧស្ម័នពុលតិចជាងរថយន្តដែលប្រើប្រាស់ប្រេងឥន្ធនៈរហូតដល់ទៅជិត៤០% រីឯការប្រើប្រាស់ទោចក្រយានយន្តអគ្គិសនីបញ្ចេញ​ឧស្ម័នពុលតិចជាងទោចក្រយានយន្តដែលប្រើប្រាស់ប្រេងឥន្ធនៈប្រមាណ១០ដង។

ម្យ៉ាងទៀត ការប្រើប្រាស់យានយន្តអគ្គិសនីមានលក្ខណៈ​សន្សំសំចៃខ្ពស់ជាងការប្រើប្រាស់​យានយន្តប្រើប្រាស់ប្រេងឥន្ធនៈ។ យានយន្តអគ្គិសនីមានប្រសិទ្ធផល ឬខ្ពស់ជាងថាមពលម៉ាស៊ីន ប្រើប្រាស់ប្រេងឥន្ធនៈប្រមាណ៥ទៅ៦ដង នៅក្នុងការបំប្លែងថាមពលទៅជាចលនាដែលធ្វើឱ្យ ចំណាយទាបក្នុងការផ្លាស់ទី។

ជាក់ស្ដែង នៅក្នុងចម្ងាយផ្លូវ១០០គីឡូម៉ែត ការប្រើប្រាស់រថយន្តអគ្គិសនីត្រូវចាយថវិកាប្រមាណ៩ ៦៣៣រៀល ចំណែកឯការប្រើប្រាស់យានយន្តបើប្រាស់ប្រេងឥន្ធនៈត្រូវចាយថវិការហូតដល់៣៥ ៧២៣រៀល។

បណ្ដាប្រទេសក្នុងតំបន់ និងសកលលោកកំពុងផ្ដោតការ យកចិត្តទុកដាក់ខ្ពស់ក្នុងការជំរុញវិស័យ​យានយន្ត​អគ្គិសនី ជាពិសេសការប្រើប្រាស់បច្ចេកវិទ្យា បញ្ញាសិប្បនិម្មិតបច្ចេកវិទ្យាបើក​បរដោយស្វ័យប្រវត្តិ និងបច្ចេកវិទ្យាផ្សេងៗទៀតដែលពង្រឹង សុវត្ថិភាពដល់អ្នកប្រើប្រាស់។ កម្ពុជាក៏ត្រូវសម្របខ្លួនក្នុងនិន្នាការថ្មីនេះ ដើម្បីរក្សាភាពប្រកួតប្រជែងសេដ្ឋកិច្ចរបស់ខ្លួន៕