ព័ត៌មានអន្ដរជាតិ

ប្រាក់ចំណេញឧស្សាហកម្មចិន ធ្លាក់ចុះនៅខែកញ្ញា ធ្ងន់ធ្ងរបំផុតរាប់តាំងពីវិបត្តិកូវីដ១៩

បានផុស

៥ ខែ មុន

នៅ

ថ្ងៃចន្ទ ២៨ តុលា ២០២៤

ដោយ

ទិន្នន័យពីការិយាល័យស្ថិតិជាតិចិន បានបង្ហាញថា ប្រាក់ចំណេញឧស្សាហកម្មរបស់ចិនបានធ្លាក់ចុះកាលពីខែកញ្ញា ក្នុងល្បឿនដ៏លឿនបំផុតរាប់ចាប់តាំងពីជំងឺវិបត្តិកូវីដ១៩ ខណៈប្រទេសនេះកំពុងស្ថិតនៅក្នុងភាពស្រពិចស្រពិលនៃសេដ្ឋកិច្ច ដែលញាំញីដោយកំណើនយឺតយ៉ាវ កង្វះតម្រូវការក្នុងស្រុក និងវិបត្តិអចលនទ្រព្យជាដើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិន្នន័យបង្ហាញថា ប្រាក់ចំណេញឧស្សាហកម្មបានធ្លាក់ចុះ ២៧,១ ភាគរយ នៅខែកញ្ញា ធៀបនឹងរយៈពេលដូចគ្នាកាលពីឆ្នាំមុន ដែលវាជាការបន្តធ្លាក់ចុះពីការធ្លាក់ចុះ ១៧,៨ ភាគរយ នៅខែសីហា និងធ្ងន់ធ្ងរបំផុតរាប់តាំងពីខែមីនា ឆ្នាំ ២០២០ (៣៤,៩ ភាគរយ)។

ក្នុងរយៈពេល ៩ ខែដើមឆ្នាំ ២០២៤ ប្រាក់ចំណេញនៃវិស័យដដែលបានថយចុះ ៣,៥ ភាគរយ ធៀបនឹងរយៈពេលដូចគ្នាកាលពីឆ្នាំមុន។

ទិន្នន័យដដែល មិនរាប់បញ្ចូលតួលេខនៅខែភាគច្រើនក្នុងឆ្នាំ ២០២២ នោះទេ។ ២០២២ ជាឆ្នាំដែលទីក្រុងសៀងហៃ និងតំបន់ផ្សេងៗទៀតនៃប្រទេសចិន ដែលជាតំបន់ឧស្សាហកម្មធំៗ បានរឹតត្បឹតយ៉ាងតឹងរ៉ឹងលើវិធានការទប់ស្កាត់ការរីករាយដាលនៃជំងឺកូវីដ១៩ ដោយកម្រិតសកម្មភាពអាជីវកម្ម។

ប្រាក់ចំណេញក្នុងឧស្សាហកម្ម បង្ហាញពីសុខភាពហិរញ្ញវត្ថុរបស់ក្រុមហ៊ុនចិន ហើយការធ្លាក់ចុះវា អាចប៉ះពាល់ដល់ការសម្រេចចិត្តវិនិយោគរបស់ចិន។ ភាពកម្សោយនៃប្រាក់ចំណេញដដែល បានក្លាយជានិមិត្តរូបនៃបញ្ហាប្រឈមដែលចិនកំពុងប្រឈមផ្នែកសេដ្ឋកិច្ច ដោយជំរុញឱ្យមានវិធានការជំរុញសេដ្ឋកិច្ចផ្សេងៗពីរដ្ឋាភិបាល ដូចជាការកាត់បន្ថយអត្រាការប្រាក់ និងបន្ធូរបន្ថយលក្ខខណ្ឌទិញផ្ទះដើម្បីគាំទ្រវិស័យអចលនទ្រព្យជាដើម។

ជុំវិញបញ្ហាសេដ្ឋកិច្ចនេះ សភាចិនបានកំណត់ពេលកិច្ចប្រជុំមួយនៅដើមខែក្រោយ ដោយបង្កើនការរំពឹងថា រដ្ឋាភិបាលចិនអាចនឹងដាក់វិធានការជំរុញសេដ្ឋកិច្ចបន្ថែមទៀត។ អ្នកជំនាញលើកឡើងថា ទិន្នន័យចុងក្រោយបង្ហាញអំពីតម្រូវការនៃគោលនយោបាយបន្ថែម ចំពេលតម្រូវការក្នុងស្រុកបន្តខ្សោយ ហើយសម្ពាធបរិត្តផរណាក៏អូសបន្លាយ។

គួរគូសបញ្ជាក់ថា សេដ្ឋកិច្ចរបស់ប្រទេសចិនបានកើនឡើង ៤,៦ ភាគរយ នៅត្រីមាសទី ៣ ដែលជាកំណើនយឺតបំផុតរាប់តាំងពីដើមឆ្នាំ ២០២៣។ ការណ៍នេះ បង្កក្ដីបារម្ភថា កំណើនសេដ្ឋកិច្ចចិនអាចនឹងបរាជ័យក្នុងការសម្រេចបានអត្រាគោលដៅ ៥ ភាគរយ របស់រដ្ឋាភិបាល៕