ព័ត៌មានជាតិ

ក្រោយដាក់ឲ្យដំណើរការ អាកាសយានដ្ឋានអន្តរជាតិតេជោ បើកឱ្យពលរដ្ឋចូលទស្សនាឬទេ?

បានផុស

៤ សប្តាហ៍ មុន

នៅ

ថ្ងៃអង្គារ ២៥ មីនា ២០២៥

ដោយ

ក្រោយបើកសម្ពោធដាក់ឱ្យដំណើរការក្នុងដំណាក់កាលទីមួយនាពេលឆាប់ៗខាងមុខនេះ អាកាសយានដ្ឋានអន្តរជាតិតេជោ នឹងបើកឱ្យប្រជាជនដែលត្រូវជាសាច់ញាតិរបស់អ្នកដំណើរអាចចេញចូលដល់ខាងក្នុងដល់កន្លែង check in មិនមានការហាមហាត់ឃាត់ដូចនៅអាកាសយានដ្ឋានភ្នំពេញនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើការឱ្យដឹងពីអ្នកឧកញ៉ា ឆារស៍ វ៉ាន់ អភិបាលក្រុមហ៊ុន Cambodia Airport Investment និងជាអភិបាលក្រុមហ៊ុនកាណាឌីយ៉ាគ្រុប បានមានប្រសាសន៍ថា ក្រោយបើកដំណើរការឱ្យប្រើប្រាស់ជាផ្លូវការនូវអាកាសយានដ្ឋានអន្តរជាតិតេជោ ក្រៅតែពីភ្ញៀវទេសចរដែលជាអ្នកដំណើរ ប្រជាជនកម្ពុជាដែលជូនអ្នកដំណើរមកប្រលានយន្តហោះថ្មីនេះ អាចជូនអ្នកដំណើរដែលជាបងប្អូន សាច់ញាតិរបស់ខ្លួនចូលទៅដល់ក្នុងបាន មិនមានការហាមឃាត់ដូចនៅអាកាសយានដ្ឋានភ្នំពេញនោះទេ។

អ្នកឧកញ៉ាបានពន្យល់ថា «ពេលចូលមកក្នុងអាកាសយានដ្ឋានអន្តរជាតិថ្មីនេះ គឺមានម្លប់ត្រជាក់ទាំងអស់ ហើយប្រជាជនកម្ពុជាដែលជូនអ្នកដំណើរមកក៏អាចចូលទៅដល់កន្លែង Check in ខាងក្នុងបាន។ លើសពីនេះទៀត ក៏អាចចូលទៅដល់ក្នុងកន្លែង Counter ខាងក្នុងអាចមើលឃើញភ្ញៀវទេសចរដែលធ្វើដំណើរចុះពីយន្តហោះផ្ទាល់ផងដែរ»។

«ដោយឡែកនៅខាងក្រៅបរិវេណប្រលានយន្តហោះ ប្រជាពលជនកម្ពុជាក៏អាចចូលទស្សនាដោយសេរីបាន មិនមានការហាមឃាត់នោះទេ»។ អ្នកឧកញ៉ា ឆារស៍ វ៉ាន់ បន្ថែមបែបនេះ។

ជាមួយគ្នានេះ អ្នកឧកញ៉ា ក៏បានបង្ហើបឱ្យដឹងផងដែរពាក់ព័ន្ធទៅនឹងចំណតចតរថយន្ត គឺខាងប្រលានយន្តហោះ បានម៉ៅការឱ្យក្រុមហ៊ុនទទួលបន្ទុកមើលការខុសត្រូវរឿងចំណតឡាននេះ ហើយពាក់ព័ន្ធតម្លៃលើចំណតរថយន្ត នៅមិនទាន់អាចបញ្ជាក់បាននោះទេ។

គួរជម្រាបថា អាកាសយានដ្ឋានអន្តរជាតិតេជោ គ្រោងបើកឲ្យដំណើរការនៅអំឡុងខែកក្កដា ឆ្នាំ២០២៥ ខាងមុខនេះ។ អាកាសយានដ្ឋានដ៏ធំលំដាប់ 4F នេះ មានសមត្ថភាពទទួលអ្នកដំណើរប្រមាណ ១៥ លាននាក់ក្នុងមួយឆ្នាំនៅដំណាក់កាលទីមួយ៕