សេដ្ឋកិច្ច

កម្ពុជាចាត់ទុកចិនជាទីផ្សារធំ នៅពេលអនាគត

បានផុស

១ ខែ មុន

នៅ

ថ្ងៃព្រហស្បតិ៍ ១០ មេសា ២០២៥

ដោយ

លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្មកម្ពុជា បានលើកឡើងថា កម្ពុជាតែងចាត់ទុក ប្រទេសចិន គឺជាទីផ្សារធំ ដែលមានកម្លាំងទិញនៃអ្នកប្រើប្រាស់ មិនចាញ់ទីផ្សារសហរដ្ឋអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងវេទិកាអំពី «ទំនាក់ទំនងកម្ពុជា-ចិន ក្នុងបរិបទថ្មី» នៅថ្ងៃទី ០៧ ខែមេសា ឆ្នាំ ២០២៥ លោក ប៉ែន សុវិជាតិ បញ្ជាក់ថា ថ្វីត្បិតតែកម្លាំងទិញនៃការនាំចេញទៅកាន់សហរដ្ឋអាមេរិកនាពេលកន្លងមកមានទំហំធំ ប៉ុន្តែចិន ក៏ជាទីផ្សារមួយដែលមានទំហំធំនៃការនាំចេញដូចគ្នាដែរ។

លោក បានលើកឡើងថា ទាំងចិន និងកម្ពុជា សុទ្ធតែជាសមាជិកនៃ កិច្ចព្រមព្រៀងពាណិជ្ជកម្មសេរី (RCEP) ដែលកិច្ចព្រមព្រៀងនេះ បានរួមចំណែកនៅក្នុងទីផ្សារនាំចេញរបស់កម្ពុជាប្រមាណ ៦៣% នៃចំណែកនៃការនាំចេញទំនិញទាំងមូលរបស់កម្ពុជា។

អ្នកនាំពាក្យរូបនេះ បន្ថែមថា៖ «កំណើននៅក្នុងវិស័យពាណិជ្ជកម្មនេះ មានកំណើនរហូតចាប់តាំងពីបានចុះកិច្ចព្រមព្រៀងពាណិជ្ជកម្មសេរី ដោយក្នុងនោះប្រទេសចិនបានទទួលទិញទំនិញកសិផលរបស់កម្ពុជា ដែលរួមមាន អង្ករ ត្រី ដំឡូងមី ជាការទទួលទិញ និងជាកិច្ចសហប្រតិបត្តិការមួយដែលជំរុញឱ្យមានការកែច្នៃ មានន័យថា សេចក្តីត្រូវការរបស់ទីផ្សារ បានបង្រៀនឱ្យយើងចេះកែច្នៃផលិតផលដើមឱ្យទៅជាផលិតផលសម្រេច ហើយត្រូវនឹងតម្រូវការរបស់ទីផ្សារ»។

លោក ប៉ែន សុវិជាតិ បន្ថែមថា បច្ចុប្បន្នក្រសួងពាណិជ្ជកម្មកម្ពុជា បានខិតខំជំរុញនូវម៉ាកទំនិញរបស់កម្ពុជា និងលើកតម្កើងកេរ្តិ៍ឈ្មោះទំនិញដែលផលិតនៅក្នុងប្រទេស ក្រៅតែពីផលិតផលដែលមានកេរ្តិ៍ឈ្មោះ និងការទទួលស្គាល់ស្រាប់ យើងក៏នៅមានទំនិញកសិផលមួយចំនួនទៀតដែលតម្រូវឱ្យការតម្កល់ឈ្មោះ ការផលិតឱ្យមានការទទួលស្គាល់ទូទាំងសកលលោក ក៏ដូចជាការទទួលស្គាល់នៅគ្រប់ទីផ្សារផ្សេងៗទៀត ក្រៅតែពីទីផ្សារមានស្រាប់។

លោកបានអះអាងថា កម្ពុជាតែងគិតថា សហគមន៍រួមវាសនាតែមួយ ដែលកម្ពុជា និងភាគីចិន បានពួតដៃគ្នានៅក្នុងការកសាងកន្លងមក គឺជាផលប្រយោជន៍សំខាន់នៅក្នុងការរីកចម្រើនផ្នែកសេដ្ឋកិច្ច ដែលមានការវិនិយោគជាមួយគ្នា និងការធ្វើពាណិជ្ជកម្មជាដើម។

មន្ត្រីជាន់ខ្ពស់នៃក្រសួងពាណិជ្ជកម្មរូបនេះ រំពឹងទុកថា ដំណើរទៅមុខនៃពាណិជ្ជកម្មទ្វេភាគីកម្ពុជា-ចិន នឹងមានការរីកចម្រើនជាលំដាប់ ដោយរីកចម្រើនក្នុងលក្ខណៈជាសហគមន៍រួមទាំងគ្នា ទាំងប្រពៃណី សិល្បៈ វប្បធម៌ និងផ្នែកសន្តិសុខ និងរីកចម្រើនរួមគ្នាទាំងវិស័យផ្សេងៗ ក៏ដូចជាវិស័យពាណិជ្ជកម្មនេះផងដែរ។

នៅក្នុងឆ្នាំ២០២៤ ទំហំពាណិជ្ជកម្មកម្ពុជា-ចិនសម្រេចបានប្រមាណ ១៥ ពាន់លានដុល្លារកើនឡើង ២៣,៨៤% បើធៀបទៅនិងឆ្នាំ២០២៣៕