តម្លៃមាសអន្តរជាតិកើន​ឡើងថ្ងៃសុក្រនេះ ប៉ុន្តែរំពឹងធ្លាក់ចុះក្នុងអត្រាប្រចាំសប្ដាហ៍

តម្លៃមាសកើនឡើងជាង១ភាគរយ សម្រាប់ការជួញដូរលើទីផ្សារអាស៊ីនៅថ្ងៃសុក្រនេះ ប៉ុន្តែរំពឹងថានឹងធ្លាក់ចុះខ្លាំងបំផុតក្នុងរយៈពេលជាង២ខែ សម្រាប់អត្រាតម្លៃប្រចាំសប្ដាហ៍។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

តម្លៃមាសជួញដូរដោយផ្ទាល់ បាន​កើនឡើង ១,១៧ ភាគរយ ដោយជួញដូរនៅតម្លៃ ៣ ២៥៥ ដុល្លារ/អោន គិតត្រឹមម៉ោង ១២ និង ៣០ នាទី នៅទីក្រុងហុងកុង។

យ៉ាងណាមិញ តម្លៃមាសបានធ្លាក់ចុះប្រហែល ២ ភាគរយ នៅសប្ដាហ៍នេះ ដែលជាអត្រាគំហុកបំផុតប្រចាំសប្ដាហ៍ រាប់តាំងពីខែកុម្ភៈ។

តម្លៃមាសបានកើនដល់ចំណុចខ្ពស់បំផុតក្នុងប្រវត្តិសាស្រ្ត ៣ ៥០០ ដុល្លារ/អោន កាលពីថ្ងៃទី ២២ មេសា ដោយសារតែភាពមិនប្រាកដប្រជា បណ្ដាលមកពីសង្រ្គាមពាណិជ្ជកម្មពន្ធគយ ជាពិសេសរវាងសហរដ្ឋអាមេរិក និងចិន​។ យ៉ាងណាមិញ តម្លៃមាស ដែលគេរាប់ទុកថាជាទ្រព្យសម្បត្តិសុវត្ថិភាព បាន​ធ្លាក់ចុះមកវិញនៅរយៈពេលក្រោយនេះ នៅពេលភាគីចិន និងអាមេរិក បាន​បង្ហាញបន្ទន់ជំហរដាក់គ្នា៕