ព័ត៌មានអន្ដរជាតិ

អាមេរិកចង់ឱ្យវៀតណាម បន្ថយការប្រើបច្ចេកវិទ្យាចិនក្នុងផលិតកម្មខ្លួន

បានផុស

៤០ វិនាទី មុន

នៅ

ថ្ងៃអង្គារ ១៧ មិថុនា ២០២៥

ដោយ

ជាផ្នែកមួយនៃការចរចាពន្ធគយបដិការ សហរដ្ឋអាមេរិកកំពុងជំរុញវៀតណាមឱ្យកាត់បន្ថយការប្រើប្រាស់បច្ចេកវិទ្យាចិននៅក្នុងឧបករណ៍ដែលប្រមូលផ្តុំនៅវៀតណាម សម្រាប់ការនាំចេញទៅអាមេរិក។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ ដែលស្រង់សម្ដីប្រភព ៣ រូប ជាអនាមិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពមួយរូបក្នុងនោះ បានលើកឡើងថា ការទាមទាររបស់សហរដ្ឋអាមេរិក គឺជា «ផ្នែកមួយនៃការរៀបចំឡើងវិញនូវខ្សែច្រវ៉ាក់ផ្គត់ផ្គង់ ដែលនឹងជួយសហរដ្ឋអាមេរិកបន្ថយការពឹងផ្អែកលើសមាសធាតុពីចិន»។

ប្រភពមួយរូបទៀត បានលើកឡើងថា គោលបំណងចុងក្រោយនោះ គឺដើម្បីពន្លឿនការកាត់ផ្តាច់របស់សហរដ្ឋអាមេរិកពីបច្ចេកវិទ្យាទំនើបចិន ខណៈបង្កើនសមត្ថភាពឧស្សាហកម្មរបស់វៀតណាម ដោយលើកឡើងពីឧបករណ៍ VR (Virtual Reality) ថាជាផលិតផងដែលវៀតណាមពឹងផ្អែកខ្លាំងលើបច្ចេកវិទ្យាពីចិនសម្រាប់ការដំឡើង។

គួរគូសបញ្ជាក់ថា វៀតណាមគឺជាមជ្ឈមណ្ឌលផលិតកម្មដ៏ធំរបស់ក្រុមហ៊ុនបច្ចេកវិទ្យាយក្សៗដូចជា Apple និង Samsung ដែលជារឿយៗពឹងផ្អែកលើសមាសធាតុផលិតនៅចិន។ Meta និង Google ក៏មានអ្នកម៉ៅការនៅវៀតណាមផងដែរ ដែលផលិតទំនិញដូចជាកាសស្តាប់ត្រចៀក និងស្មាតហ្វូន។ ប្រទេសដែលមានអតិរេកពាណិជ្ជកម្ម ១២៣,៥ ប៊ីលានដុល្លារជាមួយអាមេរិកកាលពីឆ្នាំមុន កំពុងរងនូវហានិភ័យពន្ធគយបដិការ ៤៩ ភាគរយ ពីសហរដ្ឋអាមេរិក៕