ជម្លោះអ៊ីស្រាអែល-អ៊ីរ៉ង់ ចាប់ផ្ដើមប៉ះពាល់វិស័យទេសចរណ៍ថៃ

​ជម្លោះអ៊ីស្រាអែល និងអ៊ីរ៉ង់ ​រំពឹងថានឹង​បង្កផលប៉ះពាល់ដល់ទីផ្សារទេសចរណ៍ចំនួន ៥ របស់ប្រទេសថៃ ដែលអាច​ឱ្យ​ចំនួនភ្ញៀវ​ធ្លាក់ចុះរហូតដល់ ៥០ ភាគរយ ខណៈភ្ញៀវពី​មជ្ឈិមបូព៌ាទៅកាន់កោះភូកេតបានចាប់ផ្តើមធ្លាក់ចុះ​ជាបណ្ដើរៗហើយ ដោយសារតែការបិទដែនអាកាស​ជុំវិញហានិភ័យសន្តិសុខ។ នេះបើតាមការចុះផ្សាយរបស់កាសែតបាងកកប៉ុស្តិ៍។

ប្រធានអាជ្ញាធរទេសចរណ៍ថៃ (TAT) លោកស្រី Thapanee Kiatphaibool បាននិយាយថា ជម្លោះនៅមជ្ឈិមបូព៌ាបានជះឥទ្ធិពលយ៉ាងទូលំទូលាយដល់ការធ្វើដំណើរតាមផ្លូវអាកាសនៅក្នុងតំបន់នោះ។

​លោកស្រីលើកឡើងថា ក្រុមហ៊ុនអាកាសចរណ៍ជាច្រើនដែលដំណើរការជើងហោះហើរ​មកថៃ ដូចជា​ក្រុមហ៊ុនអាកាសចរណ៍ Emirates, Etihad, Qatar Airways, Flydubai, Air Arabia, Oman Air និង SalamAir ​បាន​ផ្លាស់ប្ដូរផ្លូវ ដើម្បីជៀសវាងតំបន់ជម្លោះ និងការបិទដែនអាកាស​ពីប្រទេសមួយចំនួន។

លោកស្រី Thapanee បាននិយាយថា ទីផ្សារចំនួន ៥ រួមមាន​អ៊ីរ៉ង់ អ៊ីរ៉ាក់ ហ្ស៊កដានី លីបង់ និងស៊ីរី ​ដែលរួមចំណែក ៧ ភាគរយ លើចំនួនភ្ញៀវទេសចរ​មជ្ឈិមបូព៌ា​(លើកលែងអ៊ីស្រាអែល) ១០០ ៧៨១ នាក់ ដែល​បាន​មកថៃ ​ក្នុងខែមិថុនា ឆ្នាំ ២០២៤​។

លោកស្រី Thapanee បាននិយាយថា TAT ក៏កំពុងតាមដានផលប៉ះពាល់រយៈពេលវែងដែលអាចបន្ត​ទៅលើប្រទេស​មជ្ឈិមបូព៌ាផ្សេងទៀត ប្រសិនបើក្ដីបារម្ភពីសុវត្ថិភាពកើនឡើង ជាពិសេសអារ៉ាប៊ីសាអូឌីត អារ៉ាប់រួម អូម៉ង់ គុយវ៉ែត កាតា និងបារ៉ែន ដែល​រួមចំណែក ៨០ ភាគរយ នៃ​ភ្ញៀវមជ្ឈិមបូព៌ាទាំងមូល​។ លោកស្រីបន្តថា សណ្ឋាគារនៅទីក្រុងបាងកក ប៉ាតាយ៉ា ភូកេត និងឈៀងម៉ៃ ដែលជាទិសដៅសំខាន់សម្រាប់ទីផ្សារមជ្ឈិមបូព៌ា ទំនងជារងផលប៉ះពាល់រយៈពេលខ្លីដ៏ធ្ងន់ធ្ងរបំផុត។

គួរគូស​បញ្ជាក់ថា TAT មានគោលបំណងទាក់ទាញ​ភ្ញៀវទេសចរចំនួន ១,០៦ លាន​នាក់ ពី​មជ្ឈិមបូព៌ាក្នុងឆ្នាំនេះ កើនឡើង ១១ ភាគរយ ធៀបនឹងឆ្នាំ ២០២៤ ហើយសង្ឃឹមថានឹងបង្កើតប្រាក់ចំណូលប្រហែល ៨៦ ប៊ីលានបាត (២,៦៤ ប៊ីលាន​ដុល្លារ)៕