ព័ត៌មានអន្ដរជាតិ

ភ្នំភ្លើងនៅឥណ្ឌូណេស៊ីផ្ទុះព្រួសផេះកម្ពស់១០គីឡូម៉ែត្រទៅលើផ្ទៃមេឃ

បានផុស

២៧ នាទីutes មុន

នៅ

ថ្ងៃពុធ ១៨ មិថុនា ២០២៥

ដោយ

កាលពីថ្ងៃអង្គារ ភ្នំភ្លើង Lewotobi Laki Laki នៅប្រទេសឥណ្ឌូណេស៊ី បានផ្ទុះចេញ ដោយព្រួសផេះនិងផ្សែងឡើង និងបានបញ្ជូនពពកផេះដ៏ច្រើនដេរដាសដែលមានកម្ពស់ ១០គីឡូម៉ែត្រ ទៅលើផ្ទៃមេឃ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី១៨ខែមិថុនានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការផ្ទុះនេះកើតឡើងឡើងបន្ទាប់ពីមានការកើនឡើងយ៉ាងខ្លាំងនៃសកម្មភាពភ្នំភ្លើង ដោយមានការញ័រចំនួន ៥០ដងត្រូវបានកត់ត្រាក្នុងរយៈពេលតែពីរម៉ោងប៉ុណ្ណោះ។ ជាការឆ្លើយតប មន្ត្រីបានបង្កើនការប្រុងប្រយ័ត្នដល់កម្រិតខ្ពស់បំផុត និងពង្រីកតំបន់គ្រោះថ្នាក់ដល់ ៨ គីឡូម៉ែត្រជុំវិញភ្នំភ្លើង។

ផេះរបស់ភ្នំភ្លើងនេះបានបង្កើតជាពពករាងផ្សិតដ៏ធំដែលអាចមើលឃើញពីចម្ងាយរហូតដល់ទៅ ១៥០ គីឡូម៉ែត្រ ។ ជាសំណាងល្អ មិនមានអ្នករងរបួស ឬស្លាប់នោះទេ។ ទោះបីជាយ៉ាងណាក៏ដោយ ប្រជាជនដែលរស់នៅក្បែរនោះត្រូវបានព្រមានឱ្យប្រុងប្រយ័ត្នចំពោះលំហូរកម្អែដែលអាចកើតមាន ជាពិសេសនៅពេលមានភ្លៀងធ្លាក់ខ្លាំង។

គួរបញ្ជាក់ថាភ្នំ Lewotobi Laki Laki គឺជាផ្នែកមួយនៃភ្នំភ្លើងភ្លោះជាមួយភ្នំភ្លើង Lewotobi Perempuan ។ ភ្នំភ្លើងនេះបានផ្ទុះលើកចុងក្រោយក្នុងខែវិច្ឆិកាឆ្នាំមុន និងបានសម្លាប់មនុស្ស៩នាក់។

ប្រទេសឥណ្ឌូណេស៊ីស្ថិតនៅលើមហាសមុទ្រប៉ាស៊ីហ្វិក «Ring of Fire» ដែលជាតំបន់ដែលមានការរញ្ជួយដី និងការផ្ទុះភ្នំភ្លើងញឹកញាប់។ ប្រទេសនេះមានភ្នំភ្លើងសកម្មចំនួន ១២០ និងជាតំបន់មួយក្នុងចំនោមតំបន់ដែលមានសកម្មភាពរញ្ជួយខ្លាំងបំផុតនៅក្នុងពិភពលោក៕