ព័ត៌មានអន្ដរជាតិ

ត្រាំ និង EU ប្រកាសកិច្ចព្រមព្រៀងពាណិជ្ជកម្ម ជាមួយនឹងពន្ធ ១៥% លើប្លុក

បានផុស

១២ ខែ មុន

នៅ

ថ្ងៃចន្ទ ២៨ កក្កដា ២០២៥

ដោយ

ប្រធានាធិបតីសហរដ្ឋអាមេរិក លោក ដូណាល់ ត្រាំ បានប្រកាសកាលពីថ្ងៃអាទិត្យថា អាមេរិកបានសម្រេចបានកិច្ចព្រមព្រៀងពាណិជ្ជកម្មជាមួយសហភាពអឺរ៉ុប (EU) ក្រោយពីបានពិភាក្សាចរចាជាមួយប្រធានគណៈកម្មការអឺរ៉ុប លោកស្រី អួរស៊ូឡា វ៉ុនឌែរ ឡេយែន។ នេះបើតាមការចុះផ្សាយរបស់បណ្ដាញទូរទស្សន៍ CNBC។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ បាននិយាយថា ក្រោមកិច្ចព្រមព្រៀងពាណិជ្ជកម្មថ្មី សហរដ្ឋអាមេរិកនឹងដាក់ពន្ធ ១៥ ភាគរយ លើទំនិញអឺរ៉ុបភាគច្រើនដែលនាំចេញទៅសហរដ្ឋអាមេរិក រួមទាំងរថយន្តផងដែរ។

ជុំវិញបញ្ហានេះដូចគ្នា លោកស្រី វ៉ុនឌែរ ឡេយែន បាននិយាយក្នុងសន្និសីទថា ផលិតផលមួយចំនួន រួមទាំងយន្តហោះ និងគ្រឿងបន្លាស់ សារធាតុគីមី និងឱសថមួយចំនួន នឹងមិនជាប់ពន្ធគយនោះទេ។ លោកស្រីក៏បាននិយាយដែរថា អត្រាពន្ធ ១៥ ភាគរយ ថ្មី ក៏នឹងមិនបន្ថែមពីលើមុខទំនិញតាមវិស័យ ដែលចូលជាធរមានរួចហើយដែរ។

គេមើលឃើញថា អត្រា ១៥ ភាគរយ គឺទាបជាងអត្រា ៣០ ភាគរយ ដែលលោក ត្រាំ បានគំរាមដាក់កាលពីមុន ហើយគ្រោងកំណត់ចូលជាធរមាននៅថ្ងៃទី ១ សីហា ប៉ុន្តែខ្ពស់ជាងអត្រា ១០ ភាគរយ ដែលប្លុកបានរំពឹងទុក។

ក្រៅពីអត្រាពន្ធ លោក ត្រាំ បាននិយាយថា EU ដែលមានសមាជិក ២៧ ប្រទេស ក៏បានយល់ព្រមទិញថាមពលអាមេរិក តម្លៃ ៧៥០ ប៊ីលានដុល្លារ និងវិនិយោគបន្ថែម ៦០០ ប៊ីលានដុល្លារ នៅសហរដ្ឋអាមេរិកផងដែរ។

លោក ត្រាំ បាននិយាយកាលពីថ្ងៃអាទិត្យ អំឡុងសន្និសីទកាសែតជាមួយលោកស្រី វ៉ុនឌែរ ឡេយែន ថា៖ «វាគឺជាកិច្ចព្រមព្រៀងដ៏មានឥទ្ធិពល វាជាកិច្ចព្រមព្រៀងដ៏ធំមួយ វាជាកិច្ចព្រមព្រៀងដ៏ធំបំផុតនៃកិច្ចព្រមព្រៀងទាំងអស់»។ ចំណែកឯលោកស្រី វ៉ុនឌែរ ឡេយែន វិញបាននិយាយថា៖ «វាជាកិច្ចព្រមព្រៀងដ៏ល្អ ដ៏ធំ ក្រោយមានការចរចាដ៏តឹងតែង»៕