ព័ត៌មានអន្ដរជាតិ

វៀតណាមបង្ហាញគម្រោងវិនិយោគជិត ៥០ ប៊ីលានដុល្លារ ដើម្បីជំរុញកំណើនសេដ្ឋកិច្ច

បានផុស

១១ ខែ មុន

នៅ

ថ្ងៃអង្គារ ១៩ សីហា ២០២៥

ដោយ

រដ្ឋាភិបាលវៀតណាមនាថ្ងៃអង្គារនេះ បានប្រកាសពីគម្រោងវិនិយោគចំនួន ២៥០ ជាមួយនឹងទំហំនៃការវិនិយោគប្រហែល ១ ៣០០ ទ្រីលានដុង (ប្រហែល ៤៩,៤ ប៊ីលានដុល្លារ) ចំពេលដែលវៀតណាមប្រឹងប្រែងដើម្បីជំរុញសេដ្ឋកិច្ចសេដ្ឋកិច្ចរបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងចំណោមនោះ រដ្ឋនឹងផ្ដល់ហិរញ្ញប្បទានដល់គម្រោងចំនួន ១២៩ ដែលរាប់ចាប់ពីការអភិវឌ្ឍន៍ទីក្រុងរហូតដល់ការដឹកជញ្ជូន ជាមួយនឹងការវិនិយោគសរុបប្រហែល ១៨ ប៊ីលានដុល្លារ។ នេះបើយោងតាមសេចក្តីថ្លែងការណ៍នៅលើគេហទំព័ររបស់រដ្ឋាភិបាល។

រដ្ឋាភិបាលវៀតណាមបានឱ្យដឹងទៀតថាការវិនិយោគជាង ៣០ ប៊ីលានដុល្លារទៀត នឹងប្រើក្នុងគម្រោងវិនិយោគចំនួន ១២១ ដែលផ្តល់ហិរញ្ញប្បទានដោយប្រភពផ្សេងៗ រួមទាំងពីក្រុមហ៊ុនបរទេសមួយចំនួន។

គម្រោងទាំងអស់បានបើកសម្ពោធ ឬដាក់ឱ្យដំណើរការរួចហើយ ដោយគ្រប់ដណ្ដប់លើខេត្ត និងក្រុងទាំង ៣៤ របស់វៀតណាម និងរួមមានហេដ្ឋារចនាសម្ព័ន្ធដឹកជញ្ជូន ការងារស៊ីវិល និងអភិវឌ្ឍន៍ទីក្រុងឧស្សាហកម្ម និងហេដ្ឋារចនាសម្ព័ន្ធបច្ចេកវិទ្យា។

សេដ្ឋវិទូបាននិយាយថា គម្រោងនឹងរួមចំណែកដល់ទៅ ១៨ ភាគរយ ដល់ផលិតផលក្នុងស្រុកសរុប (GDP) របស់វៀតណាម នៅក្នុងឆ្នាំ ២០២៥ និងជាង ២០ ភាគរយ នៅឆ្នាំបន្ទាប់។ នេះ នឹងជួយវៀតណាមឱ្យសម្រេចបានកំណើនសេដ្ឋកិច្ចយ៉ាងហោចណាស់ ៨ ភាគរយ នៅឆ្នាំ ២០២៥ និងកំណើនសេដ្ឋកិច្ចលេខ ២ ខ្ទង់ ចន្លោះឆ្នាំ ២០២៦-២០៣០។

កំណើនសេដ្ឋកិច្ចរបស់វៀតណាមមានភាពរឹងមាំ ដោយផលិតផលក្នុងស្រុកសរុបសម្រាប់មនុស្សម្នាក់ កើនឡើងពី ១២១,៧២ ដុល្លារ ក្នុងឆ្នាំ ១៩៩០ ដល់ ៤ ៩០០ ដុល្លារនៅឆ្នាំ ២០២៥ ជាមួយនឹងគោលដៅ ៧ ៥០០ ដុល្លារ នៅឆ្នាំ ២០៣០៕