វៀតណាម​គ្រោង​ដាក់ពន្ធលើចំណូលផ្ទាល់ខ្លួនពីការជួញដូរមាស ​

រដ្ឋាភិបាលវៀតណាមបានណែនាំឱ្យដាក់បញ្ចូល «ពន្ធលើប្រាក់ចំណូលពីការជួញដូរ​មាស» ទៅក្នុងវិសោធនកម្ម​សេចក្ដីព្រាងច្បាប់ស្តីពីពន្ធលើប្រាក់ចំណូលផ្ទាល់ខ្លួន ដើម្បីបង្កើន​តម្លាភាពទីផ្សារ និងកាត់បន្ថយសកម្មភាពការទិញមាសដើម្បីលក់ដេញតាមថ្លៃ (Speculation)។ នេះបើតាមការចុះផ្សាយរបស់កាសែត Tuổi Trẻ។

ការសម្រេចចិត្តរបស់់រដ្ឋាភិបាល​បែបនេះ ធ្វើឡើងចំពេលដែលតម្លៃមាសហក់ឡើងខ្លាំង ហើយ​មន្រ្តី​វៀតណាម​​ចង់​​គ្រប់គ្រង​ទីផ្សារ និង​ធ្វើ​ឱ្យ​មាន​ស្ថិរភាព​ជាង​មុន​។ តម្លៃមាសបានកើនឡើង ៥៦ ភាគរយ នៅវៀតណាម​ឆ្នាំនេះ ​ធៀប​នឹង​កំណើន ​១៤ ភាគរយ ពេញ១ឆ្នាំមុន។

ថ្មីៗនេះ តម្លៃមាសដុំស្ដង់់ដារ SJC ​របស់វៀតណាម បានឡើងដល់កម្រិតខ្ពស់បំផុតប្រមាមណ ១៣៥ លាន​ដុន (​ប្រហែល ៥ ១១៣ ដុល្លារអាមេរិក) ក្នុង ១ តាអ៊ីល (Tael)។ ​មាន​ពេលខ្លាំង តម្លៃមាសនៅ​វៀតណាម​ខ្ពស់ជាងតម្លៃមាសសកល រហូតដល់ ២០ លាន​ដុន (៧៥៧ ដុល្លារ)​។ នៅ​​​វៀតណាម មាស ១ តាអ៊ីល គឺ​ស្មើ​នឹង​ប្រហែល ១,២ ​ត្រយអោន (troy ounce)។​

បើតាម Tuổi Trẻ ក្រសួងហិរញ្ញវត្ថុវៀតណាមម នឹងធ្វើការជាមួយធនាគាររដ្ឋវៀតណាម ដែលជាធនាគារកណ្ដាលរបស់ប្រទេស ​ដើម្បីរៀបចំការដាក់ពន្ធលើចំណូលពីការជួញដូរមាស។ បើតាមអ្នកជំនាញ អ្នកបង្កើត​គោលនយោបាយត្រូវវាយតម្លៃដោយប្រុងប្រយ័ត្នពីរបៀបដែលបទប្បញ្ញត្តិពន្ធលើប្រាក់ចំណូលផ្ទាល់ខ្លួនប៉ះពាល់ដល់ «ប្រាក់ចំណូលអាជីវកម្ម» ដើម្បី​បញ្ចៀសការរំខានដល់សកម្មភាពអាជីវកម្មបុគ្គល៕