ទោះឆ្លង និងស្លាប់ដោយកូវីដច្រើនក៏ដោយ តែប្រេស៊ីលមិនខ្ចីប្រើវ៉ាក់សាំង Sputnik V របស់រុស្ស៊ី

និយតករសុខភាពរបស់ប្រទេសប្រេស៊ីលកាលពីថ្ងៃចន្ទ បានបដិសេធសំណើពីរដ្ឋជាច្រើនក្នុងការនាំចូលវ៉ាក់សាំង Sputnik V របស់រុស្ស៊ី ដោយនិយាយថា វ៉ាក់សាំងនេះមិនមានទិន្នន័យចាំបាច់ដើម្បីបញ្ជាក់ពីសុវត្ថិភាព និងប្រសិទ្ធភាពក្នុងការចាក់ដល់ប្រជាពលរដ្ឋរបស់ពួកគេនោះទេ ។

លោក Antonio Barra Torres ប្រធាននិយតករសុខភាពសហព័ន្ធប្រេស៊ីល ហៅកាត់ថា Anvisa បាននិយាយថា “យើងនឹងមិនអនុញ្ញាតឲ្យប្រជាជនប្រេស៊ីលរាប់លាននាក់ ត្រូវចាក់វ៉ាក់សាំងរបស់ផលិតផលដោយគ្មានការបញ្ជាក់ពីគុណភាព សុវត្ថិភាព និងប្រសិទ្ធភាព នោះទេ បើទោះជាយើងកំពុងប្រឈមនឹងស្ថានភាពធ្ងន់ធ្ងរ និងមានការបញ្ជាក់ថា អត្ថប្រយោជន៍វ៉ាក់សាំងនេះមានលើសពីហានិភ័យក៏ដោយ” ។

Anvisa បាននិយាយថា អ្នកជំនាញរបស់ខ្លួនបានដាក់សញ្ញា “ភាពមិនប្រាកដប្រជា” អំពីការចាក់វ៉ាក់សាំងដែលមិនទាន់ត្រូវបានយល់ព្រមដោយទីភ្នាក់ងារឱសថអឺរ៉ុប (EMA) ឬរដ្ឋបាលចំណីអាហារ និងឪសថអាមេរិក (FDA) ។

Anvisa ដែលបានទទួលសំណើកាលពីខែមុន សម្រាប់ការប្រើប្រាស់ជាបន្ទាន់នៃរូបមន្តវ៉ាក់សាំងរុស្ស៊ី មិនបានចេញផ្សាយការរកឃើញរបស់ខ្លួន ឬលើកឡើងពីព័ត៌មានជាក់លាក់ដែលវាបានកំណត់ពីភាពខ្វះខាតទិន្នន័យណាមួយនោះទេ ។

ប្រទេសរុស្ស៊ីបានចុះបញ្ជីវ៉ាក់សាំង Sputnik V កាលពីខែសីហា មុនការសាកល្បងព្យាបាលទ្រង់ទ្រាយធំ ដែលធ្វើឲ្យមានការព្រួយបារម្ភក្នុងចំណោមអ្នកជំនាញ ជុំវិញដំណើរការផលិតយ៉ាងលឿននេះ ។ ប៉ុន្តែកាសែតវេជ្ជសាស្ត្រ Lancet បានចេញផ្សាយថា វ៉ាក់សាំងនេះមានសុវត្ថិភាព និងមានប្រសិទ្ធភាពជាង ៩០ ភាគរយ ។

គួរបញ្ជាក់ថា គិតត្រឹមពេលនេះប្រទេសប្រេស៊ីលមានករណីឆ្លងជំងឺកូវីដ ១៩ សរុប ១៤,៣៧០,៤៥៦ ករណី និងមានអ្នកស្លាប់ចំនួន ៣៩២,២០៤ នាក់ ខណៈដែលរហូតមកដល់ពេលនេះ ប្រទេសប្រេស៊ីលបានបើកយុទ្ធនាការចាក់វ៉ាក់សាំងជាង ៣៨ លានដូសដល់ប្រជាពលរដ្ឋ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ រុស្ស៊ី ត្រៀមបញ្ជូនវ៉ាក់សាំង Sputnik V ទៅឥណ្ឌាដែលកំពុងរងគ្រោះខ្លាំងដោយកូវីដ ខណៈដូសដំបូងនឹងមកដល់នៅដើមខែក្រោយ

ចុចអាន ៖ វ៉ាក់សាំងកូវីដ Sputnik V របស់រុស្ស៊ី ត្រៀមទទួលបានភ្លើងខៀវប្រើប្រាស់ពី WHO នាខែក្រោយ