Chansung សមាជិកក្រុម 2PM ប្រកាសរៀបការយ៉ាងតក់ក្រហល់ ក្រោយជិតក្លាយជាឪពុកគេ

តារាចម្រៀង Hwang Chansung សមាជិកក្រុម 2PM បានប្រកាសពិធីអាពាហ៍ពិពាហ៍យ៉ាងតក់ក្រហល់ ខណៈលោកទម្លាយបន្ថែមថា ខ្លួននឹងក្លាយជាឪពុកគេឆាប់ៗនេះ ក្រោយមានគម្រោងចាកចេញពីផលិតកម្ម JYP នៅខែមករា ឆ្នាំ២០២២ ខាងមុខ។

តារាប្រុសកូរ៉េខាងត្បូងរូបនេះបានបង្ហោះសារយ៉ាងវែង នៅលើបណ្ដាញសង្គមផ្ទាល់ខ្លួននាថ្ងៃទី១៥ ខែធ្នូ នេះថា លោកនឹងកសាងគ្រួសារថ្មីមួយ ក្រោយមានទំនាក់ទំនងជាមួយមិត្តស្រីអស់ជាយូរមកហើយដែរ។ តាមពិតទៅ Chansung មានផែនការរៀបការ បន្ទាប់ពីលោកចេញបម្រើកងទ័ព។ ប៉ុន្តែមិត្តស្រីរបស់លោក បានមានផ្ទៃពោះលឿនជាងការរំពឹងទុក ដូច្នេះលោកគ្រោងនឹងរៀបការ នៅដើមឆ្នាំក្រោយនេះហើយ។

បន្ថែមពីលើនេះ Chansung បញ្ជាក់ថា មិត្តស្រីរបស់លោក មិនមែនជាមនុស្សដែលស្ថិតក្នុងរង្វង់សិល្បៈដូចខ្លួនឡើយ។ ដូច្នេះលោកសុំមិនបញ្ចេញអត្តសញ្ញាណរបស់នាងនោះទេ។

ដោយឡែក កិច្ចសន្យាជាមួយផលិតកម្ម JYP Entertainment ដែលប្រព្រឹត្តទៅអស់រយៈពេល ១៥ឆ្នាំមកនោះ នឹងបញ្ចប់នៅខែមករា ឆ្នាំ២០២២ខាងមុខនេះ។ ប៉ុន្តែតារាចម្រៀង K-pop រូបនេះបង្ហើបថា ខ្លួនទំនងបញ្ចប់កុងត្រានេះតែម្ដង ព្រោះលោកចង់យកពេលថែទាំគ្រួសារថ្មី។

យ៉ាងណាមិញ ​Hwang Chansung​ ប្ដេជ្ញានឹង​​ព្យាយាមចូលរូមក្នុងវិស័យចម្រៀងក្នុងនាមជាសមាជិកក្រុម 2PM ឱ្យអស់ពីលទ្ធភាពដែលអាចឆ្លៀតបាន៕

ប្រែសម្រួល៖ សន្យា

ចុចអាន៖ តួកូនស្រី Gong Yoo ក្នុងរឿង “Train to Busan” ពេលនេះធំពេញវ័យ មើលមិនចង់ស្គាល់

ចុចអាន៖ តារាប្រុសស្រី ៤រូបនេះហើយ មានតម្លៃខ្លួនខ្ពស់ជាងគេ ប្រចាំវិស័យភាពយន្តកូរ៉េ