ជីវិតកម្សាន្ដ

ក្រុម K-pop កូរ៉េ BTS នឹងទៅជួបប្រធានាធិបតីអាមេរិកសប្តាហ៍ក្រោយ

បានផុស

៣ years មុន

នៅ

ថ្ងៃសុក្រ ២៧ ឧសភា ២០២២

ដោយ

ក្រុមតារាចម្រៀងកូរ៉េខាងត្បូង BTS នឹងធ្វើដំណើរទៅសហរដ្ឋអាមេរិកសប្តាហ៍ក្រោយនេះដើម្បីដោះស្រាយឧក្រិដ្ឋកម្មស្អប់ខ្ពើមដែលមានគោលដៅលើជនជាតិអាស៊ី និងប្រជាជនដែលមានដើមកំណើតអាស៊ីជាមួយប្រធានាធិបតីសហរដ្ឋអាមេរិក លោក ចូ បៃដិន នៅសេតវិមាន។ នេះបើតាមសេតវិមានបាននិយាយក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ ទី២៦ ខែឧសភា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីថ្លែងការណ៍បានឲ្យដឹងថា លោកប្រធានាធិបតី ចូ បៃដិន នឹងទទួលក្រុមតារាចម្រៀងដែលមានកេរ្តិ៍ឈ្មោះល្បីល្បាញទូទាំងពិភពលោកនៅថ្ងៃអង្គារ៍ សប្តាហ៍ក្រោយ និងពិភាក្សាគ្នាអំពីការដាក់បញ្ចូល និងតំណាងអាស៊ី ព្រមទាំងដោះស្រាយឧក្រិដ្ឋកម្មស្អប់ខ្ពើមប្រឆាំងជនជាតិអាស៊ី និងការរើសអើងដែលបានកំពុងកើតមានខ្លាំងក្នុងរយៈពេលប៉ុន្មានឆ្នាំចុងក្រោយនេះ។

ក្រុមតារាចម្រៀងប្រុសកូរ៉េខាងត្បូងដែលមានសមាជិក៧រូបមានកេរ្តិ៍ឈ្មោះល្បីល្បាញខ្លាំងតាមរយៈបទចម្រៀងដ៏ពេញនិយម និងក្បាច់រាំដ៏អស្ចារ្យ ហើយប្រមូលផ្តុំអ្នកគាំទ្រទូទាំងពិភពលោក។ ជាពិសេសពួកគេឈ្នះពានរង្វាន់ IFPI Global Recording ប្រចាំឆ្នាំជាសកលកាលពីខែកុម្ភៈ ហើយជាការឈ្នះពីរឆ្នាំជាប់គ្នា។

កិច្ចប្រជុំរបស់ក្រុមតារាចម្រៀង និងប្រធានាធិបតីនឹងធ្វើឡើង ខណៈព្រឹត្តិការណ៍«ការទទួលស្គាល់របស់ខែឧសភាអំពីជនជាតិអាមេរិកអាស៊ី និងជនជាតិដើមកោះហាវ៉ៃ/ប៉ាស៊ីហ្វិក (AANHPI)កាន់តែខិតជិតមកដល់ស្របពេលមានការកើនឡើងខ្លាំងអំពីឧក្រិដ្ឋកម្មស្អប់ខ្ពើមលើជនជាតិអាមេរិកដើមកំណើតអាស៊ីកាលពីឆ្នាំមុន។ ការវាយប្រហារប្រឆាំងលើជនជាតិអាស៊ីកើតឡើងខ្លាំង បន្ទាប់ពីជំងឺកូវីដ-១៩បានផ្ទុះឡើង។

សេតវិមានបានបន្ថែមថា ៖«លោក ចូ បៃដិន និងក្រុម BTS ក៏នឹងពិភាក្សាគ្នាអំពីសារសំខាន់នៃភាពចម្រុះ និងការដាក់បញ្ចូល ព្រមទាំងទម្រង់របស់ BTS ជាទូតសុឆន្ទៈយុវវ័យដែលចែករំលែកសារនៃសេចក្តីសង្ឃឹម និងភាពវិជ្ជមានទូទាំងពិភពលោក»៕

ប្រែសម្រួល៖ វីរបុត្រ
ប្រភព៖ Reuters

Related Topics:លោក ចូ បៃដិន