Girls’ Generation លុបចោលការសម្តែងទាំងអស់ ក្រោយសមាជិកក្នុងក្រុមឆ្លងកូវីដ

ផលិតកម្ម SM Entertainment បាននិយាយនៅលើវេទិកាអ្នកគាំទ្រពិភពលោក KWANGYA CLUB កាលពីថ្ងៃអង្គារ ទី៩ ខែសីហាថា “ក្រុម Girls’ Generation បានលុបចោលការសម្ដែងក្នុងសប្ដាហ៍នេះ បន្ទាប់ពីសមាជិកក្នុងក្រុមគឺតារាចម្រៀងស្រី Seohyun បានឆ្លងកូវីដ” ។

SM Entertainment បញ្ជាក់ថា ដូច្នេះហើយ Seohyun បានបញ្ឈប់រាល់កាលវិភាគច្រៀង និងសម្ដែងទាំងអស់ ហើយពេលនេះនាងកំពុងសម្រាកព្យាបាល ហើយ SM Entertainment គឺជាអ្នកទទួលខុសត្រូវលើកាលវិភាគទាក់ទងនឹងក្រុម Girls’ Generation ។

ស្របពេលដែលការបញ្ជាក់ឆ្លងកូវីដរបស់ Seohyun នេះហើយ កាលវិភាគចាក់ផ្សាយបទចម្រៀងថ្មីរបស់ Girls’ Generation ក្នុងកម្មវិធី “M Countdown” របស់ទូរទស្សន៍ Mnet និង “Inkigayo” របស់ទូរទស្សន៍ SBS TV សម្រាប់សប្តាហ៍នេះក៏ត្រូវបានលុបចោលផងដែរ ។

បន្ថែមពីនេះ Seohyun ក៏បាននិយាយនៅលើ SNS នៅថ្ងៃនោះដែរថា “ខ្ញុំសុំទោសសមាជិកផ្សេងៗទាំងអស់ដែលរង់ចាំការសម្ដែងរបស់យើង ។ ខ្ញុំពិបាកចិត្តណាស់ ព្រោះខ្ញុំមាន សុខភាពមិនល្អ ។ ពេលនេះខ្ញុំកំពុងសម្រាកព្យាបាល ហើយសង្ឃឹមថានឹងឆាប់ជាសះស្បើយ ហើយប្រហែលជាជួបគ្នានៅសប្ដាហ៍ក្រោយ ។ ទោះកាលវិភាគចាក់ផ្សាយបទចម្រៀងរបស់ពួកយើងនៅសប្ដាហ៍នេះបានលុបចោលមែន ប៉ុន្តែខ្ញុំរំពឹងថា វានឹងដំណើរការបានឡើងវិញនៅសប្តាហ៍ក្រោយ” ។

ទន្ទឹមនឹងនេះដែរ ក្រុម Girls’ Generation ដែលបានប្រារព្ធខួបលើកទី ១៥ របស់ខ្លួននៅឆ្នាំនេះក៏បានចេញអាល់ប៊ុមទី ៧ របស់ខ្លួន “Forever 1” កាលពីថ្ងៃទី ៥ ពោលជាអាល់ប៊ុបដំបូងរបស់ពួកគេក្នុងរយៈពេល ៥ ឆ្នាំកន្លងមកនេះ ៕

ប្រែសម្រួល៖នាងតូច

ចុចអាន៖MV ថ្មីរបស់ Blackpink ចំណាយដើមទុនអស់កប់ក្ដោង

ចុចអាន៖ហេតុផល ៥ យ៉ាង មិនគួររំលងរឿងភាគកូរ៉េ “Big Mouth” កំពុងល្បីល្បាញខ្លាំង