ពេជ្រ វត្តីសារ៉ាវឌ្ឍី សន្យាខិតខំប្រឹងឱ្យអស់ពីសមត្ថភាពក្នុងថ្ងៃប្រកួតឈុតតំណាងជាតិ

បវរកញ្ញាតំណាងឱ្យកម្ពុជា កញ្ញា ពេជ្រ វត្តីសារ៉ាវឌ្ឍី ពេលនេះកំពុងបង្ហាញវត្តមានក្នុងកម្មវិធីប្រកួតសម្រស់ដ៏ធំ Miss Grand International 2022 នាប្រទេសឥណ្ឌូនេស៊ី។ អំឡុងពេលនេះ គេសង្កេតឃើញទស្សនិកជនខ្មែរ និងអ្នកគាំទ្រមួយចំនួនបានសម្តែងការលើកទឹកចិត្តដល់នាងគ្រប់គ្នា។

អ្នកនិយមតាមដានវិស័យដើរម៉ូដនៅកម្ពុជាកត់សម្គាល់ឃើញថា បវរកញ្ញា ពេជ្រ វត្តីសារ៉ាឌ្ឍី ដែលជាម្ចាស់ម្កុដកញ្ញាឯកដ៏អស្ចារ្យនៃកម្ពុជាឆ្នាំ២០២២ (Miss Grand Cambodia2022) រហូតមកទល់ពេលនេះ នាងនៅតែទទូចស្នើរសុំការគាំទ្រ និងផ្តល់កម្លាំងចិត្តពីមហាជនខ្មែរទូទាំងប្រទេស ខណ:ការប្រកួតឈុតតំណាងជាតិបានឈានចូលមកដល់នៅថ្ងៃទី២០ ខែតុលា ឆ្នាំ២០២២នេះ។

ជាក់ស្តែងបើចាប់អារម្មណ៍នៅលើទំព័រហ្វេសប៊ុករបស់បវរកញ្ញា ពេជ្រ វត្តីសារ៉ាវឌ្ឍី កាលពីម្សិលមិញ ពោលគឺមុន១ថ្ងៃនៃការប្រកួតឈុតតំណាងជាតិ នាងក៏បានស្នើរឲ្យមហាជនជួយគាំទ្រ និងផ្តល់កំលាំងចិត្តផង។ លើសពីនេះទៀត ពេជ្រ វត្តីសារ៉ាវឌ្ឍី ថែមទាំងសន្យាខិតខំប្រឹងឱ្យអស់ពីសមត្ថភាពដើម្បីប្រទេសកម្ពុជា។

កញ្ញា ពេជ្រ វត្តីសារ៉ាវឌ្ឍី ដែលជា Miss Grand Cambodia2022 បានបញ្ជាក់ថា នាងបានត្រៀមខ្លួនរួចជាស្រេចក្នុងការគ្រងឈុត «គោព្រៃ» ដើរបង្ហាញទង់ជាតិកម្ពុជាឱ្យអន្តរជាតិបានឃើញ។ នាងលើកឡើង «ជួបគ្នានៅថ្ងៃស្អែកនេះនាងខ្ញុំនឹងខិតខំប្រឹងប្រែងឱ្យអស់ពីសមត្ថភាពដើម្បីប្រទេសកម្ពុជា ការប្រកួតឈុតតំណាងជាតិ នឹងត្រូវធ្វើឡើងនៅថ្ងៃទី ២០ ខែតុលា នៅម៉ោង៦ល្ងាច (ម៉ោងនៅប្រទេសកម្ពុជា )នៅលើក Facebook Page និងYouTube Channel Miss Grand International»។ សូមអរគុណដល់បងៗពុកម៉ែ បងប្អូនដែលជួយជ្រោមជ្រែង vote និងlike and shareដល់រូបនាងខ្ញុំ។

សូមជម្រាបថា នៅថ្ងៃទី២០ ខែតុលា ឆ្នាំ២០២២ កម្មវិធីប្រកួតសម្រស់លំដាប់អន្តរជាតិដ៏ធំនេះ នឹងឈានដល់វគ្គបង្ហាញ​ឈុតតំណាងជាតិដែលតម្រូវឱ្យបវរកញ្ញានីមួយៗ គ្រងនូវឈុតតំណាងប្រទេសរបស់ខ្លួនដើម្បីដើរបង្អួតសម្រស់នៅលើ​ឆាក។ ចំណែកនៅថ្ងៃទី២៥ ខែតុលា ឆ្នាំ២០២២ខាងមុខកម្មវិធីប្រកួត Miss Grand International 2022 គឺឈាន​ដល់វគ្គប្រកួតផ្ដាច់ព្រ័ត្រដើម្បីស្វែងរកបេក្ខភាពបវរកញ្ញា១រូបដែលមកពីបណ្ដាប្រទេសនានាជុំវិញពិភពលោកក្លាយជាបវរកញ្ញាគ្រងមកុដប្រចាំឆ្នាំ២០២២៕

អត្ថបទ៖ ចាន់រ៉ា