Carlos Chan ខំរកលុយដើម្បីរៀបការ សឹងតែគ្រោះថ្នាក់ដល់ជីវិត

តារាសម្ដែងចិន-ហុងកុង លោក Carlos Chan និងតារាសម្ដែងហុងកុង អ្នកនាង Shiga Lin មានគម្រោងរៀបការក្នុងឆ្នាំថោះ ខែមេសា ខាងមុននេះហើយ ។

ដើម្បីរៀបចំពិធីមង្គលការឲ្យមានលក្ខណៈលេចធ្លោដូចកេរ្តិ៍ឈ្មោះ លោក Carlose កំពុងដុតដៃដុតជើងក្នុងវិស័យការងារមិនសម្រាកសោះឡើយ ។ ឥលូវនេះគាត់រវល់ថតរឿងភាគថ្មីក្នុង TVB ផងដែរគឺរឿង “Strange Feelings” ជាមួយតារាស្រី Hera Chan ។ 

អំឡុងពេលថតរឿងខាងលើក្នុងឈុតឆាកគ្រោះថ្នាក់ Carlos ប៊ិះបាត់បង់ជីវិតទៅហើយដោយសារតែលោកត្រូវថតក្នុងទឹកសមុទ្រជាង ២០ នាទីឯណោះ ។

ទោះបីជាមិនសូវមានពេលសម្រាកពិតមែន ប៉ុន្តែលោក Carlos នៅតែសប្បាយរីករាយនឹងទទួលយកការងារពិបាកៗច្រើនទៀត ថែមទាំងពោលថា “វាជារឿងល្អ គ្រាន់បើជាងគ្មានការងារធ្វើ ហើយខ្ញុំនឹងឆក់ឱកាសការងារដរាបណាខ្ញុំអាចទៅរួច” ។

ទន្ទឹមនឹងការងារដ៏មមាញឹក វិបត្តិដំណេករបស់តារាសម្ដែងខាងលើធ្លាប់ធ្វើឲ្យគាត់គេងលក់លើឡានដោយមិនដឹងខ្លួនទៀតផង ទើបក្រោយមកលោក Carlos សម្រេចចិត្តជួលអ្នកបើកឡានជំនួសវិញ ។

យោងទៅតាមលោកគ្រូហុងស៊ុយ Chen Zicai បានឲ្យដឹងថាមង្គលការអ្នកទាំងពីរនឹងនាំមកនូវសំណាងល្អក្នុងឱកាសការងារសម្រាប់កូនកំលោះ និងលុយកាក់ហូរចូលច្រើនសម្រាប់កូនក្រមុំផងដែរ ។ ជាពិសេសក្នុងឆ្នាំ ២០២៥ ជាឆ្នាំល្អបំផុត ថែមទាំងអាចមានកូនស្រីទៀតផង ៕

ប្រែសម្រួលដោយ ៖ វារី

ចុចអាន ៖ ចប់ការងារភ្លាម Fala Chen ប្រញាប់ប្រញាល់ទៅជួបកូនស្រី និងប្ដីទាំងយប់

ចុចអាន ៖ Dilraba នឹងជំនួសតំណែងរបស់ Angelababy ក្លាយជាទូតសុឆន្ទៈ Dior ពេញសិទ្ធ